ବକେୟା ଥିବା ଦୋକାନ ଗୃହ ଗୁଡିକରେ ଝୁଲିଲା ତାଲା

ଫୁଲବାଣୀ: ବକେୟା ରହିଥିବା ଦୋକାନ ଗୃହ ଗୁଡିକରେ ଝୁଲିଲା ତାଲା। ବ୍ଲକ ପ୍ରଶାସନ ଓ ତହସିଲଦାରଙ୍କ ଉପସ୍ଥିତିରେ ଦୋକାନ ଗୃହ ଗୁଡିକୁ ସିଲ୍‌‌ କରିଛନ୍ତି। ଏଭଳି ଦୃଶ୍ୟ ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଫିରିଙ୍ଗିଆ ବଜାରରେ। ବଜାର ମଧ୍ୟରେ ଥିବା ଦଶରୁ ବାରଟି ଦୋକାନ ଗୃହ ଗୁଡିକୁ ବକେୟା ଥିବାରୁ ପ୍ରଶାସନ ତରଫରୁ ସିଲ୍‌‌ କରିଦିଆଯାଇଛି। ସୂଚନା ଅନୁସାରେ ସିଲ୍‌‌ ହୋଇଥିବା ଦୋକାନ ଗୃହ ଗୁଡିକର ଭଡା ଆଗରୁ ବ୍ଲକ ପ୍ରଶାସନ ଆଦାୟ କରୁଥିଲା। କିନ୍ତୁ ସହରର କିଛି ଦୋକାନୀ ବାରମ୍ବାର ବ୍ଲକ ପ୍ରଶାସନର ନୋଟିସ ପରେ ମଧ୍ୟ୍ୟ ବକେୟା ବିଲ ପଇଠ କରୁନଥିଲେ। ଶେଷରେ ବ୍ଲକ ପ୍ରଶାସନ ତହସିଲଦାରଙ୍କୁ ଏହି ବିଷୟରେ ଜଣାଇଥିଲେ। ବକେୟା ଦୋକାନ ଘର ଭଡା ବିଷୟରେ ତହସିଲକୁ ବ୍ଲକ ପ୍ରଶାସନ ଜଣାଇବା ପରେ ତହସିଲ ତରଫରୁ ମଧ୍ୟ୍ୟ ଏହି ଦୋକାନୀ ମାନଙ୍କୁ ନୋଟିସ ଜାରି କରାଯାଇଥିଲା। ତଥାପି ମଧ୍ୟ୍ୟ ଦୋକାନୀ ମାନେ ଦୋକାନ ଗୃହ ଗୁଡିକର ବକେୟା ପଇଠ କରିନଥିଲେ। ଯାହା ଫଳରେ ବାଧ୍ୟ ହୋଇ ଶୁକ୍ରବାର ଗୋଷ୍ଠି ଉନ୍ନୟନ ଅଧିକାରୀ ଅନୁପ ଅଭିଷେକ ବେହେରା ଓ ବ୍ଲକର ଅନ୍ୟାନ୍ୟ କର୍ମଚାରୀ ତହସିଲଦାର ଅନାମିକା ପାଣ୍ଡେ ଓ ତହସିଲ କାର୍ଯ୍ୟାଳୟର ଅନ୍ୟାନ୍ୟ କର୍ମଚାରୀ ସ୍ଥାନୀୟ ପୋଲିସର ଉପସ୍ଥିତିରେ ଦୋକାନ ଗୃହ ଗୁଡିକ ସିଲ୍‌‌ କରିଦେଇଥିବା ଦେଖିବାକୁ ମିଳିଥିଲା। ସେପଟେ ଦୋକାନ ଗୃହ ଗୁଡିକ ସିଲ୍‌‌ ହେବା ପରେ ଦୋକାନୀ ମାନେ ନିଜନିଜର ଜୀବିକା ହରେଇବା ଚିନ୍ତାରେ ଭାଙ୍ଗିପଡ଼ିଥିବା ବେଳେ କାର୍ଯ୍ୟାନୁଷ୍ଠାନ ନେଇ ଅସନ୍ତୋଷ ବ୍ୟକ୍ତ କରିଛନ୍ତି।