ଝାରସୁଗୁଡା: ଝାରସୁଗୁଡ଼ା ଜିଲା ଲଖନପୁର ମହାନଦୀରେ ଡଙ୍ଗା ବୁଡି ଘଟଣା। ଆଜି ସକାଳୁ ୬ଜଣଙ୍କର ମୃତଦେହ ଉଦ୍ଧାର କରାଯାଇଛି । ଶୁକ୍ରବାର ଜଣଙ୍କର ମୃତଦେହ ମିଳିଥିଲା । ଏମାନେ ସମସ୍ତେ ଛତିଶଗଡ଼ର ବାସିନ୍ଦା ବୋଲି ଜଣାପଡିଛି। ତେବେ ଏହି ଦୁର୍ଘଟଣାକୁ ନେଇ ଜାତୀୟ ମାନବାଧିକାର ଆୟୋଗ ମୁଖ୍ୟ ଶାସନ ସଚିବଙ୍କୁ ୪ ସପ୍ତାହ ମଧ୍ୟରେ ଜବାବ ଦାଖଲ କରିବାକୁ କହିଛନ୍ତି। ସାମାଜିକ କର୍ମୀ ତଥା ଆଇନଜୀବୀ ରାଧାକାନ୍ତ ତ୍ରିପାଠୀଙ୍କ ଆବେଦନ କ୍ରମେ ରାଜ୍ୟରେ ଡଙ୍ଗା ବୁଡ଼ି ଘଟଣାରେ କ’ଣ ପଦକ୍ଷେପ ନିଆଯାଇଛି, ସେ ନେଇ ରିପୋର୍ଟ ଦାଖଲ କରିବାକୁ ଜାତୀୟ ମାନବାଧିକାର ଆୟୋଗ ଓଡ଼ିଶା ସରକାରଙ୍କୁ ପୂର୍ବରୁ ନିର୍ଦ୍ଦେଶ ଦେଇଥିଲେ ମଧ୍ୟ ଏ ସମ୍ପର୍କରେ ସରକାର ନିରବ ରହିଛନ୍ତି। ପରିବହନ ମାଧ୍ୟମ ଭାବେ ଡଙ୍ଗା ବ୍ୟବହାର କରୁଥିବା ଲୋକଙ୍କ ଜୀବନ ସୁରକ୍ଷା ପାଇଁ ନିଆଯାଇଥିବା ପଦକ୍ଷେପ ଏବଂ ଦୁର୍ଘଟଣାରେ ମୃତକଙ୍କ ପରିବାରକୁ ଦିଆଯାଇଥିବା କ୍ଷତିପୂରଣ ସମ୍ପର୍କରେ ରାଜ୍ୟ ସରକାର ଏକ ରିପୋର୍ଟ ଦାଖଲ କରିଥିଲେ। ରାଜ୍ୟ ସରକାରଙ୍କ ପକ୍ଷରୁ ଦାଖଲ କରାଯାଇଥିବା ରିପୋର୍ଟ ଉପରେ ଅଧିକାର କମିଟି ମତାମତ ମାଗିବା ପରେ ଆବେଦନକାରୀ ତାଙ୍କ ଯୁକ୍ତିରେ ମତ୍ସ୍ୟ ବିଭାଗର ଅବହେଳାକୁ ଦର୍ଶାଇ ଏଭଳି ଦୁର୍ଘଟଣାକୁ ରୋକିବା ପାଇଁ ଅଚାନକ ଯାଞ୍ଚ ଓ ପାଟ୍ରୋଲିଂ ସହ ଲାଇସେନ୍ସ, ନିରାପତ୍ତା ଓ ଅନ୍ୟାନ୍ୟ ନୀତିକୁ କଡ଼ାକଡ଼ି ଭାବେ କାର୍ଯ୍ୟକାରୀ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ଗତ ଦୁଇ ବର୍ଷ ମଧ୍ୟରେ ଅନେକ ଲୋକଙ୍କ ଜୀବନ ନେଇଥିବା ଡଙ୍ଗା ଦୁର୍ଘଟଣାର ତାଲିକା ଦେଇ ଆବେଦନକାରୀ ଅଭିଯୋଗ କରିଛନ୍ତି ଯେ ଅନେକ ଡଙ୍ଗା ଚାଳକଙ୍କ ପାଖରେ ଲାଇସେନ୍ସ ନାହିଁ ଏବଂ ସେମାନଙ୍କ ଡଙ୍ଗାର ଫିଟନେସ୍ ସାର୍ଟିଫିକେଟ୍ ଅନୁଯାୟୀ ସେମାନେ ପରିବହନ ପାଇଁ ଯୋଗ୍ୟ ନୁହଁନ୍ତି। ଯାତ୍ରୀ ପରିବହନ ପାଇଁ ମାଛ ଧରା ଓ ଅସୁରକ୍ଷିତ ଜାହାଜ ଉପରେ କଟକଣା ରହିଛି ବୋଲି ଉଲ୍ଲେଖ କରି ସେ କହିଛନ୍ତି ଯେ ଏହା କେବଳ କାଗଜପତ୍ରରେ ରହିଛି ଏବଂ ପୋଲ ଅଭାବରୁ ଲୋକମାନେ ପ୍ରତିଦିନ ଡଙ୍ଗାରେ ନଦୀ ପାର ହୋଇ ବିପଜ୍ଜନକ ଯାତ୍ରା କରିବାକୁ ବାଧ୍ୟ ହେଉଥିବାରୁ ଅନେକ ଡଙ୍ଗା ବୁଡ଼ିବା ଘଟଣା ଘଟୁଛି। ବିନା ଫିଟନେସ୍ ଓ ଲାଇସେନ୍ସରେ ଡଙ୍ଗାରେ ଯାତ୍ରୀ ପରିବହନ ପାଇଁ ଅନୁମତି ଦେବା ନେଇ ସରକାରୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଏପର୍ଯ୍ୟନ୍ତ ଯେଉଁମାନେ ସହାୟତା ପାଇନାହାଁନ୍ତି ସେମାନଙ୍କୁ ଅନୁକମ୍ପାମୂଳକ ସହାୟତା ପ୍ରଦାନ କରିବାକୁ ଆବେଦନକାରୀ ଦାବି କରିଛନ୍ତି।
Popular Categories
Previous article
Next article