କେନ୍ଦୁଝରଗଡ଼ : କେନ୍ଦୁଝର ବନଖଣ୍ଡ ଅଧିନ ଅଟେଇ ସଂରକ୍ଷିତ ଜଙ୍ଗଲରେ ଗତ କିଛି ମାସ ବ୍ୟବଧାନ ପରେ ପୁଣିଥରେ ମହାବଳ ବାଘ ତା’ର ଉପସ୍ଥିତ ଜାହିର କରିଥିବା ନେଇ ବନ ବିଭାଗ ପକ୍ଷରୁ ସୋମବାର ଫଟୋ ଜାରି କରିଛି । ମହାବଳ ବାଘ ଅଟେଇ ଜଙ୍ଗଲରେ ଥିବା ଜଣାପଡିବା ପରେ ସ୍ଥାନୀୟ ଅଞ୍ଚଳବାସୀଙ୍କୁ ସୁରକ୍ଷା ଦେବା ଲକ୍ଷ୍ୟରେ ଉକ୍ତ ଜଙ୍ଗଲରେ ବନ ବିଭାଗ ପକ୍ଷରୁ ପର୍ଯ୍ୟାୟକ୍ରମେ ୬୧ଟି ଟ୍ରାପ କ୍ୟାମେରା ସଂଯୋଗ କରାଯାଇଥିଲା ।
ପରବର୍ତ୍ତୀ ସମୟରେ ୩ଟି କ୍ୟାମେରା ଚୋରୀ ହେବା ସହ ୧୦ଟି କ୍ୟାମେରାକୁ ବନ ବିଭାଗ ପକ୍ଷରୁ ଖୋଲି ଦିଆଯାଇଥିବା ବେଳେ ବର୍ତ୍ତମାନ ୪୮ଟି କ୍ୟାମେରା ମହାବଳ ବାଘ ସମେତ ବିରଳ ବନ୍ୟପ୍ରାଣୀଙ୍କ ଗତିବିଧି ଉପରେ ନଜର ରଖିଛି । ଅଟେଇ ଜଙ୍ଗଲରେ ମହାବଳ ବାଘ ସମେତ ଝିଙ୍କ, ଚିତ୍ରା ହରିଣ, ଧୂସର ଗଧିଆ, ଜଙ୍ଗଲି ବାରହା, ଭାଲୁ ଆଦି ବହୁ ବନ୍ୟପ୍ରାଣୀଙ୍କ ଫଟୋ ଉକ୍ତ ଟ୍ରାପ କ୍ୟାମେରାରେ କଏଦ ହୋଇଥିବା ନେଇ ବନ ବିଭାଗ ପକ୍ଷରୁ ସେମାବାର ଫଟୋ ଜାରି କରାଯାଇଛି ।
ସ୍ଥାନୀୟ ଅଞ୍ଚଳବାସୀଙ୍କ ସୁରକ୍ଷା ଦୃଷ୍ଟି କୋଣରୁ ଜଙ୍ଗଲର ୪ଟି ସ୍ଥାନରେ ଅସ୍ଥାୟୀ ଗେଟ୍ ସ୍ଥାପନ ସହ ଟ୍ରେଞ୍ଚ ଖେଳା ଯାଇଥିବା ବନ ବିଭାଗ ପକ୍ଷରୁ କୁହାଯାଇଛି । ସେହିଭଳି ମହାବଳ ବାଘ ଗତିବିଧି ଉପରେ ତୀକ୍ଷ୍ଣ ନଜର ପାଇଁ ଘଟଗାଁ ଓ ପାଟଣା ବନାଞ୍ଚଳର ୩ଜଣ ଫରେଷ୍ଟର, ୮ଜଣ ଫରେଷ୍ଟ ଗାର୍ଡ ଓ ୧୦ଜଣ ବନ ବିଭାଗ ସୁରକ୍ଷାକର୍ମୀଙ୍କୁ ନେଇ ଗଠିତ ସ୍କ୍ୱାର୍ଡ ୨୪ଘଣ୍ଟିଆ ସତର୍କ ପ୍ରହରୀ ଭାବେ ଦାୟିତ୍ୱ ନିର୍ବାହ କରିଆସୁଛନ୍ତି । ଏତଦ୍ବ୍ୟତୀତ ମହାବଳ ବାଘ ତା’ର ଉପସ୍ଥିତି ଜାହିର କରିବା ଜଣାପଡିବା ପରେ ଅଧିକ ସତର୍କତାମୂଳକ ପଦକ୍ଷେପ ସ୍ୱରୂପ ଅଧିକ ସଂଖ୍ୟକ ବନ କର୍ମଚାରୀ ମଧ୍ୟ ମୁତୟନ କରାଯାଉଥିବା ସହକାରୀ ବନ ସଂରକ୍ଷକ କେନ୍ଦୁଝର ଅଶୋକ ଦାସ କହିଛନ୍ତି ।
