ନୂଆଦିଲ୍ଲୀ : ଭାରତରେ ଏଣିକି ଥଣ୍ଡା, ଜ୍ବର, କାଶ ଭଳି ସାଧାରଣ ଔଷଧକୁ ତେଜରାତି ଦୋକାନରେ ବିକ୍ରି କରିବାକୁ ଅନୁମତି ଦିଆଯାଇପାରେ । କେନ୍ଦ୍ର ସରକାରଙ୍କ ଏକ ସମିତି ଗଠନ ହୋଇଛି ଯାହା ଭାରତରେ ଓଭର ଦ କାଉଣ୍ଟର(ଓଟିସି) ଔଷଧ ନୀତି ପ୍ରସ୍ତୁତ ଦିଗରେ କାମ କରୁଛି । ଖାସ୍ କଥା ଏହା କି ଲୋକଙ୍କୁ ଔଷଧ କିଣିବାକୁ ଡାକ୍ତରଙ୍କ ପ୍ରେସକ୍ରିପସନ୍ ମଧ୍ୟ ଦେଖାଇବାକୁ ପଡିବନି । ଗ୍ରାମାଞ୍ଚଳ ଏବଂ ଦୁର୍ଗମ ଅଞ୍ଚଳରେ ଏହି ଔଷଧକୁ ସହଜରେ ଲୋକଙ୍କ ପର୍ଯ୍ୟନ୍ତ ପହଞ୍ଚାଇବା ପାଇଁ ଏମିତି ପଦକ୍ଷେପ ଉଠାଯାଉଛି ।
ବିଶେଷଜ୍ଞ ପରାମର୍ଶ ଅନୁସାରେ ଏବେ ଅନେକ ଅଞ୍ଚଳରେ ସାଧାରଣ ଔଷଧ ପହଞ୍ଚିପାରୁନି । ଆମେରିକା ସମେତ ଅନେକ ଦେଶରେ ଏହି ସାଧାରଣ ଔଷଧ ତେଜରାତି ଦୋକାନରେ ବିକ୍ରି ହେବାର ଅନୁମତି ରହିଛି । ଭାରତରେ ମଧ୍ୟ ଏହି ନିୟମକୁ ଲାଗୁ କରିବା ଉପରେ ଆଲୋଚନା ଚାଲିଛି ।
ଚଳିତ ବର୍ଷ ଫେବୃୟାରୀରେ ଓଟିସି ଔଷଧ ନୀତି ପ୍ରସ୍ତୁତ କରିବା ପାଇଁ ସ୍ବାସ୍ଥ୍ୟ ସେବା ମହାନିର୍ଦ୍ଦେଶକ ଅତୁଲ ଗୋୟଲ ସମିତି ଗଠନ କରିଥିଲେ । ସମିତି ତରଫରୁ ନିକଟରେ ଔଷଧର ପ୍ରଥମ ତାଲିକା ପ୍ରଦାନ କରାଯାଇଥିଲା ଯାହାକୁ ବିକ୍ରି କରାଯାଇପାରିବ । ତେବେ ପୁଙ୍ଖାନୁପୁଙ୍ଖ ଆଲୋଚନା ପରେ ଏହାର ନିଷ୍କର୍ଷ ବାହାରିବ ।
