ସମ୍ବଲପୁର: ସମ୍ବଲପୁରର ବରେଇପାଲି ଅଞ୍ଚଳରୁ ପ୍ରାୟ ୪୯ ଲକ୍ଷ ଟଙ୍କାର ସାମଗ୍ରୀ ସହିତ ଏକ ମାଲବାହୀ ଭାରିଯାନ ଚୋରି ହୋଇଯାଇଛି। ଅଇଁଠାପାଲି ଥାନାରେ ହୋଇଥିବା ଅଭିଯୋଗ ଅନୁଯାୟୀ, ବରେଇପାଲି ନିବାସୀ ଆରତି ସିଂଙ୍କ ଏକ ୧୪ ଚକିଆ ଭାରିଯାନ ଭଡା ସୂତ୍ରରେ ଲଗାଇଥାନ୍ତି। ତାଙ୍କ ଭାରିଯାନରେ ଚାଳକ ଗତ ୨୭ ତାରିଖ ରାତ୍ର ସମୟରେ ଝାରସୁଗୁଡା ସ୍ଥିତ ଷ୍ଟେରଲାଇଟ କମ୍ପାନୀରୁ ୧୪ଟି ଆଲୁମିନିୟମର ତାର ବଣ୍ଟଲ ଲୋଡ କରିଥିଲେ। ଏହା ପରେ ଗାଡିକୁ ଚାଳକ ସମ୍ବଲପୁର ସ୍ଥିତ ବରେଇପାଲି ଠାରେ ପହଂଚିବା ପରେ ସେଠାରେ ରଖି ଦେଇ ଘରକୁ ଯାଇଥିଲେ। ତେବେ ଶୁକ୍ରବାର ସକାଳୁ ଗାଡିଟି ରଖିଥିବା ସ୍ଥାନରେ ନ ଥିବା ଜାଣି ତୁରନ୍ତ ଗାଡି ମାଲିକ ଖୋଜାଖୋଜି ଆରମ୍ଭ କରିଥିଲେ। ଗାଡିଟି ପରମାଣପୁର ନିକଟସ୍ଥ କୁଦୋପାଲି ଅଞ୍ଚଳରେ ଥିବା ଜାଣି ସେଠାକୁ ଯାଇଥିଲେ। ଗାଡିଟି ସେଠାରେ ଛିଡା ହୋଇଥିବା ବେଳେ ଗାଡିରେ ଥିବା ୧୪ଟି ମୂଲ୍ୟବାନ ଆଲୁମିନିୟମ ବଣ୍ଟଲ ତାର ମଧ୍ୟରୁ ମାତ୍ର ୩ଟି ଥିବାର ଦେଖିଥିଲେ। ଏଣୁ ଅଇଁଠାପାଲି ଥାନାରେ ଅଭିଯୋଗ କରିବାରୁ ପୁଲିସ ମାମଲା ସଂଖ୍ୟା ୪୫୨/୨୦୨୨ ରୁଜୁ କରି ଗାଡିକୁ ଜବତ କରି ଚୋରି ସାମଗ୍ରୀ ଗୁଡିକୁ ଠାବ କରିବାକୁ ଚେଷ୍ଟା କରୁଛି।
Comments are closed.