ସମ୍ବଲପୁର: ଓଡିଆ ଚଳଚ୍ଚିତ୍ର ଜଗତର ଖ୍ୟାତନାମା ଅଭିନେତା ଉତ୍ତମ ମହାନ୍ତିଙ୍କ ବିୟୋଗରେ ସମ୍ବଲପୁରର ଥିଏଟର ଲିଜେଣ୍ଟଓ ପକ୍ଷରୁ ଏକ ଶୋକସଭା ସୋମବାର ଆୟୋଜିତ ହୋଇଯାଇଛି। ସୁର୍ଯ୍ୟ ପାଣିଗ୍ରାହୀଙ୍କ ଅଧ୍ୟକ୍ଷତାରେ ସ୍ଥାନୀୟ ହାୱା ମୈଦାନ ଠାରେ ଆୟୋଜିତ ଶୋକସଭାରେ ବର୍ଷିୟାନ ଓଲିଉଡ ଅଭିନେତା ଉତ୍ତମ ମହାନ୍ତିଙ୍କ ଶୋକସଭାରେ ତାଙ୍କର ସ୍ମୃତିଚାରଣ କରାଯାଇଥିଲା। ଏଥିରେ ଅଭିନେତା, ନାଟ୍ୟକାର ଓ ନିର୍ଦ୍ଦେଶକ ବବଲୁ ବାଗ, ସନ୍ତୋଷ ମିଶ୍ର, ଦିଲୀପ ଦେବ ଓ ବିରୁପାକ୍ଷ ପ୍ରଧାନ ପ୍ରମୁଖ ଯୋଗ ଦେଇ ଶୋକବ୍ୟକ୍ତ କରିଥିଲେ। ବକ୍ତା ମାନେ କହିଥିଲେ ଯେ, ଯେଉଁ ସମୟରେ ଓଡିଆ ଚଳଚ୍ଚିତ୍ର ବହୁ ଲୋକପ୍ରିୟତାର ଶିଖରରେ ଥିଲା, ସେଇ ସମୟରେ ହିଁ ଉତ୍ତମ ମହାନ୍ତିଙ୍କ ଅଭ୍ୟୁଦୟ ହୋଇଥିଲା। ତାଙ୍କର ଅଭିନୀତ ଚଳଚ୍ଚିତ୍ର ଗୁଡିକ ଲଗାତାର ସଫଳ ହୋଇଥିଲା। ତାଙ୍କର ବିୟୋଗରେ ଆଜି ସାରା ଓଡ଼ିଶାରେ ଚଳଚ୍ଚିତ୍ର ପ୍ରେମୀ ମାନେ ଦୁଃଖିତ ଓ ଭାବବିହ୍ୱଳିତ। ଦିବଙ୍ଗତ ଉତ୍ତମ ମହାନ୍ତିଙ୍କ ଅମର ଆତ୍ମାର ସଦଗତି କାମନା କରାଯାଇ ୨ ମିନିଟର ନୀରବ ପ୍ରାର୍ଥନା କରାଯାଇଥିଲା। ଅନ୍ୟ ମାନଙ୍କ ମଧ୍ୟରେ ବିଶ୍ୱନାଥ ଶତପଥି, ସ୍ୱାଧିନ ପଣ୍ଡା, ରାହୁଲ ଗୁପ୍ତା, ଚୈତନ୍ୟ ନାୟକ, ଜଗଦୀଶ ମହାପାତ୍ର ଶୁଭେନ୍ଦ୍ର ନନ୍ଦ, ଧର୍ମେନ୍ଦ୍ର ପଟ୍ଟନାୟକ ପ୍ରମୁଖ ଉପସ୍ଥିତ ରହିଥିଲେ।
Comments are closed.