ସମାଜଲାଇଭ ଡେସ୍କ: ମହିଳାଙ୍କୁ ଅସଦାଚରଣର ବିରୋଧ କରିବାରୁ ଜଣେ ଜାତୀୟ ସ୍ତରୀୟ ବଡି ବିଲ୍ଡରଙ୍କୁ ହତ୍ୟା କରାଯାଇଛି। ୨୦ରୁ ଅଧିକ ଦୁର୍ବୃତ୍ତ ତାଙ୍କୁ ପିଟି ପିଟି ହତ୍ୟା କରିଛନ୍ତି। ହରିୟାଣାର ରୋହତକ ଅଞ୍ଚଳରେ ଏହି ଦୁର୍ଭାଗ୍ୟପୂର୍ଣ୍ଣ ଘଟଣା ଘଟିଛି। ହତ୍ୟାର ଶିକାର ହୋଇଛନ୍ତି ୨୬ ବର୍ଷୀୟ ବଡି ବିଲ୍ଡର ତଥା ପାରା ଆଥଲେଟ୍ ରୋହିତ ଧନଖଡ଼।
ଗତ ଶୁକ୍ରବାର ରୋହିତ ତାଙ୍କର ଜଣେ ସାଙ୍ଗ ଯତୀନ ସହିତ ଯତୀନଙ୍କ ଜଣେ ସମ୍ପର୍କୀୟଙ୍କ ବିବାହ କାର୍ଯ୍ୟକ୍ରମରେ ଯୋଗଦେଇଥିଲେ। ବିଳମ୍ବିତ ରାତିରେ ତିଗାଡ଼ାନା ଗ୍ରାମରୁ ବରଯାତ୍ରୀ ଦଳ ସେଠାକୁ ଆସିଥିଲେ। ବିବାହ ଶୋଭାଯାତ୍ରା ସମୟରେ କିଛି ବରଯାତ୍ରୀ କେତେଜଣ ମହିଳାଙ୍କୁ ଦୁର୍ବ୍ୟବହାର କରିଥିଲେ। ରୋହିତ ସେଥିରେ ହସ୍ତକ୍ଷେପ କରି ସେମାନଙ୍କୁ ବାରଣ କରିଥିଲେ, ଯାହାକୁ ନେଇ ସାମାନ୍ୟ କଳିଝଗଡ଼ା ହୋଇଥିଲା। ଅଭିଯୁକ୍ତମାନେ ସେଠାରୁ ଚାଲିଯାଇଥିଲେ।
ବିବାହ ଉତ୍ସବ ପରେ ରୋହିତ ଏବଂ ଯତୀନ କାରରେ ଘରକୁ ଫେରିଥିଲେ। ଏକ ଲେଭଲ କ୍ରସିଂ ନିକଟରେ ସେମାନଙ୍କ ଗାଡ଼ି ଅଟକିଥିବା ସମୟରେ ୨୦ରୁ ଅଧିକ ଯୁବକ ମାରଣାସ୍ତ୍ର ଏବଂ ଠେଙ୍ଗା ଧରି ସେଠାରେ ପହଞ୍ଚି ଆକ୍ରମଣ କରିଥିଲେ। ଯତୀନ କୌଣସି ପ୍ରକାର ଜୀବନ ବଞ୍ଚାଇ ସେଠାରୁ ପଳାଇଥିଲେ। ହେଲେ ସେମାନେ ରୋହିତଙ୍କୁ ନିସ୍ତୁକ ମାଡ଼ ମାରିଥିଲେ। ଗୁରୁତର ଅବସ୍ଥାରେ ତାଙ୍କୁ ଡାକ୍ତରଖାନା ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ରୋହିତଙ୍କର ମୃତ୍ୟୁ ଘଟିଥିଲା।
ରୋହିତଙ୍କ ଘର ରୋହତକ ଜିଲା ହୁମାୟୁନୁପୁର ଗ୍ରାମରେ। ସେ ୨୦୨୮ରେ ଜାତୀୟ ଭାରତ୍ତୋଳନ ଚମ୍ପିଆନଶିପରେ ସ୍ବର୍ଣ୍ଣପଦକ ହାସଲ କରିଥିଲେ। ଦିବ୍ୟାଙ୍ଗ ଶ୍ରେଣୀରେ ସେ ୨୦୧୮ରେ ୨ଟି ଅନ୍ତର୍ଜାତୀୟ ସ୍ବର୍ଣ୍ଣ ପଦକ ମଧ୍ୟ ଜିତିଥିଲେ। ସେହିବର୍ଷ ସ୍ବାଧୀନତା ଦିବସରେ ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ତାଙ୍କୁ ସମ୍ମାନିତ କରିଥିଲେ।
