ଡ଼େସ୍କ: ଚଳିତ ବର୍ଷ ମେ’ ପହିଲାରୁ ଉପଗ୍ରହ ଭିତ୍ତିକ ଟୋଲ ଆଦାୟ ବ୍ୟବସ୍ଥା ନେଇ କୌଣସି ନିଷ୍ପତ୍ତି ନିଆଯାଇନାହିଁ ବୋଲି କେନ୍ଦ୍ର ସରକାର ସ୍ପଷ୍ଟ କରିଛନ୍ତି। ଗଣମାଧ୍ୟମର ଦାବିକୁ ଖଣ୍ଡନ କରି ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ କହିଛି ଯେ ମନ୍ତ୍ରଣାଳୟ କିମ୍ବା ଜାତୀୟ ରାଜପଥ କର୍ତ୍ତୃପକ୍ଷ ଏ ସଂକ୍ରାନ୍ତରେ କୌଣସି ନିଷ୍ପତ୍ତି ନେଇନାହାନ୍ତି।
ମନ୍ତ୍ରଣାଳୟ କହିଛି ଯେ ଟୋଲ ପ୍ଲାଜା ମାଧ୍ୟମରେ ଯାନବାହନଗୁଡିକର ନିରବଚ୍ଛିନ୍ନ, ପ୍ରତିବନ୍ଧକ ମୁକ୍ତ ପରିବହନକୁ ସକ୍ଷମ କରିବା ଏବଂ ଯାତ୍ରା ସମୟକୁ ହ୍ରାସ କରିବା ପାଇଁ, ବଛା ବଛା ଟୋଲ ପ୍ଲାଜାଗୁଡିକରେ ଏକ ସ୍ୱୟଂଚାଳିତ ନମ୍ବର ପ୍ଲେଟ୍ ଚିହ୍ନଟକରଣ ଫାସଟ୍ୟାଗ ଆଧାରିତ ବ୍ୟାରିୟର-ଲେସ୍ ଟୋଲିଂ ବ୍ୟବସ୍ଥା କାର୍ଯ୍ୟକାରୀ କରାଯିବ। ଏହି ସିଷ୍ଟମରେ ଅଟୋମେଟିକ ନମ୍ବର ପ୍ଲେଟ୍ ଚିହ୍ନଟ ଜ୍ଞାନକୌଶଳ ବ୍ୟବହାର କରାଯିବ, ଯାହା ଗାଡିଗୁଡିକର ନମ୍ବର ପ୍ଲେଟ୍ ପଢି ଚିହ୍ନଟ କରିବ ଏବଂ ରେଡିଓ-ଫ୍ରିକ୍ୱେନ୍ସି ଆଇଡେଣ୍ଟିଫିକେସନ୍ ଜରିଆରେ ଟୋଲ କଟିବ। ଏହି ବ୍ୟବସ୍ଥା ଅଧୀନରେ ଟୋଲ୍ ପ୍ଲାଜାରେ ନ ଅଟକି ହାଇ ପରଫର୍ମାନ୍ସ ଏଏନପିଆର୍ କ୍ୟାମେରା ଏବଂ ଫାସଟ୍ୟାଗ ରିଡର୍ସ ଜରିଆରେ ଗାଡ଼ିଗୁଡ଼ିକୁ ସେମାନଙ୍କ ପରିଚୟ ଆଧାରରେ ଚାର୍ଜ କରାଯିବ। ନିୟମ ଉଲ୍ଲଂଘନକାରୀଙ୍କୁ ଇ-ନୋଟିସ୍ ପ୍ରଦାନ କରାଯିବ, ଯାହାର ପୈଠ ନକଲେ ଫାସଟ୍ୟାଗ ଏବଂ ଅନ୍ୟାନ୍ୟ ବାହନ ସମ୍ବନ୍ଧୀୟ ଜରିମାନା ଲାଗୁ ହୋଇପାରେ।
ମନ୍ତ୍ରଣାଳୟ କହିଛି ଯେ ଏନଏଚଏଆଇ ମନୋନୀତ ସ୍ଥାନରେ ଏଏନପିଆର-ଫାସଟ୍ୟାଗ୍ ଆଧାରିତ ପ୍ରତିବନ୍ଧକ-ବିହୀନ ଟୋଲିଂ ବ୍ୟବସ୍ଥା କାର୍ଯ୍ୟକାରୀ କରିବା ପାଇଁ ଟେଣ୍ଡର ଆହ୍ୱାନ କରିଛି। ଏହି ସିଷ୍ଟମର କାର୍ଯ୍ୟଦକ୍ଷତା, ଦକ୍ଷତା ଏବଂ ଉପଭୋକ୍ତାଙ୍କ ପ୍ରତିକ୍ରିୟା ଆଧାରରେ ସମଗ୍ର ଦେଶରେ ଏହାର କାର୍ଯ୍ୟକାରିତା ସମ୍ପର୍କରେ ନିଷ୍ପତ୍ତି ନିଆଯିବ।
