ନୂଆଦିଲ୍ଲୀ : ବଜେଟରେ ପିଲାଙ୍କ ପେନସନ୍ ପାଇଁ ଏକ ନୂଆ ଅଭିଯାନ ଆରମ୍ଭ କରିବା ନେଇ ଘୋଷଣା ହୋଇଥିଲା । ପିଲାଙ୍କ ନାଁରେ ନ୍ୟାସନାଲ୍ ପେନସନ୍ ସିଷ୍ଟମରେ ନିବେଶର ବିକଳ୍ପ ଦିଆଯାଇଥିଲା ଏବଂ ଏକ ନୂଆ ଯୋଜନାର ଘୋଷଣା ହୋଇଥିଲା । ଏହାକୁ ଏନପିଏସ୍ ବାତ୍ସଲ୍ୟ ସ୍କିମ୍ ନାଁ ଦିଆଯାଇଥିଲା । କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବୁଧବାର ଏହି ଯୋଜନା ଆରମ୍ଭ କରିଦେଇଛନ୍ତି । ଏହି ଯୋଜନା ଅନୁସାରେ ମାତା-ପିତା ନିଜ ପିଲାଙ୍କ ଭବିଷ୍ୟତ ସୁରକ୍ଷିତ କରିବା ପାଇଁ ଫଣ୍ଡ୍ ଜମା କରିପାରିବେ ।
ପିଲାଙ୍କ ଭବିଷ୍ୟତ ସୁରକ୍ଷିତ କରିବା ପାଇଁ ଏହି ଯୋଜନା ଅନୁସାରେ ନିବେଶ ଏବଂ ପେନସନ୍ ପାଇବାର ଏହା ଏକ ସହଜ ବିକଳ୍ପ । ଏହି ଯୋଜନା ଅନୁସାରେ ବାର୍ଷିକ ଆଧାରରେ ୧୦୦୦ ଟଙ୍କାରୁ ନିବେଶ ଆରମ୍ଭ କରିହେବ । ସର୍ବାଧିକର କୌଣସି ସୀମା ନାହିଁ । ଜମା ରାଶିରେ ଚକ୍ରବର୍ତ୍ତୀ ସୁଧ ମିଳିଥାଏ ଯାହା ଫଳରେ ପିଲାମାନେ ଭବିଷ୍ୟତରେ ଏକ ବଡ ରାଶି ପାଇପାରିବେ ।
ପିଲାମାନଙ୍କ ପାଇଁ ତାଙ୍କ ଅଭିଭାବକ ପଇସା ଜମା କରିପାରିବେ । ପିଲାମାନେ ୧୮ ବର୍ଷର ହୋଇଗଲେ ସେମାନେ ଏହାକୁ ପରିଚାଳନା କରିପାରିବେ । ଆରମ୍ଭରୁ ନିବେଶ ହୋଇଥିବା ପଇସା ୩ ବର୍ଷ ପାଇଁ ଲକ୍ ଇନ୍ ପିରିୟଡ ପରେ ଆବଶ୍ୟକ ପଡିଲେ ଉଠାଣ କରିହେବ । ଏନପିଏସ୍ ବାତ୍ସଲ୍ୟ ଆକାଉଣ୍ଟ ପ୍ରମୁଖ ବ୍ୟାଙ୍କ, ଭାରତୀୟ ପୋଷ୍ଟ, ପେନସନ୍ ଫଣ୍ଡ ଆଦିରେ ଖୋଲିହେବ । ଏହାକୁ ଉଭୟ ଅଫଲାଇନ୍ ଏବଂ ଅନଲାଇନରେ ଖୋଲିପାରିବେ ଉପଭୋକ୍ତା । ଅନଲାଇନରେ ଆକାଉଣ୍ଟ ଖୋଲିବା ପାଇଁ ଏଠାରେ କ୍ଲିକ୍ କରନ୍ତୁ ।
