ଆଠଗଡ଼: ପ୍ରଚଣ୍ଡ ଗ୍ରୀଷ୍ମପ୍ରବାହ ସମୟରେ କଟକିଆସାହି ପଞ୍ଚାୟତରେ ୨ଟି ଉଠାସେଚ ପ୍ରକଳ୍ପ ଅଚଳ ହୋଇପଡ଼ିଥିବାରୁ ପ୍ରାୟ ଶହେ ଏକରରୁ ଅଧିକ ଚାଷଜମିରେ କରାଯାଇଥିବା ପରିବା ଫସଲ ଉଜୁଡିଯିବା ଆଶଙ୍କାରେ ଚାଷୀକୂଳ ଚିନ୍ତାରେ ରହିଛନ୍ତି। କଟକିଆସାହି ପଞ୍ଚାୟତବାସୀ ଚାଷବାସ ଉପରେ ନିର୍ଭରଶୀଳ ଏବଂ ବିଶେଷକରି ପରିବା ଫସଲ କରି ସେମାନେ ବର୍ଷ ଯାକର ଗୁଜୁରାଣ ମେଣ୍ଟାଇ ଥାଆନ୍ତି। ସାପୁଆନଦୀରୁ ଉଠା ଜଳସେଚନ ପ୍ରକଳ୍ପ ମାଧ୍ୟମରେ ସେଠାରେ ଥିବା ଚାଷଜମି ଜଳସେଚିତ ହୋଇଥାଏ। ଗତ ୨ଦିନ ପୂର୍ବରୁ ଗୋଟିଏ ପରେ ଗୋଟିଏ ଏହିପରି ୨ଟି ଯାକ ଜଳସେଚନ ପ୍ରକଳ୍ପର ପାଣି ମଟର ଖରାପ ହୋଇଯିବାରୁ ଏବେ ଚାଷୀଙ୍କ ପାଇଁ ଜଳସେଚନ ଏକ ବଡ ସମସ୍ୟା ହୋଇଛି। ଲକ୍ଷ ଲକ୍ଷ ଟଙ୍କା ବ୍ୟୟ କରି ଚାଷୀମାନେ କଲରା, ଜହ୍ନି, ଝୁଡଙ୍ଗ, କାକୁଡି, ବାଇଗଣ, କାଙ୍କଡ, ପୋଟଳ ଓ ମକା ଫସଲ ବିହନ ଲଗାଇଛନ୍ତି। ଏବେ ବିହନ ଚାରା ହୋଇ ଛୋଟ ଛୋଟ ଗଛ ଉଠିଥିବାବେଳେ ଜଳସେଚନ ଅଭାବରୁ ସେଗୁଡିକ ଏହି ପ୍ରଚଣ୍ଡ ଖରାରେ ପୋଡିଜଳି ନଷ୍ଟ ହୋଇଯିବାର ଆଶଙ୍କା ସୃଷ୍ଟି ହୋଇଛି। କଟକିଆସାହିର ମା ମତ୍ସ୍ୟଦେବୀ ୨ନଂ ପାଣି ପଞ୍ଚାୟତ ଓ ପଟୁମାଳ ପାଣି ପଞ୍ଚାୟତ ଅଧିନରେ ଥିବା ୨ଟି ଯାକ ଉଠାଜଳସେଚନ ପ୍ରକଳ୍ପ ଅଚଳ ହୋଇପଡ଼ିଥିବାରୁ ଚାଷୀକୂଳ ଚିନ୍ତାରେ ରହିଥିବାବେଳେ ଆଠଗଡ଼ ଉଠାଜଳସେଚନ ବିଭାଗ ନୀରବଦ୍ରଷ୍ଟା ସାଜିଛି। ଏ ସଂପର୍କରେ ପ୍ରାୟ ୫୦ଜଣ ମହିଳା ଓ ପୁରୁଷ ଚାଷୀ ଶନିବାର ଉପଜିଲ୍ଲାପାଳଙ୍କୁ ସାକ୍ଷାତ କରି ଏହି ସମସ୍ୟାର ସମାଧାନ ପାଇଁ ନିବେଦନ କରିଥିଲେ। ଉପଜିଲ୍ଲାପାଳ ପ୍ରଶାନ୍ତ କୁମାର ତରାଇ କଟକିଆସାହି ଚାଷୀଙ୍କ ସମସ୍ୟା ଜାଣିବା ପରେ ତୁରନ୍ତ ଆଠଗଡ଼ ଉଠାଜଳସେଚନ ବିଭାଗ ସହକାରୀ ଯନ୍ତ୍ରୀ ମନୋରଞ୍ଜନ ମିଶ୍ରଙ୍କୁ ଟେଲିଫୋନ କରି ଅଚଳ ଦୁଇ ପ୍ରକଳ୍ପର ପାଣି ମଟର ଯଥାଶୀଘ୍ର ମରାମତି କରି କାର୍ଯ୍ୟକ୍ଷମ କରାଇବାକୁ ନିର୍ଦ୍ଦେଶ ଦେଇଥିଲେ। ଏ ସଂପର୍କରେ ଆମ ପ୍ରତିନିଧି ଉଠାସେଚ ବିଭାଗ ସହକାରୀ ଯନ୍ତ୍ରୀ ଶ୍ରୀ ମିଶ୍ରଙ୍କ ପ୍ରତିକ୍ରିୟା ପଚାରିବାରୁ ସେ ନିୟମାନୁଯାୟୀ ପାଣି ପଞ୍ଚାୟତ ଚାଷୀଙ୍କଠାରୁ ଜଳକର ଆଦାୟ କରି ବିଦ୍ୟୁତ ଦେୟ ପୈଠ କରିବା ଓ ପମ୍ପ ଆଦି ମରାମତି କରିବା କଥା ବୋଲି କହିଥିଲେ। ତଥାପି ଉପଜିଲ୍ଲାପାଳ ନିର୍ଦ୍ଦେଶ ଦେଇଥିବାରୁ ବିଭାଗ ତରଫରୁ ଅଚଳ ପମ୍ପ ଦୁଇଟିକୁ ୩-୪ ଦିନ ମଧ୍ୟରେ ମରାମତି କରି କାର୍ଯ୍ୟକ୍ଷମ କରିବାକୁ ପଦକ୍ଷେପ ନିଆଯାଉଛି ବୋଲି ଶ୍ରୀ ମିଶ୍ର ପ୍ରକାଶ କରିଥିଲେ।
Comments are closed.