ନେମାଳ : ନେମାଳ ଥାନା ଅନ୍ତର୍ଗତ ସାନ୍ତପୁର ସ୍ଥିତ ଜୟନ୍ତୀଦେବୀ ବାଳିକା ନୋଡାଲ ଉଚ୍ଚ ବିଦ୍ୟାଳୟ ପରିସରରେ ବିଦ୍ୟାଳୟ ସ୍ତରୀୟ ବିଜ୍ଞାନ ମେଳା ଅନୁଷ୍ଠିତ ହୋଇଯାଇଛି। ପ୍ରଧାନ ଶିକ୍ଷକ କାର୍ତ୍ତିକ ଚନ୍ଦ୍ର ଦାସଙ୍କ ଅଧ୍ୟକ୍ଷତାରେ ଆୟୋଜିତ ଉଦ୍ଘାଟନୀ ସଭାରେ ମୁଖ୍ୟ ଅତିଥି ଭାବେ ସମାଜସେବୀ ରମେଶ ଚନ୍ଦ୍ର ସ୍ୱାଇଁ ଯୋଗଦେଇ ଛାତ୍ରଛାତ୍ରୀ ମାନଙ୍କୁ ବିଜ୍ଞାନ ସମ୍ପର୍କିତ ଜ୍ଞାନ ଆହୋରଣ କରି ଏହାକୁ ଲୋକାଭୀମୁଖୀ କରିବାକୁ ପ୍ରେରଣା ଦେଇଥିଲେ। ମୁଖ୍ୟ ବକ୍ତା ଭାବେ ପ୍ରାକ୍ତନ ସରପଞ୍ଚ ଦେବେନ୍ଦ୍ର କୁମାର ସାହୁ ଓ ସମ୍ମାନିତ ଅତିଥି ଭାବେ ଶିକ୍ଷାବିତ ଅମିଲ୍ୟ କୁମାର ମହାନ୍ତି, ସମାଜସେବୀ ଭୁବନାନନ୍ଦ ଦଳାଇ, କାର୍ତ୍ତିକ ଚନ୍ଦ୍ର ସ୍ୱାଇଁ, ପରିବେଶବିତ ପ୍ରମୋଦ କୁମାର ଦାଶ, ଅଚ୍ୟୁତାନନ୍ଦ ବିଦ୍ୟାପୀଠର ପ୍ରଧାନ ଶିକ୍ଷକ ଦେବ ପ୍ରସାଦ କର ପ୍ରମୁଖ ଯୋଗଦେଇ ମାନବର ଦୈନନ୍ଦିନ ଚଳଣୀରେ ବିଜ୍ଞାନର ଉପଯୋଗିତା ସମ୍ପର୍କରେ ବକ୍ତବ୍ୟ ପ୍ରଦାନ ପୂର୍ବକ ଛାତ୍ରଛାତ୍ରୀ ମାନେ ବୈଜ୍ଞାନିକ ମନୋଭାବାପନ୍ନ ହେବା ପାଇଁ ପରାମର୍ଶ ଦେଇଥିଲେ।ଏହି ଅବସରରେ ସିନିୟର ଓ ଜୁନିୟର ବର୍ଗର ଛାତ୍ରଛାତ୍ରୀ ମୋଟ ୪୩ଟି ପ୍ରକଳ୍ପ ପ୍ରଦର୍ଶନ କରିଥିଲେ। ସମୀକ୍ଷା ପୂର୍ବକ ଜୁନିୟର ବର୍ଗରେ ଚିନ୍ମୟୀ ପୁହାଣ ପ୍ରଥମ, ଆକାଂକ୍ଷା ବେହେରା ଏବଂ ସୋନାଲିସା ସ୍ୱାଇଁ ଯୁଗ୍ମ ଦ୍ୱିତୀୟ, ସାଇସ୍ମୃତି ମଲିକ ଏବଂ ଶୁଭସ୍ମିତା ଦାସ ଯୁଗ୍ମ ତୃତୀୟ ସ୍ଥାନ ଗ୍ରହଣ କରିଥିବା ବେଳେ ବରିଷ୍ଠ ବର୍ଗରେ ଶିବାନୀ ଶଙ୍କର ମହାପାତ୍ର ପ୍ରଥମ, ତପସ୍ୱିନୀ ସ୍ୱାଇଁ ଦ୍ୱିତୀୟ ଓ ରୁଦ୍ର ପ୍ରସାଦ ପୁହାଣ ତୃତୀୟ ସ୍ଥାନ ଅଧିକାର କରିଥିଲେ। ବିଦ୍ୟାଳୟ ପରିଚାଳନା ସମିତି ଚେୟାର ପରସନ୍ ଦେବ ପ୍ରସାଦ ପୁହାଣ, ସଭ୍ୟ କଳ୍ପତରୁ ବାରିକ, ଚୈତନ୍ୟ ଦଳାଇ, ସୁଜାତା ନାୟକ, ନିବେଦିତା ପଣ୍ଡା, ଶକୁନ୍ତଳା ଦଳାଇ ପ୍ରମୁଖ ପରିଚାଳନା କରିଥିଲେ।
