ସମାଜ ଡିଜିଟାଲ ଡେସ୍କ: ବିଶିଷ୍ଟ ରାଜନୈତିକ ବିଶ୍ଳେଷକ ପ୍ରଶାନ୍ତ କିଶୋର ନିଜର ନୂଆ ଦଳ ‘ଜନ ସୂରାଜ’ ଗଠନ କରିଛନ୍ତି। ଆସନ୍ତା ଅକ୍ଟୋବର ୨ ଗାନ୍ଧୀ ଜୟନ୍ତୀ ଅବସରରେ ସେ ନିଜ ଦଳର ଶୁଭାରମ୍ଭ କରିବେ। ପଟନାସ୍ଥିତ ବାପୁ ସଭାଗାରରେ ରବିବାର ଦଳୀୟ ପଦାଧିକାରୀମାନଙ୍କୁ ସମ୍ବୋଧିତ କରିବା ଅବସରରେ ପ୍ରଶାନ୍ତ ଏ ସମ୍ପର୍କରେ ଘୋଷଣା କରିଛନ୍ତି। ଏହା ସହିତ ସେ ଜୟ ବିହାର ଏବଂ ଜୟ-ଜୟ ବିହାର ଉପରେ ଆଲୋଚନା କରିଛନ୍ତି।
ପ୍ରଶାନ୍ତ ପଦାଧିକାରୀମାନଙ୍କୁ ଉଦବୋଧନ ଦେଇ କହିଥିଲେ ଆପଣମାନେ ମୋତେ ଏଠାକୁ ଭେଟିବାକୁ ଆସିନାହାନ୍ତି। କାରଣ ମୁଁ ଆପଣମାନଙ୍କୁ ଆପଣଙ୍କ ନିଜ ନିଜ ଗାଁରେ ଭେଟି ସାରିଛି। ଗାନ୍ଧୀ ଜୟନ୍ତୀ ଅବସରରେ ରାଜ୍ୟର ପ୍ରାୟ ୧ କୋଟି ସଦସ୍ୟ ଦଳର ମୂଳଦୁଆ ପକାଇବେ। ସେ ଦଳର ନେତୃତ୍ଵ ନେବେ ନାହିଁ। କିନ୍ତୁ ନେତାମାନେ ନିଜ ନିଜ ନିର୍ବାଚନମଣ୍ଡଳୀରୁ ଚୟନ ହେବେ। ଯେଉଁମାନେ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ଲୋକଙ୍କ ଶକ୍ତିକୁ ମଜଭୁତ କରିବେ।
