ଫସଲ ବଞ୍ଚାଇବାକୁ ବିଦ୍ୟୁତ ସଂଯୋଗ ପ୍ରଦାନ ଦାବି

ସମ୍ବଲପୁର: ସମ୍ବଲପୁର ଜିଲାର ସାଲେଟିକ୍ରା ଅଞ୍ଚଳବାସୀ ମାନେ ସେମାନେ କରିଥିବା ଫସଲ ବଞ୍ଚାଇବା ପାଇଁ ବିଦ୍ୟୁତ ସଂଯୋଗ ପ୍ରଦାନ ପାଇଁ ଜିଲାପାଳଙ୍କ ନିକଟରେ ସୋମବାର ଦାବି କରିଛନ୍ତି। ପ୍ରଦତ୍ତ ଦାବିପତ୍ର ଅନୂଯାୟୀ, କିଛି ଦିନ ପୁର୍ବରୁ ସାଲେଟିକ୍ରା ଅଞ୍ଚଳରେ ଚାଷ ଜମିରେ ଉଠା ଜଳସେଚନ ପାଇଁ ଉଦ୍ଦିଷ୍ଟ ଥିବା ବିଦ୍ୟୁତ ଖୁଣ୍ଟରୁ ବିଦ୍ୟୁତ ତାର ଚୋରି ହେବା ପରେ ଏ ପର୍ଯ୍ୟନ୍ତ ବିଦ୍ୟୁତ ତାର ଲଗାଯାଇ ନାହିଁ। ଏଣୁ ବିନା ବିଦ୍ୟୁତରେ ଚାଷ କାର୍ଯ୍ୟ ହୋଇ ପାରୁ ନାହିଁ। ଫଳରେ ପାଣି ଅଭାବରୁ ଫସଲକୁ ବଞ୍ଚାଇବା ପାଇଁ ବିଦ୍ୟୁତ ଖୁଣ୍ଟରେ ତାର ଲଗାଇ ବିଦ୍ୟୁତ ପ୍ରଦାନ ପାଇଁ ଅଞ୍ଚଳବାସୀ ଦାବି କରୁଛନ୍ତି। ଦାବିପତ୍ରରେ ଗୋପାଳ ରାଉତ, ସହଦେବ ନାଗ, କରୁଣା ନାଏକ, ଅନୀଲ ମୁଣ୍ଡା, ସଞ୍ଜୟ ପଟେଲ, ତନ୍ମୟ ରୋହିଦାସ, ସୁଜିତ ନାଏକ, କୀର୍ତ୍ତନ କିଷାନ, ଯୁଗଳ ମୁଣ୍ଡା, ବିନୋଦ କିଷାନ, ଗଗନ ପ୍ରଧାନ, କୈଳାଶ ପ୍ରଧାନଙ୍କ ସମେତ ଅନେକ ଅଞ୍ଚଳବାସୀଙ୍କ ଦସ୍ତଖତ ରହିଛି।