ମଙ୍ଗଳପୁର ପେଟ୍ରୋଲ ପମ୍ପ ନିକଟରେ ଅଗ୍ନିକାଣ୍ଡ : ବିପଦରୁ ଅଳ୍ପକେ ବର୍ତ୍ତିଲା ପେଟ୍ରୋଲ ପମ୍ପ

ପିପିଲି : ଭୁବନେଶ୍ୱର-ପୁରୀ ଜାତୀୟ ରାଜପଥ କଡରେ ମଙ୍ଗଳପୁର ନିକଟରେ ଥିବା ପେଟ୍ରୋଲ ପମ୍ପ ନିକଟରେ ଶନିବାର ସନ୍ଧ୍ୟାରେ ଅଗ୍ନିକାଣ୍ଡ ଘଟିଥିବା ବେଳେ ଏକ ବଡ ବିପଦରୁ ଉକ୍ତ ପେଟ୍ରୋଲ ପମ୍ପ ବର୍ତ୍ତି ଯାଇଥିବା ସୂଚନା ମିଳିଛି। ପେଟ୍ରୋଲ ପମ୍ପ ଠାରୁ ମାତ୍ର ଶହେ ମିଟର ଦୂରରେ ବେଣାଗଛ ଭର୍ତ୍ତି ହୋଇଥିବା ଏକ ଜମିରେ ହଠାତ ଅଗ୍ନିକାଣ୍ଡ ଘଟିଥିଲା। ପବନ ବୋହୁଥିବାରୁ ଉକ୍ତ ନିଆଁ ପେଟ୍ରୋଲ ପମ୍ପ ଆଡକୁ ଦୃତ ଗତିରେ ବ୍ୟାପିଥିଲା। ତେବେ ଖବର ପାଇ ପିପିଲି ଅଗ୍ନିଶମ ବାହିନୀ ଦୁଇଟିି ଦମକଳ ସହ ତୁରନ୍ତ ଘଟଣା ସ୍ଥଳରେ ପହଞ୍ଚିଥିଲେ। ଦୀର୍ଘ ଏକ ଘଣ୍ଟାକାଳ ଅକ୍ଳାନ୍ତ ପରିଶ୍ରମ କରି ନିଆଁକୁ ଆୟତ୍ତ କରିବାରେ ଅଗ୍ନିଶମ ବାହିନୀ ସଫଳ ହୋଇଥିଲା। ଫଳରେ ଏକ ନିଶ୍ଚିତ ବଡ ଦୁର୍ଘଟଣାରୁ ଉକ୍ତ ପେଟ୍ରୋଲ ଟାଙ୍କି ବର୍ତ୍ତି ଯାଇଥିବା ସୂଚନା ମିଳିଛି। କୌଣସି ବ୍ୟକ୍ତି ଉକ୍ତ ଶୁଖିଲା ବେଣାଗଛରେ ନିଆଁ ଲଗାଇ ଦେବାରୁ ନିଆଁ ସମଗ୍ର ଅଞ୍ଚଳକୁ ବ୍ୟାପିଥିବା ବେଳେ ଲୋକେ ଆତଙ୍କିତ ହୋଇ ପଡିଥିଲେ। ତେବେ ପେଟ୍ରୋଲ ପମ୍ପ ନିକଟରେ ଥିବା ଅନାବନା ଶୁଖିଲା ଗଛ ପ୍ରତି ସର୍ବଦା ସତର୍କ ରହିବା ଉଚିତ୍‍ ବୋଲି ପିପିଲି ଅଗ୍ନିଶମ ଅଧିକାରୀ ଅଜିତ ଗୌଡ ପ୍ରକାଶ କରିଛନ୍ତି।