ସମାଜ ଡିଜିଟାଲ ଡେସ୍କ: ଗୁଜରାଟର ମେହସାନା ଜିଲା ଅନ୍ତର୍ଗତ ବଡ଼ନଗରରୁ ଏକ ହଜାର ବର୍ଷ ତଳର ମାନବ କଙ୍କାଳ ଉଦ୍ଧାର ହୋଇଛି। ଉତଖନନ ସମୟରେ ମାଟିତଳୁ ଏହି କଙ୍କାଳ ମିଳିଛି। କଙ୍କାଳଟି ଧ୍ୟାନମୁଦ୍ରା ଅବସ୍ଥାରେ ରହିଥିବାରୁ ଏହା କୌଣସି ସାଧୁଙ୍କର ହୋଇଥାଇପାରେ ବୋଲି କୁହାଯାଉଛି। ଡିଏନଏ ପରୀକ୍ଷା କରାଯିବା ପରେ ଏହା ଜଣେ ସାଧୁଙ୍କର ଏବଂ ସେ ଜୀବିତ ଅବସ୍ଥାରେ ଧ୍ୟାନମୁଦ୍ରାରେ ସମାଧି ନେଇଥିବା ଆଶଙ୍କା କରାଯାଉଛି। ଭାରତରେ ପ୍ରଥମ ଥର ଲାଗି ଧ୍ୟାନମୁଦ୍ରାରେ ମାନବ କଙ୍କାଳ ଉଦ୍ଧାର ହୋଇଛି, ଯେଉଁଥିରେ ଐତିହାସିକ ଏବଂ ଧାର୍ମିକ ମହତ୍ଵ ଲୁଚିରହିଥିବା କୁହାଯାଉଛି। କଙ୍କାଳଟିକୁ ବର୍ତ୍ତମାନ ବଡ଼ନଗରରେ ରଖାଯାଇଛି।
ବଡ଼ନଗରରେ କୋଟି କୋଟି ଟଙ୍କା ବ୍ୟୟରେ ଏକ ଅତ୍ୟାଧୁନିକ ସଂଗ୍ରହାଳୟ ନିର୍ମାଣ ହୋଇଛି। କିନ୍ତୁ ସେଠାରେ ଏହି କଙ୍କାଳଟିକୁ ସ୍ଥାନ ମିଳିପାରି ନାହିଁ। ଏ ସମ୍ପର୍କରେ ଗୁଜରାଟ ପ୍ରତ୍ନତତ୍ତ୍ଵ ଏବଂ ସଂଗ୍ରହାଳୟ ବିଭାଗର ନିୟନ୍ତ୍ରକ ଡା. ପଙ୍କଜ ଶର୍ମା ସୂଚନା ଦେଇଛନ୍ତି।
