ଜାତୀୟ ରାଜପଥରୁ ଚୋରି ବସ ଉଦ୍ଧାର

ଛତ୍ରପୁର: ପ୍ରତିଦିନ ଭଳି ଭଞ୍ଜନଗର ବସଷ୍ଟାଣ୍ଡରେ ରାତିରେ ବହୁ ବସ ରହିଥାଏ। ଗତକାଲି ରାତ୍ରରେ ମା’ ଦୁର୍ଗା ନାମକ ଏକ ଘରୋଇ ବସ ରହିଥିଲା। ଗାଡି ଚାଳକ ଆସି ଦେଖିଲା ବେଳକୁ ବସ ନାହିଁ। ଏନେଇ ମାଲିକ ଏ. ଶ୍ରୀନିବାସ ଜାଣିବା ପରେ ବସ ସଂଘ ଓ ପୋଲିସକୁ ଅବଗତ କରାଇଥିଲେ। ବସଷ୍ଟାଣ୍ଡରେ ଲାଗିଥିବା ସିସିଟିଭିରୁ ବସଟି ରାତ୍ର ୨.୪୦ରୁ କେହି ଜଣେ ଚୋରି କରି ନେଉଥିବା ଜଣାପଡିଥିଲା। ଏପରିକି ବସଟି ବେଲଗୁଣ୍ଠା ରାସ୍ତା ଦେଇ ଯାଉଥିବା ସିସିଟିଭିରୁ ଜଣାପଡିଥିଲା। ବହୁ ଖୋଜି ଥିଲେ ବି ଜଣାପଡିନଥିଲା। ପରେ ଗଞ୍ଜାମ ଥାନା ଅଧିନ ଅଗସ୍ତି ନୂଆଗାଁ ଟାଟା ମୋଟରସରେ ଅନ୍ୟ ଏକ ବସ ମାଲିକ ରାସ୍ତା ନିକଟରେ ବସଟି ରହିଥିବା ଖବର ଦେଇଥିଲେ। ଘଟଣାସ୍ଥଳରେ ଭଞ୍ଜନଗର ପୋଲିସ ଓ ମାଲିକ ପହଁଚି ବସଟିକୁ ଉଦ୍ଧାର କରିଥିଲେ। କିନ୍ତୁ ଚୋର ଜଣକ ଗାଡିରୁ ସବୁ ତେଲ କାଢି ନେଇ ଯାଇଥିବା ବେଳେ ବସଟି ଷ୍ଟାର୍ଟ ହେଉନାହିଁ। ତେଵେ କିଏ ବସଟିକୁ ଭଞ୍ଜନଗରରୁ ଚୋରି କରି ଏଠାକୁ ଆଣିଲା ତାହା ଜଣାପଡ଼ିନାହିଁ। ଭଞ୍ଜନଗର ପୋଲିସ ଘଟଣାର ତଦନ୍ତ କରୁଛି। ବସଟି ଦୈନିକ ଭଞ୍ଜନଗରରୁ ବଦାଙ୍ଗୀ ଯାତାୟତ କରିଥାଏ।