ନୂତନ ୧୧କେଭି ଲାଇନ୍‌‌ରେ ଆରମ୍ଭ ହେଲା ବିଦ୍ୟୁତ୍‌‌ ଯୋଗାଣ

ପିପିଲି: ପିପିଲି ପୌରାଞ୍ଚଳର ୯ଟି ୱାର୍ଡର ବାସିନ୍ଦାଙ୍କ ଦୀର୍ଘ ୬୦ବର୍ଷର ୧୧କେଭି ବିଦ୍ୟୁତ୍‌‌ ସମସ୍ୟା ଦୂର ହେବାକୁ ଯାଉଛି। ଗହିର ବିଲ, ନୟନଜୋରୀ ଓ ଘଞ୍ଚ ଜଙ୍ଗଲିଆ ଅଞ୍ଚଳ ଦେଇ ଯାଇଥିବା ପୁରୁଣା ୧୧କେଭି ଲାଇନ୍‌‌ ବଦଳରେ ଏବେ ମୁଖ୍ୟ ରାସ୍ତା କଡରେ ନୂତନ ୧୧କେଭି ଲାଇନ୍‌‌ ଯୋଗେ ବିଦ୍ୟୁତ୍‌‌ ଯୋଗାଣ ଆରମ୍ଭ ହୋଇଛି। ଏହା ଦ୍ୱାରା ପୌରାଞ୍ଚଳର ଅଧିକାଂଶ ସରକାରୀ କାର୍ଯ୍ୟାଳୟ, ବ୍ୟବସାୟ ପ୍ରତିଷ୍ଠାନ, ବ୍ୟାଙ୍କ, କୋର୍ଟ ସମେତ ୫ହଜାରରୁ ଊର୍ଦ୍ଧ୍ବ ଉପଭୋକ୍ତା ଉପକୃତ ହେବେ।

ପୌରାଞ୍ଚଳର ପଣ୍ଡାବଜାର ସ୍ଥିତ ୩୩/୧୧ କେଭି ପିପିଲି ପିଏସ୍‌‌ଏସ୍‌‌ (ପ୍ରାଇମେରୀ ସବ୍‌‌ ଷ୍ଟେସନ)ରୁ ପିପିଲି ଏନ୍‌‌ଏସିର ମୁଖ୍ୟବଜାର ଓ ୭ଟି ୱାର୍ଡ ସମେତ ଭାରତୀପୁର ପଞ୍ଚାୟତକୁ ଗୋଟିଏ ୧୧କେଭି ଫିଡର ଯାଇଥିବା ବେଳେ ପୌରାଞ୍ଚଳର ୯ଟି ୱାର୍ଡକୁ ଅନ୍ୟ ଗୋଟିଏ ୧୧କେଭି ଫିଡର ଯାଇଛି। ପଣ୍ଡାବଜାର ଠାରୁ ହସନପୁର, ଟିଚର୍ସ କଲୋନୀ, ମଢିଆଳିସାହି, ଭରସାପୁର ଓ ଇନ୍ଦିରା ମଇଦାନ ଦେଇ ଦୀର୍ଘ ସାଢେ ୩କିଲୋମିଟର ଅତିକ୍ରମ କରି ପିପିଲି ବ୍ଲକଛକ ପର୍ଯ୍ୟନ୍ତ ମଙ୍ଗଳପୁର-୧ ନାମରେ ୧୧କେଭି ଫିଡର ଆସିଛି। ବ୍ଲକ ଛକ ଠାରୁ ମେଡିକାଲ ଛକ ଓ ଖଣ୍ଡିଆଗିରି ପର୍ଯ୍ୟନ୍ତ ଏବଂ ନୀଳକଣ୍ଠନଗର କେନାଲବନ୍ଧ ଦେଇ ଏହି ୧୧କେଭି ଲାଇନ୍‌‌ ପିପିଲି କଲେଜ ଛକ ପର୍ଯ୍ୟନ୍ତ ଆସି ସେଠାରୁ ପୁନଶ୍ଚ ହାଟଛକ ଦେଇ ଥାନା, ପଶୁଡାକ୍ତରଖାନା, ଜଳସଂପଦ ବିଭାଗ କାର୍ଯ୍ୟାଳୟ ପର୍ଯ୍ୟନ୍ତ ଯାଇଛି। ଏହି ୧୧କେଭି ବିଦ୍ୟୁତ୍‌‌ ଲାଇନ ଉପରେ ପୌରାଞ୍ଚଳର ୯ଟି ୱାର୍ଡ ନିର୍ଭର କରେ। ପିପିଲି ଥାନା, ପିପିଲି କୋର୍ଟ, ପୋଷ୍ଟ ଅଫିସ, ପିପିଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର, ପଶୁ ଚିକିତ୍ସାଳୟ, ପୌର ପରିଷଦ କାର୍ଯ୍ୟାଳୟ, ବ୍ଲକ ଅଫିସ, ତହସିଲ ଅଫିସ, ସବ୍‌‌-ରେଜିଷ୍ଟ୍ରାରଙ୍କ କାର୍ଯ୍ୟାଳୟ, ଜଳସଂପଦ ବିଭାଗ କାର୍ଯ୍ୟାଳୟ, ପୁଲିସ ଏସ୍‌‌ଡିପିଓ କାର୍ଯ୍ୟାଳୟ, ସିଡିପିଓ ଅଫିସ, ପୂର୍ତ୍ତ ବିଭାଗ କାର୍ଯ୍ୟାଳୟ, ଆର୍‌‌ଡବ୍ଲୁଏସ୍‌‌ଏସ୍‌‌ କାର୍ଯ୍ୟାଳୟ, ପିଏଚ୍‌‌ଡି କାର୍ଯ୍ୟାଳୟ, ଟେଲିଫୋନ୍‌‌ ଏକ୍ସଚେଞ୍ଜ, ଅଗ୍ନିଶମ ବିଭାଗ କାର୍ଯ୍ୟାଳୟ, ଅବକାରୀ ବିଭାଗ କାର୍ଯ୍ୟାଳୟ, ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟ, ସବ୍‌‌ ଟ୍ରେଜେରୀ ଅଫିସ, ୮ଟି ରାଷ୍ଟ୍ରାୟତ ବ୍ୟାଙ୍କ ସମେତ ବହୁ ସରକାରୀ ଓ ବେସରକାରୀ ପ୍ରତିଷ୍ଠାନ, ମହାବିଦ୍ୟାଳୟ, ଅନେକ ବିଦ୍ୟାଳୟ ପ୍ରଭୃତି ଏହି ୧୧କେଭି ବିଦ୍ୟୁତ୍‌‌ ଲାଇନ ଉପରେ ନିର୍ଭର କରିଥାନ୍ତି।

