ରଜୌରୀ: ଜମ୍ମୁ-କାଶ୍ମୀର ରଜୌରୀରେ ବୁଧବାର ସୁରକ୍ଷାବଳ-ଆତଙ୍କବାଦୀ ଗୁଳି ବିନିମୟ ଘଟିଛି। ଏଥିରେ ୨ ସେନା ଅଧିକାରୀ ଓ ଜଣେ ଯବାନ ଶହୀଦ ହୋଇଛନ୍ତି। ଏଥିସହ ଜଣେ ଯବାନ ଗୁରୁତର ଭାବେ ଆହତ ହୋଇଥିବା ସୂଚନା ମିଳିଛି। ଆହତ ଯବାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ଅପରପକ୍ଷେ, ସୁରକ୍ଷାବଳଙ୍କ ଗୁଳିରେ ଜଣେ ଆତଙ୍କୀ ନିହତ ହୋଇଥିବା ଜଣାପଡ଼ିଛି। ଶହୀଦ ୩ ଜଣଙ୍କ ମଧ୍ୟରେ ୨ ଜଣ କ୍ୟାପ୍ଟେନ ଥିବା ବେଳେ ଜଣେ ହାବିଲଦାର ଅଛନ୍ତି।
ସୂଚନା ଅନୁସାରେ, ରଜୌରୀ ଉପଖଣ୍ଡ କାଲାକୋଟ୍ ଅନ୍ତର୍ଗତ ଧର୍ମଶାଳା ଥାନା ଅଧିନସ୍ଥ ସୋଲକୀ ଗାଁର ବାଜିମାଲ୍ ଅଞ୍ଚଳରେ ଥିବା ଜଙ୍ଗଲରେ ଆତଙ୍କବାଦୀ ମାନେ ଲୁଚିଥିବା ନେଇ ସେନା ଖବର ପାଇଥିଲା। ଖବର ପାଇ ସେନା, ପୁଲିସ ଓ ସିଆରପିଏଫର ଏକ ମିଳିତ ଟିମ୍ ଘଟଣାସ୍ଥଳରେ ପହଞ୍ଚି ଘେରାଉ କରି ସର୍ଚ୍ଚ ଅପରେସନ କରିଥିଲେ। ଏହି ସମୟରେ ଆତଙ୍କବାଦୀ ଓ ସୁରକ୍ଷାବଳଙ୍କ ମଧ୍ୟରେ ଗୁଳି ବିନିମୟ ହୋଇଥିଲା।
