ୱେଲିଙ୍ଗଟନ୍ : ନିଉଜିଲ୍ୟାଣ୍ଡର ପ୍ରଧାନମନ୍ତ୍ରୀ ଜାକିଣ୍ଡା ଆଣ୍ଡ୍ରେନ୍ ଗୁରୁବାର ମାତୃତ୍ୱ ଲାଭ କରିଛନ୍ତି। ଅକ୍ଲ୍ୟାଣ୍ଡ ସିଟି ହସ୍ପିଟାଲଠାରେ ସେ ଏକ ଶିଶୁକନ୍ୟାକୁ ଜନ୍ମ ଦେଇଛନ୍ତି। ଏହା ତାଙ୍କର ପ୍ରଥମ ସନ୍ତାନ। ଗୁରୁବାର ଅପରାହ୍ଣରେ ସନ୍ତାନ ପ୍ରସବ ପରେ ୩୭ବର୍ଷୀୟା ଆଣ୍ଡ୍ରେନ୍ ତାଙ୍କ ନବଜତ ଶିଶୁକନ୍ୟା ଏବଂ ସ୍ୱାମୀ କ୍ଲାର୍କ ଗେଫୋର୍ଡଙ୍କ ସହିତ ଏକ ଫଟୋ ଟ୍ୱିଟର୍ରେ ସାର୍ବଜନୀନ କରିଛନ୍ତି। ସମ୍ପ୍ରତି ସେ ଛ’ମାସ ପାଇଁ ମାତୃତ୍ୱଲାଭଜନିତ ଅବକାଶରେ ଥିବାରୁ ତାଙ୍କ ସ୍ଥାନରେ ଉପ-ପ୍ରଧାନମନ୍ତ୍ରୀ ୱିନ୍ଷ୍ଟୋନ୍ ପିଟର୍ସ କାର୍ଯ୍ୟକାରୀ ପ୍ରଧାନମନ୍ତ୍ରୀ ଭାବେ ଦାୟିତ୍ୱ ନିର୍ବାହ କରୁଛନ୍ତି। ପ୍ରଧାନମନ୍ତ୍ରୀ ପଦରେ ଥାଇ ମାତୃତ୍ୱ ଲାଭ କରିବାରେ ଆଣ୍ଡ୍ରେନ୍ ବିଶ୍ୱର ଦ୍ୱିତୀୟ ପ୍ରଧାନମନ୍ତ୍ରୀ। ତାଙ୍କ ପୂର୍ବରୁ ୧୯୯୦ରେ ପାକିସ୍ତାନର ତତ୍କାଳୀନ ପ୍ରଧାନମନ୍ତ୍ରୀ ବେନଜିର୍ ଭୁଟ୍ଟୋ ତାଙ୍କ ଦ୍ୱିତୀୟ ସନ୍ତାନକୁ ଜନ୍ମ ଦେଇଥିଲେ। ସେତେବେଳେ କ୍ଷମତାରେ ଥାଇ ମାତୃତ୍ୱ ଲାଭ କରିବାରେ ସେ ବିଶ୍ୱର ପ୍ରଥମ ପ୍ରଧାନମନ୍ତ୍ରୀ ପାଲଟିଥିଲେ।
