କେନ୍ଦୁଝରଗଡ଼: ରଥ ଉପରେ ଭକ୍ତଙ୍କୁ ଦର୍ଶନ ଦେବାପରେ ବୁଧବାର ରାତି ପ୍ରାୟ ସାଢ଼େ ୮ଟାରେ ଗୋଟି ପହଣ୍ଡି ହୋଇ ମାଉସୀ’ମା ମନ୍ଦିର ରତ୍ନବେଦୀକୁ ବିଜେ ହୋଇଛନ୍ତି କେନ୍ଦୁଝରର ଆରାଧ୍ୟ ଦେବତା ପ୍ରଭୁ ଶ୍ରୀ ବଳଦେବଜୀଉ, ଦେବୀ ସୁଭଦ୍ରା ଓ ପ୍ରଭୁ ଶ୍ରୀ ଜଗନ୍ନାଥ। ମଙ୍ଗଳବାର ସନ୍ଧ୍ୟାରେ ବିଶ୍ୱର ସର୍ବୋଚ୍ଚ ରଥ ‘ନନ୍ଦିଘୋଷ’ ଶ୍ରୀଗୁଣ୍ଡିଚା ମନ୍ଦିର ନିକଟରେ ପହଞ୍ଚିବା ପରେ ବୁଧବାର ରୀତିନୀତି ଅନୁଯାୟୀ ପୂଜାର୍ଚ୍ଚନା କରାଯାଇଥିଲା। ଦିନତମାମ ପହଣ୍ଡିବେଶରେ ତିନିଠାକୁର ଭକ୍ତଙ୍କୁ ରଥ ଉପରେ ଦର୍ଶନ ଦେବାପରେ ରାତିରେ ଶ୍ରୀଗୁଣ୍ଡିଚା ମନ୍ଦିରକୁ ବିଜେ କରିଛନ୍ତି। ଗୁରୁବାର ଠାରୁ ତିନିଠାକୁର ଶ୍ରୀଗୁଣ୍ଡିଚା ମନ୍ଦିରରେ ଭକ୍ତଙ୍କୁ ବିଭିନ୍ନ ବେଶରେ ଦର୍ଶନ ଦେବା ପରେ ଆସନ୍ତା ବୁଧବାର ଶ୍ରୀମନ୍ଦିରକୁ ବାହୁଡି ତହିଁ ପରଦିନ ଅର୍ଥାତ୍ ଜୁନ ୨୯ତାରିଖ ଗୁରୁବାର ସୁନାବେଶରେ ଦର୍ଶନ ପରେ ଶୁକ୍ରବାର ପହଣ୍ଡିବେଶ ହୋଇ ଶ୍ରୀମନ୍ଦିରକୁ ବିଜେ କରିବେ ବୋଲି ଦେବୋତ୍ତର ବିଭାଗ ପକ୍ଷରୁ କୁହାଯାଇଛି। ଏହି ଉପଲକ୍ଷେ ମଙ୍ଗଳବାର ଠାରୁ ୧୦ ଦିନବ୍ୟାପୀ ବଡଦାଣ୍ଡରେ ଥିବା ଭଜନମଣ୍ଡପ, ଘୁଙ୍ଗୁରୁ କ୍ଲବ ଓ ଇଲେଭେନ ବୁଲେଟ କ୍ଲବ ମଞ୍ଚରେ ପ୍ରତି ସନ୍ଧ୍ୟାରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଛି। ଜିଲା ଦେବୋତ୍ତର ଅଧିକାରୀ ତଥା କେନ୍ଦୁଝର ଉପଜିଲାପାଳ ରାମଚନ୍ଦ୍ର କିସ୍କୁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଚତୁର୍ଦ୍ଧାମୂର୍ତ୍ତି ରତ୍ନବେଦୀକୁ ବିଜେ କରିଥିବା ବେଳେ ଏଥିରେ ପହଣ୍ଡିଆ, ସେବାୟତ ଓ ସ୍ୱେଛାସେବୀ ସମ୍ପୂର୍ଣ୍ଣ ସହଯୋଗ କରିଥିଲେ।
Popular Categories
Previous article
Next article