ବାଲିଗୁଡା: ବାଲିଗୁଡାର ଅତିରିକ୍ତ ଜିଲ୍ଲା ଦୌରା କୋର୍ଟ ବିଚାରପତି ଏକ ହତ୍ୟା ଘଟଣାର ଶୁଣାଣି କରି ୫ଜଣଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ସନ୍ତୋଷ ପ୍ରଧାନୀଙ୍କ ହତ୍ୟା ମାମଲାରେ ଆଜୀବନ କାରାଦଣ୍ଡ ହୋଇଥିବା ୫ଜଣ ହେଲେ ଗଙ୍ଗାଧର ପାତ୍ର, ପ୍ରଦୀପ ଦଣ୍ଡସେନା, ବାରାଣାସି ପାତ୍ର, ବିନାୟକ ପାତ୍ର ଓ ଗୋଲୋକ ପୁଜାରୀ। ସରକାରୀ ଓକିଲ ଭାବେ ରବୀନ ଚନ୍ଦ୍ର ସାହୁ ମାମଲାକୁ ପରିଚାଳନା କରୁଥିବା ବେଳେ ଅଭିଯୁକ୍ତ ମାନଙ୍କ ପକ୍ଷରୁ ଓକିଲ ସୁରେନ୍ଦ୍ର ପାତ୍ର ଲଢୁଥିଲେ।
ଗତ ୨୦୧୪ ମସିହାରେ ବାଲିଗୁଡା ଥାନା ଅନ୍ତର୍ଗତ ବୁଡାଗୁଡା ନେଡିସାହିର ସନ୍ତୋଷ ପ୍ରଧାନୀ ନାସ ଖାଇବାକୁ ଯାଇଥିବା ବେଳେ ପୁର୍ବ ଶତ୍ରୁତା କାରଣରୁ ଗଙ୍ଗାଧରପାତ୍ର, ପ୍ରଦୀପ ଦଣ୍ଡସେନା, ବାରାଣାସି ପାତ୍ର, ବିନାୟକ ପାତ୍ର, ଗୋଲୋକ ପୁଜାରୀ ଓ ସନ୍ତଷ ପାତ୍ର ବଚସା କରି ମରଣାତ୍ମକ ଆକ୍ରମଣ କରିଥିଲେ। ଏହି ଖବର ଜାଣିବା ପରେ ତାଙ୍କ ପରିବାର ଲୋକେ ଘଟଣାସ୍ଥଳକୁ ଯାଇଥିଲେ ଏବଂ ମାଡ ଖାଇଥିବା ସନ୍ତୋଷ ପ୍ରଧାନୀଙ୍କୁ ଘରକୁ ଆଣିଥିଲେ ଏବଂ ସେ ରକ୍ତ ବାନ୍ତି କରିବାରୁ ତାଙ୍କୁ ମେଡିକାଲକୁ ଆଣିବା ସମୟରେ ତାଙ୍କର ମୃତ୍ୟୁ ହୋଇଥିଲା। ଏହାକୁ ବାଲିଗୁଡା ଥାନାରେ ତାଙ୍କ ପରିବାର ଲୋକେ ଏତଲା ଦେଇଥିଲେ। ଏତଲାକୁ ଭିତି କରି ବାଲିଗୁଡା ଥାନା କେଶ ନଂ ୨୪ ତା ୧୨/୦୩/୨୦୧୪ରେ ମାମଲା ରୁଜୁ କରି ଅଭିଯୁକ୍ତଙ୍କୁ ପୋଲିସ କୋର୍ଟ ଚାଲାଣ କରିଥିଲେ। ଏହାପରେ ଏମାନେ ଜାମିନରେ ଆସିଥିଲେ। ଏହି ଛଅ ଜଣ ମଧ୍ୟରୁ ଜଣେ ସନ୍ତୋଷ ପାତ୍ରଙ୍କ ମୃତ୍ୟୁ ହୋଇଯାଇଛି ଓ ଅନ୍ୟ ପାଂଚ ଜଣ ଗଙ୍ଗାଧରପାତ୍ର, ପ୍ରଦୀପ ଦଣ୍ଡସେନା, ବାରାଣାସି ପାତ୍ର, ବିନାୟକ ପାତ୍ର, ଗୋଲୋକ ପୁଜାରୀଙ୍କୁ ଦୋଷି ସାବ୍ୟସ୍ତ ହେବା ପରେ କୋର୍ଟ ଚାଲାଣ କରାଯାଇଛି।
