ଭୁବନେଶ୍ୱର: ଚଳିତ ମାସ ଶେଷସୁଦ୍ଧା ରାଜ୍ୟର ସମସ୍ତ ଜିଲାରେ ଆରଟି-ପିସିଆର ପରୀକ୍ଷାଗାର କାର୍ଯ୍ୟକ୍ଷମ ହେବ। ଆସନ୍ତା ୧୫ ତାରିଖ ଭିତରେ କେତୋଟି ପରୀକ୍ଷାଗାର କାମ ସମ୍ପୂର୍ଣ୍ଣ ହୋଇପାରେ। ଯେଉଁଗୁଡିକ ସମ୍ପୂର୍ଣ୍ଣ ହେବ ସେଗୁଡିକୁ କାର୍ଯ୍ୟକ୍ଷମ କରାଯିବ ବୋଲି ରାଜ୍ୟ ଜନସ୍ବାସ୍ଥ୍ୟ ନିର୍ଦେଶକ ଡ. ନିରଞ୍ଜନ ମିଶ୍ର କହିଛନ୍ତି। ପ୍ରଥମ ଲହର ପ୍ରାରମ୍ଭିକ ସମୟରେ ଆଞ୍ଚଳିକ ଭେଷଜ ଗବେଷଣା ପ୍ରତିଷ୍ଠାନ (ଆରଏମ୍ଆରସି)ରେ ନମୁନା ପରୀକ୍ଷା ହେଉଥିଲା। ୩୦ ଜିଲାରୁ ସନ୍ଦିଗ୍ଧଙ୍କ ନମୁନା ଏଠାକୁ ଆସୁଥିଲା। ପରୀକ୍ଷାରେ ବିଳମ୍ବ ହେଉଥିଲା। ପରବର୍ତ୍ତୀ ସମୟରେ ସଂକ୍ରମଣ ବୃଦ୍ଧି ପାଇବା ଦ୍ବାରା ପରୀକ୍ଷାଗାର ସଂଖ୍ୟା ବୃଦ୍ଧି କରାଯାଇଥିଲା। ଜୀବ ବିଜ୍ଞାନ ପ୍ରତିଷ୍ଠାନ (ଆଇଏଲ୍ଏସ୍) ଏବଂ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ (ଏମ୍ସ) ଭୁବନେଶ୍ବର ସହିତ ଭେଷଜ ମହାବିଦ୍ୟାଳୟଗୁଡିକରେ ଆରଟି-ପିସିଆର ପରୀକ୍ଷା ବ୍ୟବସ୍ଥା ହୋଇଥିଲା। ସଂକ୍ରମଣକୁ ନିୟନ୍ତ୍ରଣ କରିବାକୁ ହେଲେ ପରୀକ୍ଷାକୁ ଗୁରୁତ୍ବ ଦିଆଗଲା। ଦ୍ବିତୀୟ ଲହରରେ ସରକାର ୧୪ ଜିଲାରେ ଆରଟି-ପିସିଆର ପରୀକ୍ଷାଗାର ବ୍ୟବସ୍ଥା କରିଥିଲେ; କିନ୍ତୁ ସମ୍ଭାବ୍ୟ ତୃତୀୟ ଲହରକୁ ଦୃଷ୍ଟିରେ ରଖି ସରକାର ସମସ୍ତ ଜିଲାରେ ଗୋଟିଏ ଲେଖାଏଁ ଆରଟି-ପିସିଆର ପରୀକ୍ଷାଗାର ସ୍ଥାପନ କରିବାକୁ ପଦକ୍ଷେପ ଗ୍ରହଣ କରିଥିଲେ।
ଯେଉଁ ପରୀକ୍ଷାଗାର ଗୁଡିକ କାର୍ଯ୍ୟକ୍ଷମ ରହିଛି ସେଠାରୁ ପାଖାପାଖି ୧୦ ପ୍ରତିଶତ ନମୁନା ଆଇଏଲଏସକୁ ପଠାଇବା ଲାଗି କର୍ତ୍ତୃପକ୍ଷଙ୍କୁ କୁହାଯାଇଥିଲା। ଏବେ ୧୬ ଜିଲାରେ ବିଏସ୍ଏଲ୍-୨ ପରୀକ୍ଷାଗାର ସ୍ଥାପନ କାମ ଚାଲିଛି। ଉପକରଣ ଓ ଯନ୍ତ୍ରାଂଶ ଲଗାଯାଉଛି। ପରୀକ୍ଷାଗାରରେ ଯେଉଁ ଯନ୍ତ୍ର (ମେସିନ) ରହିବ ଗୋଟିଏ ପାଳିରେ ୮ ଘଣ୍ଟା ଭିତରେ ୪୦୦ ନମୁନା ପରୀକ୍ଷା କରାଯାଇ ପାରିବ।
