ନୂଆଦିଲ୍ଲୀ : ପ୍ରତିରକ୍ଷା ଗବେଷଣା ଓ ଉନ୍ନୟନ ବିଭାଗ(ଡିଡିଆରଡି)ର ସଚିବ ଏବଂ ପ୍ରତିରକ୍ଷା ଗବେଷଣା ଉନ୍ନୟନ ପ୍ରତିଷ୍ଠାନ (ଡିଆରଡିଓ) ମୁଖ୍ୟ ଭାବେ ଲବ୍ଧପ୍ରତିଷ୍ଠ ମହାକାଶ ବିଜ୍ଞାନୀ ଡ଼କ୍ଟର ଜି.ସତୀଶ ରେଡ୍ଡି ସୋମବାର କାର୍ଯ୍ୟଭାର ଗ୍ରହଣ କରିଛନ୍ତି । ଗତ ଶନିବାର ନିଯୁକ୍ତି ସମ୍ପର୍କିତ କ୍ୟାବିନେଟ କମିଟି ଡ଼କ୍ଟର ରେଡ୍ଡିଙ୍କ ନୂଆ ନିଯୁକ୍ତିକୁ ଅନୁମୋଦନ କରିଥିଲା । ସେ ଦୁଇବର୍ଷ ପାଇଁ ଏହି ପଦରେ ରହିବେ। ପୂର୍ବରୁ ଏହି ପଦରେ ଥିବା ଏସ ଖ୍ରୀଷ୍ଟୋଫର ଗତ ଜୁନ୍ରେ ଅବସର ଗ୍ରହଣ କରିସାରିଛନ୍ତି। ଡ଼କ୍ଟର ରେଡ୍ଡି ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣଙ୍କ ବୈଜ୍ଞାନିକ ଉପଦେଷ୍ଟା ଥିଲେ। କ୍ଷେପଣାସ୍ତ୍ର ବ୍ୟବସ୍ଥାର ଗବେଷଣା ଓ ଉନ୍ନୟନ କ୍ଷେତ୍ରରେ ରେଡ୍ଡି ବେଶ ଜଣାଶୁଣା। ଏହା ସହିତ ମହାକାଶ ଜ୍ଞାନକୌଶଳ ଓ ଶିଳ୍ପ କ୍ଷେତ୍ରରେ ତାଙ୍କର ବିଶେଷ ଅବଦାନ ରହିଛି। ଜବାହାରଲାଲ ନେହେରୁ ଟେକ୍ନୋଲୋଜିକାଲ ୟୁନିଭର୍ସିଟି (ଜେଏନଟିୟୁ)ରୁ ସେ ଇଲେକ୍ଟ୍ରୋନିକ୍ସ ଆଣ୍ଡ କମ୍ୟୁନିକେସନ ଇଞ୍ଜିନିୟରିଂରେ ସ୍ନାତକ ଡିଗ୍ରୀ ହାସଲ କରିଛନ୍ତି। ଏହା ସହିତ ଅନେକ ବିଦେଶୀ ଶିକ୍ଷାନୁଷ୍ଠାନରୁ ସେ ବୈଷୟିକ ଡିଗ୍ରୀ ହାସଲ କରିଛନ୍ତି।
