ଗୁଣପୁର: ନିର୍ମାଣ ପରଠାରୁ ଅଚଳ ରହିଛି ରୋଗୀଙ୍କ ନିମନ୍ତେ ଉଦିଷ୍ଟ ଅମ୍ଲଜାନ କାରଖାନା। ଗୁରୁତର ରୋଗୀଙ୍କୁ ଅମ୍ଳଜାନ ଯୋଗାଇବା ଲକ୍ଷ୍ୟରେ ଗୁଣପୁର ଉପଖଣ୍ଡ ଡାକ୍ତରଖାନା ପରିସରରେ ଅମ୍ଳଜାନ କାରଖାନା ସ୍ଥାପନ କରାଯାଇଥିଲା। ଯନ୍ତ୍ରାଂଶ ସ୍ଥାପନ ସହ ପାଇପ୍ ଲାଇe ନିର୍ମାଣ ସରିଥିଲେ ମଧ୍ୟ ଏହା କାର୍ଯ୍ୟକ୍ଷମ ହୋଇପାରୁନି। ଆନ୍ଧ୍ର -ଓଡ଼ିଶା ସୀମାନ୍ତ ରାୟଗଡା ଜିଲାର ଗୁଣପୁର ଉପଖଣ୍ଡ ଡାକ୍ତରଖାନା ଉପରେ ଶହଶହ ରୋଗୀ ନିର୍ଭରଶୀଳ। ଜିଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗର ଆନ୍ତରିକତା ଅଭାବରୁ ଏହି କାରଖାନା କାର୍ଯ୍ୟକ୍ଷମ ହୋଇ ପାରି ନାହିଁ। ଗୁଣପୁର ବ୍ଲକର ଗୁରୁତ୍ବକୁ ଉପଲବ୍ଧ କରି ରାଜ୍ୟ ସରକାର ୨୦୦୨ ମସିହାରେ ଏହି ଚିକିତ୍ସାଳୟଳକୁ ଉପଖଣ୍ଡ ଚିକିତ୍ସାଳୟର ମାନ୍ୟତା ପ୍ରଦାନ କରିଥିଲେ। ଏହା ଉପରେ ୫ ଗୋଟି ବ୍ଲକ ଓ ଆନ୍ଧ୍ର-ଓଡ଼ିଶା ସୀମାନ୍ତ ଅଞ୍ଚଳବାସୀ ନିର୍ଭରଶୀଳ।
କୋଭିଡ ସମୟରେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ଉପଖଣ୍ଡ ଚିକିତ୍ସାଳୟ ପରିସରରେ ଆବଶ୍ୟକୀୟ ସ୍ବାସ୍ଥ୍ୟ ସେବା ଯୋଗାଇଦେବା ପାଇଁ ଅମ୍ଳଜାନ କାରଖାନା ସ୍ଥାପନ କରାଯାଇଥିଲା। ପି. ଏମ. କେର ଫଣ୍ଡ ଯୋଗେ ସ୍ଥାପିତ ହୋଇଥିବା ୪୫୦ ଏଲପିଏମ୍. କ୍ଷମତା ବିଶିଷ୍ଟ ଏହି କାରଖାନାକୁ ଆଭାସୀରେ ଶୁଭାରମ୍ଭ କରାଯାଇଥିଲା। ହିନ୍ଦୁସ୍ଥାନ ପେଟ୍ରୋଲିୟମ କର୍ପୋରେସେନ ଏହାର ନିର୍ମାଣ ଦାୟିତ୍ବ ନେଇଥିଲା। ବିଭିନ୍ନ ୱାର୍ଡରେ ଥିବା ରୋଗୀଙ୍କୁ ଅମ୍ଲଜାନ ଯୋଗାଇବା ପାଇଁ ପାଇପ ଲାଇନ ବିଛା କାମ ମଧ୍ୟ ସରି ଯାଇଛି। ହେଲେ କାରଖାନା କାର୍ଯ୍ୟକ୍ଷମ ହୋଇନଥିବାରୁ ରୋଗୀଙ୍କୁ ମାନୁଆଲ ମେସିନ ସହାୟତାରେ ଅମ୍ଳଜାନ ଯୋଗାଇ ଦିଆଯାଉଛି।
ଦୀର୍ଘବର୍ଷ ଧରି ଏହି କାରଖାନା ଅଚଳ ରହିଥିବାରୁ ଲକ୍ଷଲକ୍ଷ ଟଙ୍କା ବ୍ୟୟରେ ନିର୍ମିତ ଏହି କାରଖାନା ଏବେ ଖତ ଖାଉଛି। ଏହି କାରଖାନା ଅଚଳ ହୋଇଥିବା ସମ୍ପର୍କରେ ଅବଗତ ଅଛନ୍ତି ବୋଲି କହିଛନ୍ତି ଜିଲା ମୁଖ୍ୟ ଚିକିତ୍ସା ଅଧିକାରୀ। ନିର୍ମାଣ ହେବା ଦିନଠୁ ଯାନ୍ତ୍ରିକ ତ୍ରୁଟି ଦେଖାଦେଇଛି। ଆନ୍ଧ୍ରର ଏକ ଠିକା ସଂସ୍ଥା ଏହା ନିର୍ମାଣ କରିଥିଲା। ସେହି ସଂସ୍ଥା ଆଉ ଧରାଛୁଅଁା ଦେଉନି। ଏହାର ମରାମତି ପାଇଁ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଛି ବୋଲି ଜିଲା ମୁଖ୍ୟ ଚିକିତ୍ସାଧିକାରୀ କହିଛନ୍ତି।
