ସମ୍ବଲପୁର – ଖ୍ୟାତିନାମା ନିର୍ଦ୍ଦେଶକ ପ୍ରଶାନ୍ତ ରାୟ ମାଇକେଲଙ୍କ ନିର୍ଦ୍ଦେଶିତ ଏବଂ ମୁମ୍ବାଇର ବେଲ୍କ୍ ସ୍କ୍ରିନ ପ୍ରଯୋଜିତ ବଙ୍ଗଳା ଚଳଚିତ୍ର “ଇନ୍ତେଜାର” ରେ ଓଡିଆ ଝିଅ ତଥା ସମ୍ବଲପୁରର ନିବାସୀ ତରୁଣି କଣ୍ଠଶିଳ୍ପୀ ସିଦ୍ଧି ପ୍ରିୟଦର୍ଶିନୀ (ହନି) ଅଭିନୟ ସହିତ କଣ୍ଠ ଦାନ କରୁଛନ୍ତି । ୫ଟି ଭାଷାରେ ନିର୍ମିତ ହେବାକୁ ଥିବା “ଇନ୍ତେଜାର” ର ଗୀତମାନଙ୍କ ମଧ୍ୟରୁ ରେକର୍ଡିଂ ସରିଥିବା ଦୁଇଟି ଗୀତରେ ସିଦ୍ଧି କଣ୍ଠଦାନ କରିଛନ୍ତି । ଏହାର କିୟଦଂଶ କୋଲକାତାର ଗଣମାଧ୍ୟମରେ ପ୍ରସାରିତ ହୋଇ ବେସ ଆଦୃତ ଲାଭ କରିଛି । ପ୍ରସନଜିତ ବି. ମିଶ୍ରଙ୍କ ସଙ୍ଗୀତ ନିର୍ଦ୍ଦେଶନାରେ ଇଂ. ବିଶ୍ୱଜିତ ମିଶ୍ର, ନୀରଜ ଦାସ ଏବଂ ହଂସରାଜ କୁଲୁ ଗୀତ ରଚନା କରିଛନ୍ତି । ବୁର୍ଲା ଭିସୁଟର କୃତୀ ଛାତ୍ର ଇଂ ବିଶ୍ୱଜିତ ମିଶ୍ର ଅଧ୍ୟୟନ ସମୟରେ ସମ୍ବଲପୁରର ସଙ୍ଗୀତ କ୍ଷେତ୍ର ଏକଦା ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ ।
ସମ୍ବଲପୁର କେନ୍ଦ୍ରୀୟ ବିଦ୍ୟାଳୟ ଓ ଦିଲ୍ଲୀ ପବ୍ଲିକ ସ୍କୁଲରୁ କୃତୀତ୍ୱର ସହିତ ମାଟ୍ରିକ କରିବା ପରେ ଏବେ ସିଦ୍ଧି ଶ୍ରୀ ଶ୍ରୀ ବିଶ୍ୱବିଦ୍ୟାଳୟରେ ବାଣିଜ୍ୟ ସ୍ନାତକ ଶ୍ରେଣୀର ଶେଷ ବର୍ଷରେ ଅଧ୍ୟୟନ କରୁଛନ୍ତି । ସେ ବିଦ୍ୟାଳୟ ଓ ମହାବିଦ୍ୟାଳୟ ସ୍ତରରେ ଉନ୍ନତ କଣ୍ଠ ଶିଳ୍ପୀ ରୂପେ ଅନେକ ପୁରସ୍କାର ଲାଭ କରିଛନ୍ତି । ତାଙ୍କର ସୁମଧୁର କଣ୍ଠ ଓ ଶୈଳୀ ଦେଶର ଲୋକପ୍ରିୟ ନିର୍ଦ୍ଦେଶକ ପ୍ରସନ୍ନଜିତ ମିଶ୍ର ଙ୍କ ନଜରକୁ ଆସିବା ପରେ “ଇନ୍ତେଜାର” ଚଳଚିତ୍ରରେ ସୁଯୋଗ ଦେଇଛନ୍ତି । ଏବେ “ଇନ୍ତେଜାର” ର ସୁଟିଂ ଜାରି ରହିଛି । ସିଦ୍ଧି ପ୍ରିୟଦର୍ଶନୀ ସ୍ଥାନୀୟ ସରଲାକାନୀ କଲୋନୀ ନିବାସୀ ଯୁବ ଶିଳ୍ପଦ୍ୟୋଗୀ ସମୀର ଏବଂ ସୁପ୍ରଭାଙ୍କ କନ୍ୟା । ସ୍ଥାନୀୟ ନନ୍ଦପଡ଼ା ନିବାସୀ ପ୍ରଫୁଲ୍ଲ କୁମାର ହୋତା (ଓଡ଼ିଶା ସାଂସ୍କୃତିକ ସମାଜର ପୂର୍ବତନ ସଭାପତି) ଏବଂ ଶୁଭଲକ୍ଷ୍ମୀ ହୋତାଙ୍କ ନାତୁଣୀ ଅଟନ୍ତି । ସିଦ୍ଧି ପ୍ରିୟଦର୍ଶନୀ ପ୍ରଥମ କରି ଚଳଚ୍ଚିତ୍ରରେ ସୁଯୋଗ ପାଇଥିବାରୁ ଖୁସି ଜାହିର କରି ଏହି ଅଭିଜ୍ଞତା ଆଗକୁ ବିଶେଷ ସହାୟକ ହେବ ବୋଲି କହିବା ସହିତ ଏହି କୃତୀତ୍ୱ ପାଇଁ ତାଙ୍କ ମାଆ ଓ ପରିବାରବର୍ଗଙ୍କୁ ଶ୍ରେୟ ଦେଇଛନ୍ତି । ନିଜର ପ୍ରତିଭା ପାଇଁ ସିଧାସଳଖ ମୁମ୍ବାଇ ପ୍ରଯୋଜିତ ସିନେମାରେ କଣ୍ଠଦାନର ସୁଯୋଗ ପାଇଥିବା ସିଦ୍ଧିଙ୍କୁ ସବୁ ମହଲରୁ ଶୁଭେଚ୍ଛା ଜ୍ଞାପନ କରାଯାଉଛି ।
