ଧାମରା: ଧାମରା ବନ୍ଦର କର୍ତ୍ତୃପକ୍ଷଙ୍କ ମନମାନିକୁ ବିରୋଧ କରିଛି ଭଦ୍ରକ ଜିଲ୍ଲା ଟ୍ରକ ଟିପ୍ପର ସଂଘ। ଏହାକୁ ନେଇ ଆଗାମୀ ୨୯ ତାରିଖରେ ଧାମରା ବନ୍ଦର ମୁଖ୍ୟ ଗେଟ ଆଗରେ ସମସ୍ତ ମାଲବାହୀ ରେଳ ଚଳାଚଳକୁ ବନ୍ଦ କରିବାକୁ ୭ଟି ସଂଘ ନିଷ୍ପତ୍ତି ନେଇଛି।
ପ୍ରାପ୍ତ ଖବରରୁ ଜଣାଯାଇଛି ଯେ, ଧାମରା ବନ୍ଦର କର୍ତ୍ତୃପକ୍ଷ ସଡକ ପଥରେ କୋଇଲା ଚାଲାଣ କରୁଥିବା ବେଳେ ଗତ ୧୭ ତାରିଖ ଦିନ କିଛି ନିମ୍ନମାନର କୋଇଲା ଧାମରା ବନ୍ଦରରୁ ଝାରଖଣ୍ଡର ଛାଲିୟାମା ପ୍ଲାଂଟ ସାଇଟ(ରୁଙ୍ଗଟା ମାଇନ୍ସ)କୁ ଚାଲାଣ କରାଯାଇଥିଲା। ଏହି ସମସ୍ତ ଟ୍ରକ ୧୯ତାରିଖ ଦିନ ଛାଲିୟାମା ପ୍ଲାଂଟରେ ପହଂଚିବା ପରେ ରୁଙ୍ଗଟା ମାଇନ୍ସ ଅଧିକାରୀ ୨୭ଟି ଟ୍ରକରେ ନିମ୍ନମାନର କୋଇଲା ଆସିଥିବା ଦର୍ଶାଇ ସଂପୃକ୍ତ ଟ୍ରକଗୁଡିକୁ ଛାଲିୟାମା ପ୍ଲାଂଟ ଥାନାରେ ଜବତ କରାଇ ଦେଇଥିଲେ। ସଂପୃକ୍ତ ଟ୍ରକ ଚାଳକଙ୍କ ସହ ସେମାନଙ୍କ ମୋବାଇଲ ଏବଂ ଏହି ସମସ୍ତ ଟ୍ରକର କାଗଜପତ୍ର ମଧ୍ୟ ଜବତ କରି ନେଇଥିଲେ। ଏହାକୁ ନେଇ ଧାମରା, କଇଥଖୋଲା, ବାଲିମୁଣ୍ଡା, ବିଦେଇପୁର, ବାସୁଦେବପୁର, ଜାମୁଝାଡି, ଚରମ୍ପା ଏବଂ ଭଦ୍ରକ ଠାରେ ଥିବା ସମସ୍ତ ଟ୍ରକ, ଟିପ୍ପର ସଂଘର କର୍ମକର୍ତ୍ତାମାନେ ଏକ ହେବା ସହ ଧାମରା ବନ୍ଦର ବିରୋଧରେ ଯୁଦ୍ଧଂ ଦେହି ଡାକରା ଦେଇଛନ୍ତି। ଏଠାରେ ଉଲ୍ଲେଖଯୋଗ୍ୟ, ଧାମରା ବନ୍ଦର କର୍ତ୍ତୃପକ୍ଷ କୋଇଲା ଟ୍ରକରେ ଲୋଡିଂ କରୁଥିବା ବେଳେ ସଂପୃକ୍ତ ଟ୍ରକର ଚାଳକମାନେ ସେଠାରେ ଅନୁପସ୍ଥିତ ରହିଥାନ୍ତି। ଏଥିସହ କୋଇଲା ଲୋଡ ହେବା ପରେ ବନ୍ଦର କର୍ତ୍ତୃପକ୍ଷ ସେହି ଗାଡିଗୁଡିକୁ ସିଲ କରିଥାନ୍ତି। ମାତ୍ର କେଉଁ ପରିସ୍ଥିତିରେ ୨୭ଟି ଟ୍ରକରେ ନିମ୍ନମାନର କୋଇଲା ଯଥା (ଆରବି-୨) ଗ୍ରେଡର କୋଇଲା ଲୋଡ କରାଗଲା ଏବଂ ସେହି କୋଇଲାକୁ ରୁଙ୍ଗଟା ମାଇନ୍ସ କର୍ତ୍ତୃପକ୍ଷ ନିମ୍ନମାନର ଦର୍ଶାଇ ୨୭ଟି ଟ୍ରକ ଚାଳକଙ୍କୁ ମାନସିକ ନିର୍ଯାତନା ଦେବା ସହ ସେମାନଙ୍କ ବିରୋଧରେ ଆପରାଧିକ ମାମଲା ରୁଜୁ କଲେ ତାହାକୁ ନେଇ ଭଦ୍ରକ ଜିଲ୍ଲାର ସମସ୍ତ ଟ୍ରକ ଟିପ୍ପର ସଂଘ ଆଶ୍ଚର୍ଯ୍ୟ ପ୍ରକଟ କରିଛନ୍ତି।
ସମସ୍ତ ସଂଘ ଏହି ବିଷୟରେ ଭଦ୍ରକ ଜିଲ୍ଲାପାଳ, ଆରକ୍ଷୀ ଅଧୀକ୍ଷକ, ଭଦ୍ରକ ସାଂସଦ, ଚାନ୍ଦବାଲି ବିଧାୟକ, ବାସୁଦେବପୁର, ଭଦ୍ରକ ବିଧାୟକମାନଙ୍କୁ ଲିଖିତ ଭାବେ ଅଭିଯୋଗ କରିବା ସହ ଆଦାନୀ ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀଙ୍କୁ ମଧ୍ୟ ଅବଗତ କରାଇଛନ୍ତି। ତୁରନ୍ତ ଗିରଫ ହୋଇଥିବା ୨୭ଜଣ ଚାଳକଙ୍କୁ ଯଦି ରୁଙ୍ଗଟା ମାଇନ୍ସ କର୍ତ୍ତୃପକ୍ଷ ନ ଛାଡନ୍ତି ଏବଂ ସେମାନଙ୍କ ବିରୋଧରେ ରୁଜୁ ମାମଲା ନ ଉଠାନ୍ତି, ତା’ହେଲେ ଭଦ୍ରକ ଜିଲ୍ଲାର ସମସ୍ତ ସଂଘ ଆସନ୍ତା ୨୯ ତାରିଖ ଦିନ ଧାମରା ବନ୍ଦରରୁ ରେଳପଥରେ ପରିବହନ କରୁଥିବା ସମସ୍ତ ମାଲବାହୀ ରେଳକୁ ଅନିର୍ଦିଷ୍ଟ ସମୟ ପାଇଁ ରୋକିବାକୁ ଚେତାବନୀ ଦେଇଛନ୍ତି।
