ପଦ୍ମପୁର : ରାୟଗଡା ଜିଲ୍ଲା ପଦ୍ମପୁର ସହରରେ ଏକ ଅଭାବନୀୟ ଘଟଣା ଘଟିଛି। ଶୁକ୍ରବାର ସକାଳେ ଦେହରେ ନିଆଁ ଲାଗି ଜଣେ ମହିଳା ଗୁରୁତର ହୋଇଛନ୍ତି। ଗୁରୁତର ଅବସ୍ଥାରେ ମହିଳା ରଶ୍ମିତା ପାଣିଗ୍ରାହୀଙ୍କୁ ପଦ୍ମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପ୍ରାଥମିକ ଚିକିତ୍ସା ପାଇଁ ନେଇଥିଲେ। ଡାକ୍ତର ରଶ୍ମିତାଙ୍କ ପ୍ରାଥମିକ ଚିକିତ୍ସା ପରେ ବ୍ରହ୍ମପୁର ଏମକେସିଜି ମେଡିକାଲକୁ ସ୍ଥାନାନ୍ତରିତ କରିଛନ୍ତି।
ସେପଟେ ପୋଡିଯାଇଥିବା ରଶ୍ମିତାଙ୍କର ବାପା ଓ ମାଆ ପଦ୍ମପୁର ଥାନାରେ ଝିଅକୁ କିରୋସିନ ଢାଳି ପୋଡ଼ି ମାରିବାକୁ ଉଦ୍ୟମ କରାଯାଇଥିବା ପଦ୍ମପୁର ଥାନାରେ ଲିଖିତ ଅଭିଯୋଗ କରିଛନ୍ତି। ପୀଡ଼ିତାଙ୍କ ବାପାଙ୍କ କହିବା ଅନୁଯାୟୀ, ଆଜକୁ ତିନି ବର୍ଷ ହେଲା ଝିଅ, ଜ୍ବାଇଁଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା। ଆଜି ସକାଳେ ସ୍ୱାମୀଙ୍କ ଘରେ ପହଞ୍ଚୁ ପହଞ୍ଚୁ କଳହ ସୃଷ୍ଟି ହୋଇଥିଲା । କଳହ ପରେ ମୋ ଝିଅକୁ ସ୍ୱାମୀ ରାମଚନ୍ଦ୍ର ପାଢ଼ୀ କିରୋସିନି ଢାଳି ନିଆଁ ଲଗାଇ ଦେଇଥିଲେ ବୋଲି ଅଭିଯୋଗ କରିଛନ୍ତି। ଏ ନେଇ ଥାନାରେ ମାମଲା ରୁଜୁ ହୋଇଛି । ଘଟଣା ସ୍ଥଳରେ ଗୁଣପୁର ଏସଡିପିଓ ବିକାଶ ରଞ୍ଜନ ବେଉରା, ପଦ୍ମପୁର ଥାନା ଅଧିକାରୀ ରାଜେଶ ବଳିଆରସିଂ, ଏସଆଇ ପ୍ରଜ୍ଞା ନାୟକ, କନେଷ୍ଟବଳ, ରାୟଗଡା ଜିଲ୍ଲାର ସାଇଣ୍ଟିଫିକ ଟିମ ଆସି ତଦନ୍ତ କରିଛନ୍ତି। ନିଆଁ କିପରି ଲାଗିଲା କେମିତି ଲାଗିଲା ତାହାର ତନାଘନା ତଦନ୍ତ ଆରମ୍ଭ କରିବା ସହ ସ୍ୱାମୀ ଓ ଦେଢଶୁରକୁ ଥାନାକୁ ଆଣି ପଚରା ଉଚରା କରୁଛି ପଦ୍ମପୁର ପୁଲିସ।
