କାଶୀପୁର: ସ୍ବଧୀନତାର ଅନେକ ବର୍ଷପରେ ମଧ୍ୟ ଗ୍ରାମାଞ୍ଚଳରେ ମୌଳିକ ସୁବିଧା ଅପହଞ୍ଚ ହୋଇଛି। ଗାଡି ଚଳାଚଳ ପାଇଁ ସାଧାରଣ ରାସ୍ତାଟିଏ ହୋଇ ପାରିନାହିଁ। ପକ୍କା ସଡକ ନ ଥିବାରୁ ଆଜି ଏକ ଜରୁରୀ କାଳୀନ ସେବାରୁ ବଞ୍ଚିତ ହେଇଛନ୍ତି ଜଣେ ଗର୍ଭବତୀ ମହିଳା। ୧୦୮ ଆମ୍ବୁଲାନସ ଗାଁରେ ପହଞ୍ଚି ପାରିଲାନାହିଁ। ଫଳରେ ଜଣେ ଗର୍ଭବତୀ ମହିଳାଙ୍କୁ ଷ୍ଟ୍ରେଚରରେ ନାଳ ନାର୍ଦମା ଡେଇଁ ପ୍ରାୟ ଦୁଇ କିମି ଆଣିବାକୁ ପଡିଥିଲା। ଏହିପରି ଏକ ଅଭାବନିୟ ଘଟଣାଟ ଘଟିଛି ରାୟଗଡା ଜିଲା କାଶୀପୁର ବ୍ଲକ ଅନ୍ତର୍ଗତ ଅଡ଼ାଜୋର ଗ୍ରାମ ପଞ୍ଚାୟତର ଦଳଗୁମ୍ମା ଗ୍ରାମରେ। ପିଡିତା ହେଲେ ବିକ୍ରମ ମାଝିଙ୍କ ସ୍ତ୍ରୀ ହାମଦେଇ ମାଝି। ତାଙ୍କ ପ୍ରସବ କାଳିନ ବ୍ୟଥା ଆରମ୍ଭ ହେବା ନେଇ ପରିବାର ଲୋକେ ପିଡିତାଙ୍କୁ କାଶୀପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ନେବା ପାଇଁ ୧୦୮ ଆମ୍ବୁଲାନସ ଗାଡିକୁ ଯୋଗାଯାଗ କରିଥିଲେ। ଏହାପରେ କାଶୀପୁରର ୧୦୮ ଆମ୍ବୁଲାନସ ବାହାରି ରାୟେଲ ପଟା ଗ୍ରାମ ନିକଟସ୍ଥ ପ୍ରଧାନମନ୍ତ୍ରୀ ସଡକ ଯୋଜନାରେ ହେଇଥିବା ରାସ୍ତା ପର୍ୟ୍ୟନ୍ତ ପହଞ୍ଚିଥିଲା।
ଆଗକୁ ରାସ୍ତା ନ ଥିବାରୁ ଆମ୍ବୁଲାନସଟି ଗ୍ରାମକୁ ଯାଇ ପାରିନଥିଲା। ଫଳରେ ସେହିଠାରେ ହିଁ ଆମ୍ବୁଲାନସଟି ଅଟକି ଯାଇଥିଲା। ଗ୍ରାମଠାରୁ ଆମ୍ବୁଲାନସ ଥିବା ରାସ୍ତାର ଦୂରତା ୨କିଲୋମିଟର । ହେଲେ ଗାଁ ରେ ପ୍ରସୂତି ମହିଳାଙ୍କୁ ବୋହି ଆଣିବାକୁ ପୁରୁଷ ଲୋକ ନ ମିଳିବାରୁ ଶେଷରେ ଗାଁ ମହିଳା ମାନଙ୍କ ସହଯୋଗରେ ଆମ୍ବୁଲାନସ କର୍ମଚାରୀ ସାହାଯ୍ୟର ହାତ ବଢ଼ାଇଥିଲେ। ଆମ୍ବୁଲାନସ ଫାର୍ମାସିଷ୍ଟ ନଳିନୀ ବିଡିକା, ଡ୍ରାଇଭର ଧବଳେଶ୍ବର ପୂଜାରୀ ଓ ହେଲ୍ପର ସୀମାଞ୍ଚଳ ଗ୍ରାମର ମହିଳାଙ୍କ ସହ ପ୍ରାୟ ଦୁଇ କିମି ଦୂରରେ ଥିବି ଆମ୍ବୁଲାନସ ନିକଟକୁ ଉକ୍ତ ମହିଳାଙ୍କୁ ଷ୍ଟ୍ରେଚର ସାହାଯ୍ୟରେ ବୋହି ଆଣିଥିଲେ। ଗର୍ଭବତିି ମହିଳା ଚିକିତ୍ସା ପାଇଁ କାଶୀପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ଆମ୍ବୁଲାନସ କର୍ମଚାରିଙ୍କ ମାନବିକତା ଯୋଗୁଁ ମହିଳା ଚିକିତ୍ସା ପାଇଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇପାରିଥିଲେ। ଆମ୍ବୁଲାନସ କର୍ମଚାରିଙ୍କ ଏଭଳି କାର୍ୟ୍ୟ ଏବେ ସାଧାରଣରେ ଚର୍ଚ୍ଚା ଚାଲିଛି।
