ଢାକା : ବଙ୍ଗୋପସାଗରରେ ସୃଷ୍ଟ ସାମୁଦ୍ରିକ ଝଡ ରେମାଲ ରବିବାର ମଧ୍ୟରାତ୍ରୀରେ ପଶ୍ଚିମବଙ୍ଗ ଓ ବାଂଲାଦେଶର ମଧ୍ୟବର୍ତ୍ତୀ ଅଞ୍ଚଳରେ ସ୍ଥଳଭାଗ ଛୁଇଁଛି। ଏହି ଝଡ଼ ପ୍ରଭାବରେ ବାଂଲାଦେଶରେ ୧୦ ଜଣ ପ୍ରାଣ ହରାଇଥିବାବେଳେ ୩୦ ହଜାର ବାସଗୃହ ସମ୍ପୂର୍ଣ୍ଣ ଧରାଶାୟୀ ହୋଇଛି। ବାଂଲାଦେଶର ଖୁଲ୍ନା, ଚିଟ୍ଟାଗଙ୍ଗ ଓ ବରିସାଲ ଜିଲାରେ ସବୁଠାରୁ ଅଧିକ କ୍ଷତି ଘଟିଛି ବୋଲି ବରିସାଲ ପ୍ରଶାସକ ସୌକତ୍ ଅଲ୍ଲୀ କହିଛନ୍ତି। ଏହି ତିନିଟି ଜିଲାରେ ମୋଟ ୧,୩୩,୦୦୦ ବାସଗୃହ କ୍ଷତିଗ୍ରସ୍ତ ହୋଇଥିବାବେଳେ ୩୦ ହଜାର ବାସଗୃହ ନିଶ୍ଚିହ୍ନ ହୋଇଥିବା କୁହାଯାଇଛି। ବିଦ୍ୟୁତ ସରବରାହ ବିଚ୍ଛିନ୍ନ ହୋଇପଡିବାରୁ ୧୨.୫ ନିୟୁତ ଲୋକ ବର୍ତ୍ତମାନ ଅନ୍ଧକାରରେ କାଳାତିପାତ କରୁଛନ୍ତି। ବାତ୍ୟା ପ୍ରଭାବିତ ଅଞ୍ଚଳରେ ବିଦ୍ୟୁତ୍ ପୁନଃ ସଂଯୋଗ ନିମନ୍ତେ ଉଦ୍ୟମ ଜାରି ରହିଛି ବୋଲି ବାଂଲାଦେଶ ରୁରାଲ ଇଲେକ୍ଟ୍ରିଫିକେସନ ବୋର୍ଡ ମୁଖ୍ୟଯନ୍ତ୍ରୀ ବିଶ୍ବନାଥ ସିକ୍ଦାର ଗଣମାଧ୍ୟମକୁ ଜଣାଇଛନ୍ତି। ସମୁଦ୍ର ଏବେ ମଧ୍ୟ ଅଶାନ୍ତ ରହିଥିବାରୁ ମତ୍ସ୍ୟଜୀବୀଙ୍କୁ ମାଛ ଧରିବାକୁ ଅନୁମତି ପ୍ରଦାନ କରାଯାଇନାହିଁ। ବିରାଟକାୟ ବୃକ୍ଷ ରାସ୍ତା ଉପରେ ଉପୁଡି ପଡିଥିବାରୁ ଗମନା ଗମନ ବ୍ୟବସ୍ଥା ବାଧାପ୍ରାପ୍ତ ହୋଇଛି। ବାତ୍ୟା ପ୍ରଭାବିତ ଅଞ୍ଚଳରେ ପାନୀୟ ଜଳର ଉତ୍କଟ ସମସ୍ୟା ଉପୁଜିଛି। ତେବେ ସେହି ସ୍ଥାନକୁ ରିଲିଫ୍ ଓ ଉଦ୍ଧାରକାରୀ ଦଳ ପଠାଯାଇଥିବା କୁହାଯାଇଛି।
Popular Categories
Previous article
Next article