ସାକ୍ଷୀଗୋପାଳ: ଚଳିତ ବନ୍ୟା ଫଳରେ ସତ୍ୟବାଦୀ ଅଞ୍ଚଳରେ ବ୍ୟାପକ କ୍ଷୟକ୍ଷତିର ହୋଇଛି। ପୂର୍ବ ସତ୍ୟବାଦୀ ଅନ୍ତର୍ଗତ କେତକୀପାଟଣା ଓ ବଳରାମ ପୁର ଗଡ଼ ପଞ୍ଚାୟତରେ ଧନୁଆ ନଦୀର ବନ୍ୟା ପାଣି ପଦ୍ମ ପୁର, ଦୁବ ପାଟଣା, କେତକୀପାଟଣା, ରୟତ ସାହି, ଅଲଣ୍ଡା ପଡ଼ା, ବାଲି ଉପର, ବିଶ୍ୱନାଥ ଦେଉଳି, ପୁରୁଣା ବୁଢ଼ାକେରା, ନୂଆ ବୁଢ଼ାକେରା, ବିଭୂତି ପୋଖରୀ, ମାଳ ସାହି ଓ ବାଲି ସାହି ଗ୍ରାମର ଗହୀରରେ ୩ ଦିନ ହେଲାଣି ପ୍ରାୟ ୩ ଫୁଟ ଉଚ୍ଚତାରେ ବନ୍ୟା ଜଳ ରହିଛି। ଫଳରେ ଏହି ଅଞ୍ଚଳରେ ପ୍ରାୟ ଏକ ହଜାର ଏକରରୁ ଉର୍ଦ୍ଧ୍ୱ ଧାନ ଜମି ଓ ପରିବା ଚାଷ ପାଣିରେ ବୁଡି ରହିଛି। ସତ୍ୟବାଦୀ ବ୍ଲକ ଅଧ୍ୟକ୍ଷ ସୁନୀଲ କୁମାର ପଣ୍ଡା ଓ ମଣ୍ଡଳ କୃଷି ଅଧିକାରୀ କଲ୍ୟାଣ ରାୟଙ୍କ ସମେତ ଅନ୍ୟମାନେ ଏହି ବନ୍ୟାଞ୍ଚଳ ପରିଦର୍ଶନ କରିଥିଲେ।
ସେହିପରି ପଶ୍ଚିମ ସତ୍ୟବାଦୀ ଅନ୍ତର୍ଗତ ଶୁକଳ ପଞ୍ଚାୟତରେ ଲୁଣା ନଦୀର ପଛୁଆ ପାଣି ଗତ ୮ ଦିନ ଜମି ରହିଛି। ଫଳରେ ଶୁକଳ, ବାମ ବରଡ଼ା, ଦୋଖଣ୍ଡ ପୁର, ଦକ୍ଷିଣ କେରା, ମାର୍କଣ୍ଡ ପଡ଼ା ଓ ରାୟ ପୁର ଗ୍ରାମର ପ୍ରାୟ ୬ ହଜାର ଜନସାଧାରଣ ଜଳବନ୍ଦୀ ହୋଇ ରହିଛନ୍ତି। ୪ ହଜାରରୁ ଏକରରୁ ଉର୍ଦ୍ଧ୍ୱ ଧାନ ଫସଲ ଓ ପରିବା ଚାଷ ୮ ଦିନ ହେଲାଣି ପ୍ରାୟ ୫ ଫୁଟ ପାଣିରେ ବୁଡି ରହିଛି। ଧାନ ଓ ପରିବା ଫସଲ ନଷ୍ଟ ହୋଇ ଗଲାଣି। ଲୁଣା, ରତ୍ନଚୀରା ଆଡ଼ ନଈରେ ଦୟା, ଭାର୍ଗବୀ ଓ ଲୁଣା ନଈର ବଡ଼ ଗୋଠ ଠାରୁ ଆସୁଥିବା ପଛୁଆ ପାଣି ଚିଲିକାକୁ ନିଷ୍କାସିତ ହୋଇ ନ ପାରି ସତ୍ୟବାଦୀ ବ୍ଲକର ଶୁକଳ, ଆଳିସ ଓ ମଧୁବନ ପଞ୍ଚାୟତରେ ପ୍ରବେଶ କରୁଛି। ମାର୍କଣ୍ଡ ପଡ଼ା ଗ୍ରାମ ମୁଣ୍ଡରେ ଲୁଣା ରତ୍ନଚୀରା ଆଡ଼ ନଈର ବନ୍ୟା ଜଳ ନଦୀର ବାମ ପଟ ବନ୍ଧ ଡେଇଁ ଏହି ଅଞ୍ଚଳକୁ ପ୍ରବେଶ କରୁଛି। ଶ୍ରୀ ଶ୍ରୀ ନୀଳକଣ୍ଠେଶ୍ଵର ଦେବଙ୍କ ମନ୍ଦିରରେ ୪ ଫୁଟ ଉଚ୍ଚତାରେ ପାଣି ରହିଛି। ଜୋକଦଳି ବନ୍ଧ ଉପରେ ୫ ଫୁଟ ଉଚ୍ଚତାରେ ସତ୍ୟବାଦୀ ଅଞ୍ଚଳରେ ପ୍ରବେଶ କରୁଛି। ଫଳରେ ବନ୍ୟା ଜଳ ଏହି ଅଞ୍ଚଳରେ ଅଧିକ ଦିନ ରହିବାର ସମ୍ଭାବନା ରହିଛି।
