ପାଟଣା: ଅପରାହ୍ନ ୪ଟା ପରେ ଘରୁ ଗୋଡ କାଢିବାକୁ ଜାଡ ମନା କରୁଛି । ସକାଳ ୮ ଟା ଯାଏ ସମାନ ଅବସ୍ଥା ଲାଗିରହୁଛି। ପ୍ରବଳ ଶୀତରେ ଥରୁଛି ସାରା ଅଞ୍ଚଳ। ପାଟଣା, ସାହାରପଡା, ଘଟଗାଁ ବ୍ଲକ ଅଂଚଳରେ ତିନି ଦିନ ହେଲା ଶୀତ ସାଧାରଣ ଜନଜୀବନକୁ ଅସ୍ତବ୍ୟସ୍ତ କରି ପକାଉଛି। ଗତକାଲି ରାଜ୍ୟର ଦାରିଙ୍ଗିବାଡି ସର୍ବନିମ୍ନ ତାପମାତ୍ରା ୩.୫ ଥିବାବେଳେ ଫୁଲବାଣୀରେ ୪.୦ ରହିଥିଲା। କେନ୍ଦୁଝର ଜିଲ୍ଲାରେ ତାପମାତ୍ରା ୬.୨ ରହିଥିବା ଭୁବନେଶ୍ୱର ପାଣିପାଗ କେନ୍ଦ୍ର ସୂଚନା ଦେଇଥିଲା। ପ୍ରବଳ ଥଣ୍ଡାରେ ଲୋକେ ବାହାରକୁ ଯିବା କଷ୍ଟକର ହୋଇପଡିଥିବା ବେଳେ ବଣଜଙ୍ଗଲ ଘେରା ଗ୍ରାମ ଓ ପଡା ଗ୍ରାମରେ ଅଧିକ ଥଣ୍ଡା ହେଉଥିବା ଲୋକମାନେ ଅନୁଭବ କରୁଛନ୍ତି।
ସାଧାରଣ ଶୀତବସ୍ତ୍ର ଶୀତକୁ ଅଟକାଇ ପାରୁନାହିଁ । ଗ୍ରାମାଂଚଳରେ ସକାଳ ଓ ସନ୍ଧ୍ୟାରେ ନିଆଁ ଜାଳି ଲୋକେ ସେକି ହେଉଥିବା ଦେଖିବାକୁ ମିଳୁଛି। ପେଟ ପାଟଣା ପାଇଁ ବାଧ୍ୟ ହୋଇ ଶ୍ରମଜୀବି, ଫେରିବାଲା, ବ୍ୟବସାୟୀ ବିଭିନ୍ନ କାମଧନ୍ଦା ଥିବା ଲୋକେ ବିଛଣା ଛାଡିବାକୁ ବାଧ୍ୟ ହେଉଥିବା ବେଳେ ସକାଳୁଆ ବସରେ ଆଙ୍ଗୁଠି ଗଣତି ଯାତ୍ରୀଙ୍କୁ ଦେଖିବାକୁ ମିଳୁନାହିଁ । ଶୀତ ଯୋଗୁଁ ବାହାରେ ଦିନ କାଟୁଥିବା କେତେକ ମାନସିକ ବିକୃତ ବିଶେଷ ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି।
