ବିଶ୍ୱ ମ୍ୟାଲେରିଆ ଦିବସରେ ଜନସଚେତନତା

ଆଠଗଡ଼: ବ୍ରହ୍ମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିନ ମେଘା ସେକ୍ଟରର ଧାଇପୁର ପଞ୍ଚାୟତ ଅନ୍ତର୍ଗତ ରାଧାପ୍ରସନ୍ନପୁର ଗ୍ରାମରେ ମଙ୍ଗଳବାର ବିଶ୍ୱ ମ୍ୟାଲେରିଆ ଦିବସ ଅବସରରେ ଜନସଚେତନତା ସୃଷ୍ଟି କରାଯାଇଛି। ଏଥିରେ ସଂଯୋଜନା କରି ବରିଷ୍ଠ ବହୁମୁଖୀ ସ୍ୱାସ୍ଥ୍ୟ ପରିଦର୍ଶକ ମହମ୍ମଦ୍‌‌ ଅସ୍‌‌ଲମ୍‌‌ ଆମ ରାଜ୍ୟ ଓଡ଼ିଶା ଏକ ମ୍ୟାଲେରିଆ ପ୍ରବଣ ଅଞ୍ଚଳ ହୋଇଥିବାରୁ ୨୦୩୦ସୁଦ୍ଧା ରାଜ୍ୟକୁ ମ୍ୟାଲେରିଆ ମୁକ୍ତ କରିବା ପାଇଁ ସଂକଳ୍ପବଦ୍ଧ ଉଦ୍ଦ୍ୟମ ଜାରି ରହିଛି ବୋଲି କହିବା ସହିତ ଏଥିପାଇଁ ଜନସଚେତନତା ଆବଶ୍ୟକ ବୋଲି ମତବ୍ୟକ୍ତ କରିଥିଲେ। ମାଇଆନୋଫେଲିସ ମଶା କାମୁଡିବା ଦ୍ୱାରା ମ୍ୟାଲେରିଆ ରୋଗ ହୋଇଥାଏ ଏବଂ ଏହାର ଲକ୍ଷଣଗୁଡିକ ମଧ୍ୟରେ କମ୍ପ, ଜ୍ୱର ସହିତ ଝାଳ ବୋହିବା, ମୁଣ୍ଡ ବ୍ୟଥା ହେବା ଓ ବାନ୍ତି ସହ ସର୍ଦ୍ଦି, କାଶ ହୋଇଥାଏ ବୋଲି ସେ ସୂଚନା ଦେଇଥିଲେ। ଏପରି ଲକ୍ଷଣ ଦେଖାଗଲେ କାଳବିଳମ୍ବ ନକରି ଆଶାଦିଦି ଅବା ସ୍ୱାସ୍ଥ୍ୟକର୍ମୀଙ୍କ ସହ ଯୋଗାଯୋଗ କରି ଆବଶ୍ୟକୀୟ ଚିକିତ୍ସା କରାଇବା ଉପରେ ଶ୍ରୀ ଅସଲମ ଗୁରୁୁତ୍ୱାରୋପ କରିଥିଲେ। ଏଥିସହିତ ମଶା ବଂଶ ରୋକିବା ଦିଗରେ ପଦକ୍ଷେପ ନେବା, ଶୋଇବା ସମୟରେ ମଶାରି ବ୍ୟବହାର କରିବା ଅଥବା ମଶାବତୀ, ନିମ୍ବଧୂଆଁ, ମଶାନାଶକ ତେଲ ବ୍ୟବହାର କରିବା ଆବଶ୍ୟକ। ଘର ଚତୁଃପାର୍ଶ୍ବ ସବୁବେଳେ ସଫାସୁତୁରା ରଖିବା ଏବଂ ଅଧିକ ଦିନ କୌଣସି ସ୍ଥାନରେ ପାଣି ଜମା ହେବାକୁ ନଦେବା ଲାଗି ସେ ଉପସ୍ଥିତ ଲୋକଙ୍କୁ ବୁଝାଇଥିଲେ। ଏହି କାର୍ଯ୍ୟକ୍ରମରେ ସ୍ୱାସ୍ଥ୍ୟକର୍ମୀ ପୁଷ୍ପାଞ୍ଜଳି ପ୍ରଧାନ, ଅଙ୍ଗନବାଡି କର୍ମୀ ଶୁଭଲକ୍ଷ୍ମୀ ରାଉତ, ଆଶାକର୍ମୀ ପୁଷ୍ପଲତା ସାହୁଙ୍କ ସମେତ ଗାଁ କଲ୍ୟାଣ ସମିତିର ସଦସ୍ୟ ଓ ବହୁ ଗ୍ରାମବାସୀ ଯୋଗଦାନ କରିଥିଲେ।