ଗୋପାଳପୁର: ଗୋପାଳପୁର କଲେଜ କ୍ୟାମ୍ପସ ବାହାରେ ଜଣେ ଛାତ୍ରଙ୍କୁ ଅଣଛାତ୍ରମାନେ ସୋମବାର ସଂଘବଦ୍ଧ ଆକ୍ରମଣ କରିଛନ୍ତି। ଏହି ଆକ୍ରମଣରେ କଲେଜର ଯୁକ୍ତ ୩ ପ୍ରଥମ ବର୍ଷ ବିଜ୍ଞାନ ଛାତ୍ର ସର୍ବେଶ୍ୱର ଭୂୟାଁ ଆହତ ହୋଇଛନ୍ତି।
ଅଭିଯୋଗ ଅନୁଯାୟୀ, ସର୍ବେଶ୍ୱର ସୋମବାର କଲେଜରୁ କ୍ଲାସ ସାରି ହତା ବାହାରକୁ ବାହାରି ଫୋନରେ କଥା ହୋଇ ଯାଉଥିଵା ବେଳେ କଲେଜ ରାସ୍ତାରେ ହଠାତ କିଛି ଯୁବକ ତାଙ୍କ ସହିତ ଗଣ୍ଡଗୋଳ କରିବା ସହ ସଂଘବଦ୍ଧ ଭାବେ ଆକ୍ରମଣ କରିଥିଲେ। ଆକ୍ରମଣ କରିଥିବା ଯୁବକଙ୍କ ସହ କଲେଜର ଯୁକ୍ତ ୨ର କିଛି ଛାତ୍ର ମଧ୍ୟ ରହିଥିବା ଅଭିଯୋଗ ହୋଇଛି। କୌଣସି ସୂତ୍ରରୁ ଖବର ପାଇ ଗୋପାଳପୁର ପୁଲିସ ସେଠାରେ ପହଞ୍ଚିଥିଲା। ପୁଲିସକୁ ଦେଖି ଆକ୍ରମଣ କରିଥିବା ଯୁବକମାନେ ସେଠାରୁ ଚମ୍ପଟ ମାରିଥିଲେ। ପୁଲିସ ଛାତ୍ର ଜଣଙ୍କୁ ପଚରା ଉଚରା କରିବା ପରେ ଗୋପାଳପୁର କଲେଜ ଅଧ୍ୟକ୍ଷ ଡ଼.ରାମ ପ୍ରସାଦ ପଣ୍ଡାଙ୍କ ସହ ଘଟଣା ବିଷୟରେ ଆଲୋଚନା କରିଥିଲେ। ଏ ନେଇ ଅଧ୍ୟକ୍ଷ ମାଡ଼ ଖାଇଥିବା ଛାତ୍ର ଜଣକୁ ଡ଼ାକି ପଚରା ଉଚରା କରିଥିଲେ। ଏଥିରେ ସମ୍ପୃକ୍ତ ଥିବା କଲେଜ ଛାତ୍ରଙ୍କୁ ଚିହ୍ନଟ ପରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ଅଧ୍ୟକ୍ଷ କହିଛନ୍ତି।
