ପାଟଣା: ଘଟଗାଁ ବ୍ଲକ୍ ଖୁଣ୍ଟାପଡାର ଗ୍ରାମରେ ଅଞ୍ଚଳର ସର୍ବ ପୁରାତନ ବାହୁଡା଼ଯାତ୍ରା ଅତୀବ ଆନନ୍ଦ ଉଲ୍ଲାସ ମଧ୍ୟରେ ସମ୍ପନ୍ନ ହୋଇଯାଇଛି। ଅପରାହ୍ନରେ ଘଣ୍ଟଘଣ୍ଟା, ଖୋଳତାଳ, ଢୋଲ ଶବ୍ଦ ସାଙ୍ଗକୁ ହରିବୋଲ, ହୁଳହୁଳି ଜୟ ଜଗନ୍ନାଥ ଧ୍ବନି ମଧ୍ୟରେ ଶ୍ରୀ ବିଗ୍ରହ ମାନଙ୍କର ଗୋଟିପହଣ୍ଡି କରା ଯାଇଥିଲା। ପୂର୍ବ ବର୍ଷ ମାନଙ୍କପରି କେବଳ ଶ୍ରଦ୍ଧାଳୁ ମହିଳା ମାନଙ୍କ ଦ୍ଵାରା ରଥ ଟାଣିବା କାର୍ଯ୍ୟ ଖୁବ୍ ଭାବଭକ୍ତିପୂର୍ଣ୍ଣ ଏବଂ ଶୃଙ୍ଖଳିତ ହୋଇଥିଲା।
ଖିରେଇଟାଙ୍ଗୀରିରେ ମହା ସମାରୋହରେ ଅନୁଷ୍ଠିତ ହୋଇଯାଇଛି। ପ୍ରଭୁ ଜଗନ୍ନାଥ, ବଳଭଦ୍ର, ସୁଭଦ୍ରାଙ୍କ ବାହୁଡା଼ ଯାତ୍ରାରେ ଠାକୁର ରାଜା ଗୋପବନ୍ଧୁ ଦେଓଙ୍କ ଛେରା ପହଁରା ନୀତି କର୍ମ ପରେ ରଥକୁ ଖୁବ ଉତ୍ସାହ ସହକାରେ ଭକ୍ତ ମାନେ ଟାଣୁଥିବାର ଦୃଶ୍ୟ ଦେଖାଯାଇଥିଲା। ଆଖ ପାଖ ଗାଁର ଲୋକମାନଙ୍କ ପ୍ରବଳ ଜନଗହଳି ଥିବା ଯୋଗୁଁ ରଥଯାତ୍ରାରେ କୌଣସି ବିଶୃଙ୍ଖଳା ସୃଷ୍ଟି ନ ହେବା ପାଇଁ ତୁରୁମୁଙ୍ଗା ପୁଲିସ ନିୟୋଜିତ ହୋଇଥିଲେ।
ପାଟଣା ବ୍ଲକ ଅନ୍ତର୍ଗତ ରାଜନଗରର ପ୍ରାଚୀନ ଦଧିବାମନ ଜୀଉଙ୍କ ବାହୁଡା଼ ଯାତ୍ରା ୩୪୭ ବର୍ଷରେ ପଦାର୍ପଣ କରିଥିବା ବେଳେ ଆଜି ବାହୁଡା଼ ଯାତ୍ରା ଦେଖିବାକୁ ଓ ରଥ ଟାଣିବାକୁ ରାଜନଗରରେ ବହୁ ଲୋକଙ୍କ ଭିଡ଼ ଜମିଥିଲା। ଅନ୍ୟୁନ ୧୦ ହଜାର ଶ୍ରଦ୍ଧାଳୁଙ୍କ ସମାବେଶ ଏଠାକାର ପରିବେଶକୁ ଆଧ୍ୟାତ୍ମିକମୟ କରିଦେଇଥିଲା। ଏଠାରେ ପରିଚ୍ଛା ଦୁର୍ଯ୍ୟୋଧନ ମିଶ୍ର ଛେରା ପହଁରା କରିଥିଲେ।
