ଡେସ୍କ: ଶଳା-ଭିଣୋଇ ସମ୍ପର୍କ କିଭଳି, ତାହା ସମସ୍ତଙ୍କୁ ଜଣା ଏବଂ ଏହି ସମ୍ପର୍କକୁ ମଜାଳିଆ ସମ୍ପର୍କ ବୋଲି ମଧ୍ୟ ବିବେଚନା କରାଯାଇଥାଏ। କିନ୍ତୁ ବିହାରର ଆରାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଶଳା ଗେଲ ଖେଳିବାରୁ କ୍ରୋଧିତ ଭିଣୋଇ ତାଙ୍କୁ ଦାନ୍ତରେ କାମୁଡ଼ି ଦେଇଥିଲା। ଏହାପରେ ଉଭୟ ପକ୍ଷ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଏଥିରେ ଜଣେ ମହିଳାଙ୍କ ସମେତ ୧୦ ଜଣ ଗୁରୁତର ଆହତ ହୋଇଛନ୍ତି। ଚଳିତ ବର୍ଷ ଏପ୍ରିଲ ୮ରେ ଏହି ଘଟଣା ଘଟିଛି। ଏହି ଘଟଣା ଘଟିଛି ବରହରା ଥାନା ଅନ୍ତର୍ଗତ ଲୋହର ଶ୍ରୀପାଲ ଗାଁରେ।
ଗୋଟିଏ ପକ୍ଷର ସୁମିତ୍ରା କୁମାରୀ କହିଛନ୍ତି ଯେ ଚନ୍ଦ୍ରଭୂଷଣ କୁମାର (ଶଳା) ହସିହସି ତାଙ୍କ ଭିଣୋଇଙ୍କୁ କିଛି କହିଥିଲେ। ଏହି କାରଣରୁ ତାଙ୍କ ଭିଣୋଇ ଚନ୍ଦ୍ରଭୂଷଣଙ୍କୁ ଦାନ୍ତରେ କାମୁଡ଼ି ଦେଇଥିଲେ। ଏହାପରେ ଚନ୍ଦ୍ରଭୂଷଣ ତାଙ୍କ ଭିଣୋଇ ଓ ଭିଣୋଇଙ୍କ ଭାଇଙ୍କୁ ମାଡ଼ ମାରିଥିଲେ। ଏହି ସମୟରେ ତାଙ୍କ ମା’ ସେଠାକୁ ଆସିଥିଲେ। ଉଭୟ ପକ୍ଷ ମଧ୍ୟରେ ଗାଳିଗୁଲଜ ପରେ ଧସ୍ତାଧସ୍ତି ହୋଇଥିଲା।
ଅନ୍ୟ ପକ୍ଷର ଚନ୍ଦ୍ରଭୂଷଣ କୁମାର କହିଛନ୍ତି ଯେ, ସୋମବାର ସକାଳେ ତାଙ୍କ ଶଳା ଓ ସେ ସରକାରୀ ପଞ୍ଚାୟତ ଭବନରେ ଏକାଠି ବସିଥିଲେ। ଏହାପରେ ସେମାନଙ୍କ ମଧ୍ୟରେ ହସ ଖୁସି ଓ ମଜାକ ହୋଇଥିଲା। ଏହି ସମୟରେ ଏମିତି ଏକ ମଜାକ ହୋଇଥିଲା ଯେ ଭିଣୋଇଙ୍କୁ ପସନ୍ଦ ଆସିନଥିଲା। ଏହି ସମୟରେ ଉଭୟଙ୍କ ମଧ୍ୟରେ ଗାଳିଗୁଲଜ ହେବା ପରେ ଘଟଣା ଶାନ୍ତ ହୋଇଥିଲା। ଏହାପରେ ସନ୍ଧ୍ୟାରେ ଘଟଣା ପରିବାର ଲୋକଙ୍କ ପାଖରେ ପହଞ୍ଚିଥିଲା। ସୋମବାର ଉଭୟ ପକ୍ଷ ମୁହାଁମୁହିଁ ହୋଇଥିଲେ। ତେବେ ଉଭୟ ପକ୍ଷରୁ କେହି ଥାନାରେ ଏପର୍ଯ୍ୟନ୍ତ ଏତଲା ଦେଇନାହାନ୍ତି।
