ଯାତ୍ରୀଙ୍କ ଟ୍ରେନ ଟିକେଟ ବାତିଲରୁ ରେଳ ବିଭାଗର ୧୩୯୪ କୋଟି ଟଙ୍କାଲାଭ

ନୂଆଦିଲ୍ଲୀ : ଭାରତୀୟ ରେଳରେ ପ୍ରତିଦିନ ଲକ୍ଷ ଲକ୍ଷ ଲୋକ ଯାତ୍ରା କରିଥାନ୍ତି। ଦୂର ଯାତ୍ରା କରୁଥିବା ଅନେକ ଯାତ୍ରୀ ଯାତ୍ରା କରିବାର ପୂର୍ବରୁ ହିଁ ଟିକେଟ କରିଥିବା ଦେଖିବାକୁ ମିଳିଥାଏ। କିନ୍ତୁ ଯାତ୍ରାର ଶେଷ ସମୟରେ କୌଣସି କାରଣବଶତଃ ଟିକେଟକୁ ରଦ୍ଦ କରିବାକୁ ବାଧ୍ୟ ହୋଇଥାନ୍ତି। ଟିକେଟ ରଦ୍ଦ ହେବାଦ୍ୱାରା ଭାରତୀୟ ରେଳ ବିଭାଗ ଯାତ୍ରୀମାନଙ୍କ ନିକଟରୁ ଏଥିପାଇଁ କିଛି ଟଙ୍କା କାଟିଥାଏ।
ସୂଚନା ଅଧିକାର ଦ୍ୱାରା ମିଳିଥିବା ତଥ୍ୟ ଅନୁସାରେ ୨୦୧୭-୧୮ ଆର୍ଥିକ ବର୍ଷରେ ରଦ୍ଦ ହୋଇଥିବା ଟିକେଟ ଦ୍ୱାରା ରେଳ ବିଭାଗ ୧୩୯୪ କୋଟି ଟଙ୍କା ଲାଭ କରିଛି। ମଧ୍ୟପ୍ରଦେଶର ଚନ୍ଦ୍ରଶେଖର ଗୌଡ ରେଳ ଯାତ୍ରା ଟିକେଟ ରଦ୍ଦ ହେବାଦ୍ୱାରା କେତେ ଅର୍ଥ ଲାଭ କରାଯାଉଛି ଜାଣିବାପାଇଁ ସୂଚନା ଅଧିକାର ଆଇନ ଅନୁସାରେ ଆବେଦନ କରିଥିଲେ। ସିଆରଆଇଏସ୍‍ ଜଣେ ବରିଷ୍ଠ ଅଧିକାରୀ ଏବିଷୟରେ ସୂଚନା ଦେଇଥିଲେ।ଏହି ସମୟରେ ଅପେକ୍ଷା(ଓ୍ୱେଟିଂ) ତାଲିକାରେ ଥିବା ଯାତ୍ରୀଙ୍କ ଟିକେଟ ରଦ୍ଦ ହେବଦ୍ୱାରା ରେଳ ବିଭାଗ ୮୮.୫୫କୋଟି ଟଙ୍କା ଲାଭ କରିଥିଲା।
ରେଳ ବିଭାଗ ଯାତ୍ରୀଙ୍କ ସୁବିଧା ଯାତ୍ରା ନିମନ୍ତେ ରେଳମାନଙ୍କରେ ଅନେକ ଅତ୍ୟାଧୁନିକ ସୁବିଧା ପ୍ରଦାନର ବ୍ୟବସ୍ଥା କରୁଛି । ଗତ ଦୁଇ ମାସ ମଧ୍ୟରେ ଦୁଇଟି ନୂଆ ଆପ୍‌ ମଧ୍ୟ ଲଞ୍ଚ କରିଛି । ନୂଆ ଆପ୍‌ରେ ଯାତ୍ରୀମାନେ ରେଳର ସମସ୍ତ ଅଧିକାଂଶ ତଥ୍ୟ ହାସଲ କରିବା ସହ କୌଣସି ଅସୁବିଧାର ସମ୍ମୁଖୀନ ହେଲେ ଏଥିରେ ଅଭିଯୋଗ କରି ପାରିବେ ।