ଦୁବାଇ : ଅଷ୍ଟ୍ରେଲିଆରେ ୨୦୨୦ରେ ଖେଳାଯିବାକୁ ଥିବା ଟ୍ବେଣ୍ଟି-୨୦ ବିଶ୍ବକପ୍ ଖେଳିବାକୁ ଯୋଗ୍ୟତା ଅର୍ଜନ କରିଛି ନେଦରଲାଣ୍ଡ୍ସ। ୟୁଏଇରେ ଏବେ ଖେଳା ଯାଉଥିବା ଟ୍ବେଣ୍ଟି୨୦ ବିଶ୍ବକପ୍ ଯୋଗ୍ୟତା ପର୍ଯ୍ୟାୟ ଟୁର୍ଣ୍ଣାମେଣ୍ଟର ସେମିଫାଇନାଲରେ ପହଞ୍ଚି ନେଦରଲାଣ୍ଡ୍ସ ଏହି କୃତିତ୍ବ ହାସଲ କରିଛି। ମଙ୍ଗଳବାର ତା’ର ଅନ୍ତିମ ଲିଗ୍ ମ୍ୟାଚ୍ରେ ଆୟୋଜକ ୟୁଏଇକୁ ସହଜରେ ୮ ୱିକେଟରେ ହରାଇ ନେଦରଲାଣ୍ଡ୍ସ ଏହି କୃତିତ୍ବ ହାସଲ କରିଛି। ନେଦରଲାଣ୍ଡସ ୬ଟି ମ୍ୟାଚ୍ରୁ ୫ଟି ଜିତି ୧୦ ପଏଣ୍ଟ ସହ ଗ୍ରୁପ୍ର ୨ୟ ସ୍ଥାନରେ ରହିଛି। ଏହି ଗ୍ରୁପ୍ରୁ ପ୍ରଥମ ଦଳ ଭାବେ ସେମିଫାଇନାଲରେ ପହଞ୍ଚି ପାପୁଆ ନ୍ୟୁ ଗିନି ବିଶ୍ବକପ୍ ଯୋଗ୍ୟତା ଅର୍ଜନ କରିସାରିଛି।
ମଙ୍ଗଳବାର ମ୍ୟାଚ୍ରେ ନେଦରଲାଣ୍ଡସ ବୋଲର ଘାତକ ବୋଲିଂ କରିବାରୁ ୟୁଏଇ ୨୦ ଓଭର ଶେଷରେ ୯ ୱିକେଟରେ ୮୦ ରନ୍ କରିଥିଲା। ପରେ ୧୫.୧ ଓଭରରେ ୨ ୱିକେଟ ହରାଇ ନେଦରଲାଣ୍ଡସ ବିଜୟୀ ହୋଇଥିଲା। ନଭେମ୍ବର ୧ରେ ଆୟରଲାଣ୍ଡ ବିପକ୍ଷରେ ନେଦରଲାଣ୍ଡସ ସେମିଫାଇନାଲ ଖେଳିବ। ପ୍ରଥମେ ବ୍ୟାଟିଂକରି ୟୁଏଇ ମାତ୍ର ୯ ରନ୍ରେ ୫ଟି ୱିକେଟ ହରାଇଥିଲା। ପରେ ୱାହିଦ୍ ଅହମ୍ମଦ ୧୯, ମହମ୍ମଦ ବୁଟା ୧୬ ଓ ଅଧିନାୟକ ଅହମ୍ମଦ ରାଜା ୨୨ ରନ୍ କରିବାରୁ ୟୁଏଇ ୮୦ ରନ୍ରେ ପହଞ୍ଚି ପାରିଥିଲା। ନେଦରଲାଣ୍ଡସର ବ୍ଲାଣ୍ଡନ୍ ଗ୍ରୋଭର ୪ଟି ଏବଂ ପର୍ ଭାନ୍ ମିକେରେନ୍ ଓ ଟିମ୍ ଭାନ୍ ଡର୍ ଗଗ୍ଟେନ୍ ୨ଟି ଲେଖାଏଁ ୱିକେଟ ନେଇଥିଲେ। ପରେ ନେଦରଲାଣ୍ଡସ ପାଇଁ ଓପ୍ନର ବେନ୍ କୁପର ଅପରାଜିତ ୪୩ ଓ କଲିନ୍ ଆକରମ୍ୟାନ୍ ୧୮ ରନ୍କରି ଦଳକୁ ଜିତାଇଥିଲେ। ବ୍ଲାଣ୍ଡନ୍ ଗ୍ରୋଭର ପ୍ଲେୟର ଅଫ୍ ଦି ମ୍ୟାଚ୍ ହୋଇଥିଲେ।
Comments are closed.