ଭୁବନେଶ୍ବର: ନନ୍ଦନକାନନରେ ହାତୀ ‘ପ୍ରେମା’ର ମୃତ୍ୟୁ। ଗତକାଲି ଅସୁସ୍ଥ ପରେ ଆଜି ଚିକିତ୍ସାଧିନ ଅବସ୍ଥାେର ମୃତ୍ୟୁ ହୋଇଛି। ବୟସାଧିକ କାରଣରୁ ହାତୀ ‘ପ୍ରେମା’ର ମୃତ୍ୟୁ ହୋଇଥିବା ଉପନିର୍ଦେଶକ କହିଛନ୍ତି। ହାତୀ ‘ପ୍ରେମା’ର ମୃତ୍ୟୁ ପରେ ନନ୍ଦନକାନନରେ ହାତୀ ସଂଖ୍ୟା ୩କୁ ହ୍ରାସ ପାଇଛି।
ନନ୍ଦନକାନନ ପ୍ରାଣୀ ଉଦ୍ୟାନର ବାର୍ଦ୍ଧକ୍ୟ ପୀଡିତ ଚିକିତ୍ସାଧିନ ବୟସ୍କା ହାତୀ ପ୍ରେମା(୫୮)ର ଶୁକ୍ରବାର ଅପରାହ୍ନରେ ମୃତ୍ୟୁ ହୋଇଛି। ସେ ଗତକଲିଠାରୁ ହାତୀଶାଳର ଚଟାଣରେ ଶୋଇ ରହୁଥିଲା। ଗୋଡ ଲଗାଇ ଉଠି ଛିଡା ହୋଇ ପାରୁ ନ ଥିଲା। ମାହୁନ୍ତ ଶତ ଚେଷ୍ଟା କଲେ ମଧ୍ୟ ଚଟାଣରୁ ଉଠିପାରି ନଥିଲା। ଏହାପରେ ‘ପ୍ରେମା’କୁ ଉଠାଇ ଠିଆ କରିବା ଲାଗି ବିଶେଜ୍ଞଙ୍କ ସହାୟତା ନିଆଯାଇଥିଲା। ‘ପ୍ରେମା’କୁ ଠିଆ କରାଇବା ଲାଗି ଅବସରପ୍ରାପ୍ତ ସହକାରୀ ନିର୍ଦ୍ଦେଶକ କମଳ ଲୋଚନ ପୁରୋହିତ, କେନ୍ଦ୍ରୀୟ ଚିଡିଆଖାନା ସଂଯୋଜକ ତଥା ଓୟୁଏଟି ପ୍ରାଣୀ ଚିକିତ୍ସା ଔଷଧ ବିଭାଗର ପ୍ରଫେସର ନିରଞ୍ଜନ ସାହୁ ଓ ଚନ୍ଦକାରୁ ଜଣେ ମାହୁନ୍ତ ଆସିଥିଲେ। ସେମାନଙ୍କ ତତ୍ୱାବଧାନରେ ପ୍ରେମା ପେଟ ତଳେ ବେଲଟ ବାନ୍ଧି ହାଇଡ୍ରା ମେସିନ ସାହାଯ୍ୟରେ ତାକୁ ଚଟାଣରୁ ଉଠାଯାଇଥିଲା। ଉଠିବା ପରେ ସେ ଆଗ ଗୋଡ ତଳେ ଲଗାଇ ଠିଆ ହେବାକୁ ଅକ୍ଷମ ହୋଇଥିଲା। ପ୍ରଫେସର ସାହୁ ‘ପ୍ରେମା’କୁ ସାଲାଇନ ଦେବା ପରେ ସେ ଧୀରେ ଧୀରେ ଗୋଡ ତଳେ ଲଗାଇବାକୁ ଚେଷ୍ଟା କଲେ ମଧ୍ୟ ଠିଆ ହୋଇ ପାରିନଥିଲା। କିନ୍ତୁ କିଛି ସମୟ ବସିବା ପରେ ଶୋଇ ଯାଇଥିଲା। ଶେଷରେ ବିଶେଷଜ୍ଞ ଓ ନନ୍ଦନକାନନ କର୍ତ୍ତୃପକ୍ଷଙ୍କ ସବୁ ଚେଷ୍ଟା ବିଫଳ ହୋଇଥିଲା ଏବଂ ଅପରାହ୍ନରେ ‘ପ୍ରେମା’ର ମୃତ୍ୟୁ ହୋଇଛି।
Comments are closed.