ଇପୋ (ମାଲେସିଆ) : ଏଠାରେ ଖେଳାଯାଉଥିବା ଆଜ୍ଲାନ୍ ଶାହା ହକି ପ୍ରତିଯୋଗିତାରେ ଭାରତକୁ ୫ମ ସ୍ଥାନରେ ସନ୍ତୁଷ୍ଟ ହେବାକୁ ପଡ଼ିଛି। ଶନିବାର ଖେଳାଯାଇଥିବା ସ୍ଥାନ ନିରୂପଣ ମ୍ୟାଚ୍ରେ ଭାରତ ୪-୧ ଗୋଲ୍ରେ ଆୟରଲାଣ୍ଡକୁ ପରାସ୍ତ କରିଥିଲା। ଶୁକ୍ରବାର ଆୟରଲାଣ୍ଡ ଠାରୁ ୩-୨ ଗୋଲ୍ରେ ପରାସ୍ତ ହୋଇ ଭାରତ ପଦକ ଦୌଡ଼ରୁ ବାଦ୍ ପଡ଼ିଥିଲା। ତେବେ ଶନିବାର ଖେଳାଯାଇଥିବା ସ୍ଥାନ ନିରୂପଣ ମ୍ୟାଚ୍ରେ ଭାରତୀୟ ଖେଳାଳିମାନେ ଭଲ ପ୍ରଦର୍ଶନ କରି ସହଜ ବିଜୟ ହାସଲ କରି ୫ମ ସ୍ଥାନ ହାସଲ କରିଥିଲେ।
ଖେଳର ୪ର୍ଥ ମିନିଟ୍ରେ ଭାରତୀୟ ଖେଳାଳି ତଲୱିନ୍ତର ସିଂହଙ୍କ ଏକ ଶକ୍ତିଶାଳୀ ସଟ୍କୁ ଆୟର୍ଲାଣ୍ଡ ଗୋଲରକ୍ଷକ ଜେମି କାର୍ ଅଟାଇବାକୁ ସକ୍ଷମ ହୋଇଥିଲେ। ଏହାର ଗୋଟିଏ ମିନିଟ୍ ପରେ ଭାରତକୁ ଏକ ପେନାଲ୍ଟି କର୍ଣ୍ଣର ମିଳିଥିଲା। ଭାରତୀୟ ଖେଳାଳି ବରୁଣ କୁମାର ଏହାକୁ ଗୋଲ୍ରେ ପରିଣତ କରି ଦଳକୁ ୧-୦ରେ ଅଗ୍ରଣୀ କରାଇଥିଲେ। ଗୋଲ୍ ପରିଶୋଧ କରିବାକୁ ଆୟର୍ଲାଣ୍ଡ ଖେଳାଳିମାନେ ଉଦ୍ୟମ କରିଥିଲେ ମଧ୍ୟ ପ୍ରଥମ କ୍ୱାର୍ଟରରେ ଭାରତ ଅଗ୍ରଣୀ ରହିବାକୁ ସମର୍ଥ ହୋଇଥିଲା। ଖେଳର ୨୮ ମିନିଟ୍ରେ ଆୟର୍ଲାଣ୍ଡ ରକ୍ଷଣଭାଗ ଖେଳାଳିଙ୍କ ଭୁଲ୍ର ଫାଇଦା ଉଠାଇ ଭାରତୀୟ ଖେଳାଳି ଶୈଳାନନ୍ଦ ଲାକ୍ରା ଦଳ ତରଫରୁ ଦ୍ୱିତୀୟ ଗୋଲ୍ ସ୍କୋର କରିବାରେ ସକ୍ଷମ ହୋଇଥିଲେ। ସେହିପରି ଖେଳର ୩୨ ମିିନିଟ୍ରେ ବରୁଣ କୁମାର ପେନାଲ୍ଟି କର୍ଣ୍ଣରରୁ ଆଉ ଏକ ଗୋଲ୍ ସ୍କୋର କରି ଭାରତକୁ ୩-୦ରେ ଆଗୁଆ କରାଇଥିଲେ। ଖେଳର ୩୭ ମିିନିଟ୍ରେ ତଲୱିନ୍ତର ସିଂହଙ୍କ ଠାରୁ ପାସ୍ ପାଇ ଗୁରଜାଣ୍ଟ ସିଂହ ଗୋଲ୍ ସ୍କୋର କରି ଦଳକୁ ୪-୦ରେ ଅଗ୍ରଣୀ କରାଇଥିଲେ। ଆୟର୍ଲାଣ୍ଡ ତରଫରୁ ଖେଳର ୪୮ ମିନିଟ୍ରେ ଜୁଲିଆନ୍ ଡେଲ୍ ଗୋଲ ସ୍କୋର କରି ଖେଳକୁ ୪-୧ ସ୍ଥିତିକୁ ଆଣିଥିଲେ। ଖେଳ ଶେଷ ହେବା ପର୍ଯ୍ୟନ୍ତ ଉଭୟ ଦଳ ଆଉ ଗୋଲ୍ ସ୍କୋର କରିବାକୁ ବିଫଳ ହେବାରୁ ଭାରତ ୪-୧ରେ ବିଜୟୀ ହୋଇଥିଲା।
