ଡେସ୍କ: ଜାତୀୟ ରାଜପଥ ପ୍ରାଧିକରଣ ସମଗ୍ର ଦେଶରେ ୨୯ଟି ନିର୍ମାଣାଧୀନ ସୁଡ଼ଙ୍ଗର ସୁରକ୍ଷା ଅଡିଟ୍ କରିବ। ସଡକ ପରିବହନ ଏବଂ ରାଜପଥ ମନ୍ତ୍ରଣାଳୟ ସୂଚନା ଅନୁଯାୟୀ, ନିର୍ମାଣ ସମୟରେ ସର୍ବୋଚ୍ଚ ଗୁଣାତ୍ମକ ମାନର ନିରାପତ୍ତା ଏବଂ ପାଳନକୁ ନିଶ୍ଚିତ କରିବା ପାଇଁ ଏହି ପଦକ୍ଷେପ ନିଆଯାଇଛି।
ମନ୍ତ୍ରଣାଳୟ କହିଛି ଯେ ଜାତୀୟ ରାଜପଥ ପ୍ରାଧିକରଣ ଅଧିକାରୀମାନେ ଦିଲ୍ଲୀ ମେଟ୍ରୋ ରେଳ ନିଗମ (ଡିଏମଆରସି) ଏବଂ ଅନ୍ୟ ଟନେଲ ବିଶେଷଜ୍ଞଙ୍କ ସହ ନିର୍ମାଣାଧୀନ ଟନେଲ ପ୍ରକଳ୍ପଗୁଡ଼ିକର ଯାଞ୍ଚ କରିବେ। ଅଧିକାରୀମାନେ ୭ ଦିନ ମଧ୍ୟରେ ଏକ ରିପୋର୍ଟ ଦାଖଲ କରିବେ ବୋଲି ମନ୍ତ୍ରଣାଳୟ ସୂଚନା ଦେଇଛି।
ମନ୍ତ୍ରଣାଳୟ ଆହୁରି ସୂଚନା ଦେଇଛି ଯେ ଜାତୀୟ ରାଜପଥ ପ୍ରାଧିକରଣ କୋଙ୍କଣ ରେଳ ନିଗମ ଲିମିଟେଡ୍ ସହିତ ଏକ ବୁଝାମଣାପତ୍ର ସ୍ୱାକ୍ଷର କରିଛି। ଏହି ଚୁକ୍ତିନାମା ଅନୁଯାୟୀ, ଜାତୀୟ ରାଜପଥ ପ୍ରାଧିକରଣ ପ୍ରକଳ୍ପଗୁଡିକ ପାଇଁ ଟନେଲ୍ ନିର୍ମାଣ କ୍ଷେତ୍ରରେ ଡିଜାଇନ୍, ଡ୍ରଇଂ ଏବଂ ସୁରକ୍ଷା ଦିଗଗୁଡିକ ସମୀକ୍ଷା କରିବାକୁ କୋଙ୍କଣ ରେଳ ନିଗମ ସେବା ପ୍ରଦାନ କରିବ। ଏହା ଛଡା କୋଙ୍କଣ ରେଳ ନିଗମ, ଜାତୀୟ ରାଜପଥ ପ୍ରାଧିକରଣ ଅଧିକାରୀଙ୍କ ଦକ୍ଷତା ବୃଦ୍ଧି ପାଇଁ ତାଲିମ କାର୍ଯ୍ୟକ୍ରମ ଆୟୋଜନ କରିବ। ଏହି ଚୁକ୍ତି ଦୁଇ ବର୍ଷ ପାଇଁ ବଳବତ୍ତର ରହିବ।
