ଭୁବନେଶ୍ବର: ରାଜ୍ୟରେ ପ୍ରତିବର୍ଷ ୧୧ଟି ବର୍ଗରେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର ପ୍ରଦାନ କରାଯାଇଥାଏ। ମାତ୍ର ଗତ ୫ବର୍ଷ ହେବ ଏହି ପୁରସ୍କାର ପ୍ରଦାନ କରାଯାଇନାହିଁ। ଯାହାକୁ ନେଇ ଅନେକ ସାହିତ୍ୟିକ ଏକାଡେମୀର ଭୂମିକାକୁ ନେଇ ପ୍ରଶ୍ନ କରିଛନ୍ତି।
ସୂଚନା ଅନୁଯାୟୀ, ୨୦୧୭ରୁ ଏଯାବତ୍ ମିଳିନାହିଁ ଓଡ଼ିଶା ସାହିତ୍ୟ ଏକାେଡମୀ ପୁରସ୍କର। ୧୧ ବର୍ଗରେ ଯଥା- ଗଳ୍ପ, କବିତା, ଏକାଙ୍କିକା, ଉପନ୍ୟାସ, ଐତିହାସିକ ଗବେଷଣା, ଗୀତିକବିତା, ନାଟକ, ପ୍ରବନ୍ଧ ସମାଲୋଚନା, ଜୀବନୀ ଭ୍ରମଣ, ଅନୁବାଦ, ଶିଶୁ ସାହିତ୍ୟ, ବିଜ୍ଞାନ ସାହିତ୍ୟ କ୍ଷେତ୍ର ପ୍ରଭୃତିରେ ଏହି ପୁରସ୍କାର ପ୍ରଦାନ କରାଯାଇଥାଏ। ପ୍ରଥମେ ଅାବେଦନ କରାଯାଇଥିବା ପୁସ୍ତକକୁ ଯାଞ୍ଚ କରି ପୁରସ୍କାର ନିମନ୍ତେ ମନୋନୟନ କରାଯାଇଥାଏ। ହେଲେ ପାଞ୍ଚ ବର୍ଷ ହେବ ପୁରସ୍କାର ପ୍ରଦାନ ଉତ୍ସବ ବନ୍ଦ ରହିଛି। ୨୦୧୭-୧୮ ପାଇଁ ପୁସ୍ତକ ଯାଞ୍ଚ ପ୍ରକ୍ରିୟା ଶେଷ ହୋଇଥିବାବେଳେ ୨୦୧୮ରୁ ୨୦୨୧ ପର୍ଯ୍ୟନ୍ତ ବିଭିନ୍ନ ପୁସ୍ତକର ଯାଞ୍ଚ ପ୍ରକ୍ରିୟା ଆରମ୍ଭ ହେବ। ତେବେ ଏସବୁ ପ୍ରକ୍ରିୟା ପାଇଁ ବରିଷ୍ଠ ସାହିତ୍ୟିକଙ୍କୁ ନେଇ ଏକ ଜୁରି କମିଟି ଗଠନ କରାଯାଇଥାଏ।
ଏହି କମିଟିକୁ ମନୋନାୟନ କରନ୍ତି କାର୍ଯ୍ୟକାରୀ ପରିଷଦ। ଏହାପରେ କମିଟି ପୁରସ୍କାର ନିମନ୍ତେ ଆସିଥିବା ପୁସ୍ତକକୁ ତଦାରଖ କରନ୍ତି। ଶେଷରେ ପୁରସ୍କାର ନିମନ୍ତେ ଆଉ ଏକ ୧୫ ଜଣିଆ କମିଟି ଗଠନ କରାଯାଇଥାଏ ଯାହାକୁ ଏକାଡେମୀ ସଭାପତି ମନୋନୟନ କରନ୍ତି। ଏହି ୧୫ ଜଣଙ୍କୁ ପୂର୍ବରୁ ରହିଥିବା ୨୫ ଜଣିଆ କମିଟିରୁ ସ୍ଥିର କରାଯାଇଥାଏ। ଏହି କମିଟି ପୁରସ୍କାର ଉପରେ ମୋହର ଲଗାନ୍ତି। ଯାହାକି ଅନୁମୋଦିତ ହୋଇଥାଏ। ତେବେ ପ୍ରତିବର୍ଷ ମାର୍ଚ୍ଚ ସୁଦ୍ଧା ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ସମସ୍ତ ପୁରସ୍କାର ଦିଆଯିବାକୁ ନିଷ୍ପତ୍ତି ହୋଇଥିବାବେଳେ କରୋନା ଯୋଗୁଁ ପ୍ରଭାବିତ ହୋଇଥିଲା। ମାତ୍ର ସାହିତ୍ୟିକଙ୍କ ମତରେ ୨୦୧୭ରୁ ୨୦୧୯ ମଧ୍ୟରେ କରୋନା ନଥିଲା ତେବେ ଏକାଡେମୀ ପକ୍ଷରୁ ପୁରସ୍କାର କାହିଁକି ପ୍ରଦାନ କରାଗଲାନାହିଁ। ଏକାଡେମୀରେ ଅନ୍ୟସବୁ ପୁରସ୍କାର ପ୍ରଦାନ କରାଯାଉଥିବା ବେଳେ ଏହି ପୁରସ୍କାରକୁ କର୍ତ୍ତୃପକ୍ଷ ଉପେକ୍ଷା କରୁଥିବା ବାରି ହୋଇପଡୁଛି।
ଏକାଡେମୀର ସଭାପତି ଡ. ହୃଷୀକେଶ ମଲ୍ଲିକ କହିଛନ୍ତି, କେତେକ ବୈଷୟିକ କାରଣ ଯୋଗୁଁ ପୁରସ୍କାର ଅଟକି ରହିଥିଲା। ଏସବୁର ତର୍ଜମା କରାଯାଇ ଯାଞ୍ଚ ଜାରି ରହିଛି। ଖୁବ୍ଶୀଘ୍ର ଏଦିଗରେ ପଦକ୍ଷେପ ଗ୍ରହଣ କରାଯିବ।
