ଲକ୍ଷ୍ନୌ : ଉତ୍ତର ପ୍ରଦେଶ ସରକାର ସଡକ ସୁରକ୍ଷାକୁ ନେଇ ବଡ ପଦକ୍ଷେପ ଉଠାଇଛନ୍ତି । ୧ରୁ ୩୦ ସେପ୍ଟେମ୍ବର ପର୍ଯ୍ୟନ୍ତ ସାରା ରାଜ୍ୟରେ ‘ନୋ ହେଲମେଟ୍, ନୋ ଫ୍ୟୁଲ’ ଅଭିଯାନ ଚଲାଯାଉଛି । ଏହି ସମୟ ମଧ୍ୟରେ ବିନା ହେଲମେଟରେ ପେଟ୍ରୋଲପମ୍ପରେ ତେଲ ମିଳିବନି । ସରକାରଙ୍କ କହିବାନୁସାରେ ଏହା କୌଣସି ପ୍ରକାର ଦଣ୍ଡ ନୁହେଁ, ଏହା କେବଳ ଜନସାଧାରଣଙ୍କୁ ସଚେତନ କରିବାର ଏକ ଅଭିଯାନ । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ଡେପୁଟି ସିଏମ୍ ବୃଜେଶ ପାଠକ ସ୍ପଷ୍ଟ କରିଛନ୍ତି କି ସଡକ ଦୁର୍ଘଟଣା ହ୍ରାସ କରିବା ଏବଂ ହେଲମେଟ ପିନ୍ଧିବାକୁ ପ୍ରୋତ୍ସାହନ ଦେବା ଏହାର ଉଦ୍ଦେଶ୍ୟ ।
ଏହି ଅଭିଯାନ ସମ୍ପୂର୍ଣ୍ଣ ୟୁପିରେ ଜିଲାପାଳଙ୍କ ଦେଖାରଖାରେ ଚାଲୁଛି । ପେଟ୍ରୋଲପମ୍ପରେ ଫୁଡ୍ ଏଣ୍ଡ୍ ସିଭିଲ୍ ସପ୍ଲାଇ ଡିପାର୍ଟମେଣ୍ଟ ଏହା ଉପରେ ନଜର ରଖିବ । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି କି କାହାକୁ ଦଣ୍ଡ ଦେବା ଏହି ଅଭିଯାନର ଉଦ୍ଦେଶ୍ୟ ନୁହେଁ, ବରଂ ଲୋକଙ୍କୁ ଗାଡି ଚାଳନା ପ୍ରତି ସଚେତନ କରିବା ଏହାର ଉଦ୍ଦେଶ୍ୟ । ସେହିପରି ଉପମୁଖ୍ୟମନ୍ତ୍ରୀ ବୃଜେଶ ପାଠକ ଲୋକଙ୍କୁ ଦ୍ରୁତ ଗତିରେ ଗାଡି ଚାଳନାରୁ ବିରତ ରହିବାକୁ ପରାମର୍ଶ ଦେବା ସହ ଟ୍ରାଫିକ୍ ନିୟମ ମାନିବାକୁ ଅପିଲ୍ କରିଛନ୍ତି ।
