ମୁମ୍ବଇ.—ଶିବସେନାର ଚାପଯୋଗୁଁ ବିଜେପି ମୁମ୍ବଇ ଉତ୍ତରର ପ୍ରାର୍ଥୀ ବଦଳାଇଥିବା ସୂଚନା ମିଳିଛି । ଏବେ ସାଂସଦ ଥିବା କୀର୍ତ୍ତୀ ସୌମ୍ୟାଙ୍କୁ ବିଜେପି ମୁମ୍ବଇ ଉତ୍ତରର ଲୋକସଭା ପାଇଁ ପ୍ରାର୍ଥୀ ହେବାର ଥିଲେ । ହେଲେ କୀର୍ତ୍ତୀ ସୌମ୍ୟା ଶିବସେନାକୁ ବାରମ୍ବାର ଲକ୍ଷ୍ୟ କରି ବକ୍ତବ୍ୟ ଦେଉଥିବାରୁ ଶିବସେନାର ଅଧ୍ୟକ୍ଷ ଉଦ୍ଧବ ଠାକରେ ତାଙ୍କୁ ପ୍ରାର୍ଥୀ ନ କରିବା ପାଇଁ ବିଜେପି ଉପରେ ଚାପ ପ୍ରୟୋଗ କରିଥିବା ଅଭିଯୋଗ ହୋଇଛି ।
ଏହାପରେ ବିଜେପି ସେହି ଆସନରୁ ମନୋଜ କୋଟାକଙ୍କୁ ପ୍ରାର୍ଥୀ ଘୋଷଣା କରିଛି । କୀର୍ତ୍ତୀ ବିଜେପିରୁ ଟିକେଟ ପାଇବେ ବୋଲି ଆଶାୟୀ ଥିଲେ । ତିନି ସପ୍ତାହ ତଳୁ ସେ ନିର୍ବାଚନ ପ୍ରଚାର ଆରମ୍ଭ କରିଥିଲେ । ମାତ୍ର ୨୦୧୭ରେ ମୁମ୍ବାଇ ନଗରପାଳିକା ପାଇଁ ହୋଇଥିବା ନିର୍ବାଚନରେ ସେ ଉଦ୍ଧବ ଠାକରେଙ୍କ ବିରୋଧରେ ବିଭିନ୍ନ କଥା କହିଥିବାରୁ ତାଙ୍କୁ ଟିକେଟ ନଦେବା ପାଇଁ ଶିବସେନା ଚାପ ପକାଇଥିଲା ।