ଏହି ନୂତନ ୧୧କେଭି ଲାଇନ୍‌‌ରେ ଇତିମଧ୍ୟରେ ପିପିଲି ବିଦ୍ୟୁତ୍‌‌ କାର୍ଯ୍ୟାଳୟ ଠାରୁ ଥାନା ପର୍ଯ୍ୟନ୍ତ ବିଦ୍ୟୁତ୍‌‌ ଚାର୍ଜ କରାଯାଇଛି। ଆଉ ୫ଦିନ ମଧ୍ୟରେ ଥାନା ଠାରୁ ମେଡିକାଲ ଛକ, ବ୍ଲକ ଛକ ଦେଇ ଖଣ୍ଡିଆଗିରି ପର୍ଯ୍ୟନ୍ତ ଏହି ନୂତନ ୧୧କେଭି ଲାଇନ୍‌‌ରେ ବିଦ୍ୟୁତ୍‌‌ ଚାର୍ଜ କରାଯିବ ବୋଲି ଟିପିସିଓଡିଏଲ୍‌‌ ଟିମ୍‌‌ ଲିଡ୍‌‌ ପ୍ରୋଜେକ୍ଟ ମୁଖ୍ୟ ଜିତେନ କୁମାର ମିଶ୍ର ସୂଚନା ଦେଇଛନ୍ତି। ଏହା ଦ୍ୱାରା ପୌରାଞ୍ଚଳର ୯ଟି ୱାର୍ଡର ଉପଭୋକ୍ତାଙ୍କ ସମେତ କୋର୍ଟ, ଥାନା, ଡାକ୍ତରଖାନା ସମେତ ସମସ୍ତ ସରକାରୀ କାର୍ଯ୍ୟାଳୟ, ବ୍ୟାଙ୍କ ଆଦିକୁ ନିରବଚ୍ଛିନ୍ନ ବିଦ୍ୟୁତ୍‌‌ ଯୋଗାଣ ସେବା ସମ୍ଭବ ହେବ ବୋଲି ପିପିଲି ବିଦ୍ୟୁତ୍‌‌ ଉପଖଣ୍ଡ ଅଧିକାରୀ ବିପିନ କୁମାର ସାହୁ ଓ କନିଷ୍ଠ ଯନ୍ତ୍ରୀ କଲ୍ୟାଣ ସୂତ୍ରଧର ସୂଚନା ଦେଇଛନ୍ତି।