ସମାଜ ଡିଜିଟାଲ ଡେସ୍କ: ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ସ୍ୱାସ୍ଥ୍ୟ ଅବସ୍ଥା ନେଇ ଭି.କେ. ପାଣ୍ଡିଆନ ବିଜେଡି ନେତାଙ୍କୁ ତାଗିଦ କରିବା ପ୍ରସଙ୍ଗକୁ ନେଇ ରାଜନୀତି ଜୋର ଧରିଛି। ତେବେ ପିସିସି ସଭାପତି ଭକ୍ତ ଚରଣ ଦାସ ସୋମବାର ନବୀନଙ୍କୁ ଭେଟିବାକୁ ଯାଇଥିବା ସମୟରେ ଭିନ୍ନ ମତ ଦେଇଛନ୍ତି। ତାଙ୍କୁ କେହି ଦୁର୍ବ୍ୟବହାର କରିନାହାନ୍ତି। ପାଣ୍ଡିଆନ ଏବଂ ସୁତାଜା ପାଣ୍ଡିଆନ ତାଙ୍କୁ ଭଲ ବ୍ୟବହାର କରିଛନ୍ତି।
ଭକ୍ତ କହିଛନ୍ତି, ରାଜନୀତି ଭିନ୍ନ ପ୍ରସଙ୍ଗ। କିନ୍ତୁ ନବୀନ ବାବୁ ଓଡ଼ିଶାର ଅନେକ ଉନ୍ନତି କରିଛନ୍ତି। ସେ ବିରୋଧୀ ଦଳ ନେତା ମଧ୍ୟ ଅଛନ୍ତି। ତାଙ୍କୁ ଭେଟିବା ପାଇଁ ମୁଁ କାଲି ହସ୍ପିଟାଲ ଯାଇଥିଲି। ନବୀନ ବାବୁ ଚିକିତ୍ସା ହେଉଥିବା ରୁମ ପାଖରେ ଆଉ ଏକ ରୁମ ରହିଥିଲା। ସେଠାରେ ଆମେ ନବୀନ ବାବୁଙ୍କୁ ଭେଟିବାକୁ ଆପେକ୍ଷ କରିଥିଲୁ। ମୋ ସାଙ୍ଗରେ ବିଜେଡିର ବହୁ ବରିଷ୍ଠ ନେତା ମଧ୍ୟ ଉପସ୍ଥିତ ଥିଲେ। ମୁଁ ନବୀନ ବାବୁଙ୍କୁ ଦେଖା କରିବାକୁ ଡାକ୍ତରୀ ଟିମଙ୍କୁ କହିଥିଲି। ମୋତେ ଭିତରକୁ ନ ନେଇ କାଚ ପାଖରେ ଦେଖିବାକୁ କହିଥିଲେ। ହେଲେ କାହିଁକି ମୋତେ ସେ ସ୍ଥାନ ପର୍ଯ୍ୟନ୍ତ ନେଲେନାହିଁ ମୁଁ ଜାଣିନାହିଁ।
ନବୀନ ବାବୁ ଯେହେତୁ ଓଡ଼ିଶାର ଜଣେ ପ୍ରିୟ ନେତା ପ୍ରତି ଘଣ୍ଟାରେ କାହିଁକି ବୁଲେଟିନ କରୁନାହଁ ବୋଲି ଡାକ୍ତରଙ୍କୁ ପଚାରିଥିଲି। ଏହାପରେ ଭି. କେ ପାଣ୍ଡିଆନ ଏବଂ ସୁଜାତା ପାଣ୍ଡିଆନ ଆସିଥିଲେ। ନବୀନ ବାବୁଙ୍କ ସ୍ୱାସ୍ଥ୍ୟ ସମ୍ପର୍କରେ ସମସ୍ତ ତଥ୍ୟ ମଧ୍ୟ ଜଣାଇଥିଲେ। ପାଣ୍ଡିଆନ ମୋତେ ନବୀନ ବାବୁଙ୍କୁ ଦେଖା କରିବାରେ ବରଣ କରିନାହାନ୍ତି। ଯଦି ମୋ ବିଷୟରେ ଗଣମାଧ୍ୟମରେ କିଛି ଅଧିକ ଚର୍ଚ୍ଚା ହେଉଛି ତେବେ ସେସବୁ ମିଛ ବୋଲି ଭକ୍ତ କହିଛନ୍ତି।
