ୱେଲିଂଟନ୍ : କାର୍ଯ୍ୟକ୍ଷେତ୍ରରେ ନିଜ କାମ ସହିତ ଶିଶୁପାଳନ ଯେ ଏକକାଳୀନ କରାଯାଇପାରେ ତାହା ପ୍ରଦର୍ଶନ କରିଛନ୍ତି ନ୍ୟୁଜିଲାଣ୍ଡ ପାର୍ଲାମେଣ୍ଟ ବାଚସ୍ପତି ଟ୍ରେଭରା ମାଲାର୍ଡ। ପାର୍ଲାମେଣ୍ଟରେ ତୈଳ ଦର ବୃଦ୍ଧି ଉପରେ ଗରମାଗରମ ଆଲୋଚନା ଚାଲିଥିଲାବେଳେ ବାଚସ୍ପତି ଜଣେ ମହିଳା ସାଂସଦଙ୍କ ୬ସପ୍ତାହର ପୁଅକୁ ବୋତଲରେ କ୍ଷୀର ପିଆଇବା ସହ କାର୍ଯ୍ୟ ପରିଚାଳନା କରୁଥିବାର ଦୃଶ୍ୟ ସାମାଜିକ ଗଣମାଧ୍ୟମରେ ପ୍ରସାରିତ ହେବା ସହ ଚହଳ ସୃଷ୍ଟି କରିଛି।
ଲେବର ପାର୍ଟି ସାଂସଦ ଟୋମାଟି କଫି ବକ୍ତବ୍ୟ ରଖୁଥିଲାବେଳେ ବାଚସ୍ପତି ମାଲାର୍ଡ ତାଙ୍କ ପୁଅ ଟୁଟାନେକାଇକୁ ଧରିଥିଲେ। ଟୋମାଟି ଗତ ମାସରେ ସ୍ଥାନାପନ୍ନ ମାତୃତ୍ବ (ସରୋଗେସୀ)ମାଧ୍ୟମରେ ପୁତ୍ର ସନ୍ତାନର ଜନନୀ ହୋଇଥିଲେ। ପାର୍ଲାମେଣ୍ଟକୁ ଆସିଲାବେଳେ ସେ ପୁଅକୁ ସାଙ୍ଗରେ ଆଣିଥାଆନ୍ତି। ବୁଧବାର ବାଚସ୍ପତି ତାଙ୍କ ପୁଅକୁ କୋଳରେ ଧରି ବୋତଲରେ କ୍ଷିର ପିଆଉଥିବା ଓ ବିତର୍କ ପରିଚାଳନା କରୁଥିବାର ଦୃଶ୍ୟ ବେଶ୍ ଉପଭୋଗ୍ୟ ହୋଇଥିଲା। ଏହାର ଯବାବରେ ବାଚସ୍ପତି କହିଥିଲେ ଯେ ଏଭଳି ପରିସ୍ଥିତିରେ ସେ ଯେକୌଣସି ସାଂସଦଙ୍କ ସନ୍ତାନକୁ ସମ୍ଭାଳିପାରିବେ ଏବଂ ସମ୍ପୃକ୍ତ ସାଂସଦଙ୍କୁ ବିତର୍କ ପାଇଁ ସହଯୋଗ କରିପାରିବେ। ମାଲାର୍ଡ ହେଉଛନ୍ତି ଦେଶର ବରିଷ୍ଠ ରାଜନୀତିଜ୍ଞ। ତାଙ୍କର ତିନି ପିଲା ଓ ୬ନାତିନାତୁଣୀ ଅଛନ୍ତି। ଏଭଳି ପଦକ୍ଷେପ ଦ୍ବାରା ସେ ସଂସାର ଓ କାର୍ଯ୍ୟାଳୟର କାର୍ଯ୍ୟ ଯେ ଏକ ସମୟରେ ସମୁଚିତ ଭାବେ କରାଯାଇପାରିବ ତାହାର ବାର୍ତ୍ତା ଦେଇଛନ୍ତି। ଉଲ୍ଲେଖଯୋଗ୍ୟ ଯେ ୨୦୧୭ରେ ମାଲାର୍ଡ ପ୍ରଚଳିତ ଆଇନରେ ସଂଶୋଧନ ପୂର୍ବକ ପାର୍ଲାମେଣ୍ଟକୁ ଅଧିକ ଶିଶୁ ସହଯୋଗାପନ୍ନ କରିଥିଲେ। ଏହା ପରଠାରୁ ବହୁସଂଖ୍ୟକ ସାଂସଦ ସେମାନଙ୍କ ଶିଶୁଙ୍କୁ ଲାଳନପାଳନ ପାଇଁ ପାର୍ଲାମେଣ୍ଟକୁ ଆଣିବାର ସୁଯୋଗ ପାଇଥିଲେ। ପ୍ରଧାନମନ୍ତ୍ରୀ ଜେସିଣ୍ଡା ଆେର୍ଡର୍ଣ୍ଣ ଗତ ବର୍ଷ ଦେଶର ପ୍ରଥମ ଓ ବିଶ୍ବର ଦ୍ବିତୀୟ ନେତ୍ରୀ ଭାବେ କ୍ଷମତାରେ ଥାଇ ମାତୃତ୍ବ ଲାଭ କରିଥିଲେ। ସେ କାର୍ଯ୍ୟାଳୟକୁ ଆସିଲାବେଳେ ଅନେକ ସମୟରେ ଝିଅକୁ ଆଣିଥାଆନ୍ତି। ଏମିତିକି ଗତବର୍ଷ ସେପ୍ଟେମ୍ବରରେ ଜାତିସଙ୍ଘ ସାଧାରଣ ପରିଷଦ ବୈଠକରେ କୁନି ଝିଅ ନେଭେ ଟି ଆରୋହା ସହିତ ଯୋଗଦେବା ଚର୍ଚ୍ଚାର ବିଷୟ ହୋଇଥିଲା।
