କମ୍ପାନୀ ଅଧିକାରୀଙ୍କୁ ଅପହରଣ ମାମଲାରେ ୭ ଗିରଫ, ୫୦ ଲକ୍ଷ ଟଙ୍କା ଉଦ୍ଧାର

କେନ୍ଦୁଝରଗଡ଼଼: କେନ୍ଦୁଝର ଜିଲାର ବଡବିଲସ୍ଥିତ ଗ୍ରେୱାଲ ମିନେରାଲ ଆଣ୍ଡ ମେଟାଲ କମ୍ପାନୀର ଉପସଭାପତି ନିମାନନ୍ଦ ପ୍ରଧାନଙ୍କୁ କେହି ଦୁର୍ବୁତ୍ତ ଅପହରଣ କରିଥିବା ନେଇ ଶ୍ରୀ ପ୍ରଧାନଙ୍କ ସହଧର୍ମିଣୀ ସୁଜାତା ପ୍ରଧାନ ଏ ନେଇ ବଡବିଲ ଥାନାରେ ଚଳିତମାସ ୧୩ ତାରିଖରେ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ଆରକ୍ଷୀ ଅଧିକ୍ଷକ କେନ୍ଦୁଝରଙ୍କ ନିର୍ଦ୍ଦେଶକ୍ରମେ ଅତିରିକ୍ତ ଆରକ୍ଷୀ ଅଧିକ୍ଷକ ମନୋଜ କୁମାର ରାଉତ ଓ ବଡବିଲ ଥାନା ଅଧିକାରୀ ଅଶୋକ ନାୟଙ୍କ ନେତୃତ୍ୱରେ ଏକ ୧୨ଜଣିଆ ପୁଲିସ ଟିମ୍‌‌ ଗଠନ କରାଯାଇ ଓଡ଼ିଶା, ଝାରଖଣ୍ଡ, ବିହାର ଓ ପଶ୍ଚିମବଙ୍ଗ ରାଜ୍ୟର ବିଭିନ୍ନ ସ୍ଥାନ ମାନଙ୍କରେ ସ୍ଥାନୀୟ ପୁଲିସ ଅଧିକାରୀଙ୍କ ସହାୟତାରେ ଚଢ଼ଉ ଜାରି ରହିଥିଲା। ଅପହୃତ ଶ୍ରୀ ପ୍ରଧାନଙ୍କ କାର ଚାଳକ ମହମ୍ମଦ ଫିରୋଜ ଏହି ଘଟଣାର ମୁଖ୍ୟ ଅଭିଯୁକ୍ତ ଜଣାପଡ଼ିବା ସହ ଅଭିଯୁକ୍ତଙ୍କ ପରିବାରବର୍ଗଙ୍କୁ ଅପହର୍ତ୍ତାଙ୍କ ପକ୍ଷରୁ ୨କୋଟି ଟଙ୍କା ଦାବି କରାଯାଇଥିଲା। ଝାଡ଼ଖଣ୍ଡର ରାଞ୍ଚି ଠାରେ ଦାବି ଅର୍ଥ ତୁରନ୍ତ ପଇଠ ନକଲେ ଅପହର୍ତ୍ତାଙ୍କୁ ହତ୍ୟା କରାଯିବା ନେଇ ମଧ୍ୟ ଅପହରଣକାରୀଙ୍କ ପକ୍ଷରୁ ଧମକ ଦିଆଯାଇଥିଲା। ଏହାପରେ ଅପହୃତଙ୍କ ପରିବାର ପକ୍ଷରୁ ୬୦ଲକ୍ଷ ଟଙ୍କା ପଇଠ ପରେ ଅପହୃତ ଘରକୁ ଫେରିଥିଲେ।

କମ୍ପାନୀ ଅଧିକାରୀଙ୍କୁ ଅପହରଣ ମାମଲାରେ ୭ ଗିରଫ, ୫୦ ଲକ୍ଷ ଟଙ୍କା ଉଦ୍ଧାର pic.twitter.com/n7pqaNz4Sz

— Samaja Live (@samajalive) February 22, 2025

ଏହା ଜଣାପଡ଼ିବା ପରେ ପୁଲିସ ପକ୍ଷରୁ ତତ୍ପରତା ପ୍ରକାଶ ପାଇବା ସହ ବିଭିନ୍ନ ସ୍ଥାନରେ ଚଢ଼ଉ କରି ଶେଷରେ ପୁଲିସ ଏହି ଘଟଣାରେ ସାମିଲ ୭ ଅଭିଯୁକ୍ତଙ୍କୁ ଗିରଫ କରିବା ସହ ସେମାନଘଙ୍କ ଠାରୁ ୫୦ଲକ୍ଷ ୯୦ହଜାର ଟଙ୍କା ମଧ୍ୟ ଉଦ୍ଧାର କରିବାକୁ ସକ୍ଷମ ହୋଇଥିବା ଆରକ୍ଷୀ ଅଧିକ୍ଷକ ନିତିନ କୁଶଲକର ଶନିବାର ଅପରାହ୍ନରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି। ଏଥିସହ ଅପହରଣକାରୀ ଶ୍ରୀ ପ୍ରଧାନଙ୍କ ଡଷ୍ଟର କାର, ଖେଳନା ବନ୍ଧୁକ, ଗୋଟିଏ ବାଇକ୍‌‌, ୮ଟି ମୋବାଇଲକୁ ମଧ୍ୟ ପୁଲିସ ଜବତ କରିବାରେ ସକ୍ଷମ ହୋଇଛି। ଏହି ମାମଲାରେ ବଡବିଲବାସୀନ୍ଦା ତଥା ଅପହରଣକାରୀ ଶ୍ରୀ ପ୍ରଧାନଙ୍କ କାର ଚାଳକ ମହମ୍ମଦ ଫିରୋଜ, ରାଞ୍ଚିର ସର୍ଫରାଜ ଆନସାରୀ, ରାଜେନ୍ଦ୍ର ପାଶ୍ୱାନ, ଜମିଲ ଅଖତାର, ଫାରହା ପରବିନ, ଚକ୍ରଧରପୁରର ସଦାବ ନୌବାହାର ଏବଂ ରାଞ୍ଚି ମେକନ କଲୋନୀରେ ରହୁଥିବା କୋଲକତାର ଭୁଧେନ୍ଦ୍ରନାଥ ସିଂହଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଥିବା ବେଳେ ଗିରଫ ଫାରହା ପରବିନଙ୍କ ଠାରୁ ୫୦ଲକ୍ଷ ୯୦ହଜାର ଟଙ୍କାକୁ ପୁଲିସ ଜବତ କରିବାରେ ସକ୍ଷମ ହୋଇଛି।