ମୁଖୀଗୁଡା- କଳାହାଣ୍ଡି ଜିଲ୍ଲା ଜୟପାଟଣା ଉପନିବନ୍ଧନ କାର୍ଯ୍ୟାଳୟ କୋଠା ବିପଦ ସଂକୁଳ ଅବସ୍ଥାରେ ରହିଛି ।ଏହି କାର୍ଯ୍ୟାଳୟ ଉପରେ ଜୟପାଟଣା ତହସିଲ ଅଞ୍ଚଳର ଲୋକେ ଜମି କିଣାବିକା ତଥା ଅନ୍ୟାନ୍ୟ କାମ ଉପରେ ନିର୍ଭର କରୁଛନ୍ତି । କାର୍ଯ୍ୟାଳୟ ରୁ ସରକାର ବାର୍ଷିକ ପ୍ରlୟ ଏକ କୋଟି ଟଙ୍କାର ରାଜସ୍ୱ ପାଉଛନ୍ତି । ହେଲେ କାର୍ଯ୍ୟାଳୟ କୋଠା ମରାମତି ଦିଗରେ ଧ୍ୟାନ ଦିଆଯାଇ ନ ଥିବା ଅଭିଯୋଗ ହେଉଛି ।
୧୯୯୪ ମସିହାରେ ନିର୍ମିତ ଏହି କୋଠା ମରାମତି ଅଭାବରୁ ବର୍ଷା ଦିନେ ପାଣି ଗଳୁ ଥିବାବେଳେ ଛାତରୁ ସିମେଣ୍ଟ ପ୍ଲାଷ୍ଟର ଖସିୁଛି, ଦିନରେ କାର୍ଯ୍ୟାଳୟକୁ ଆସୁଥିବା ଲୋକ ଏବଂ ସରକାରୀ କର୍ମଚାରୀଙ୍କ ଜୀବନ ପ୍ରତି ବିପଦ ସୃଷ୍ଟି ହେଉଛି । ରେକର୍ଡ ରୁମର ଛାତର କିଛି ଅଂଶ ସିମେଣ୍ଟ ପ୍ଲାଷ୍ଟର ଖସି ଲୁହାଛଡ଼ ଓହଳି ଗଲାଣି । ୧୯୬୫ ମସିହାରୁ ଥିବା ଅନେକ ଦରକାରୀ କାଗଜପତ୍ର ନଷ୍ଟ ହେବାକୁ ବସିଲାଣି । କେତେବେଳେ ଛାତ ସମ୍ପୂର୍ଣ୍ଣ ଗଳି ପଡିବ ସେହି ଆଶଙ୍କାରେ ସେଠାରେ କାମ କରୁଥିବା କର୍ମଚାରୀ ଏବଂ କାମ ପାଇଁ ଆସୁଥିବା ସାଧାରଣଲୋକ ।
ବ୍ୟାପକ ରାଜସ୍ୱ ଆଦାୟ ଏବଂ କାର୍ଯ୍ୟାଳୟ ତରଫରୁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ ପରେ ମଧ୍ୟ ଜୟପାଟଣା ଉପନିବନ୍ଧନ କାର୍ଯ୍ୟାଳୟ କୋଠା ମରାମତି କିମ୍ବା ନୂତନ କୋଠା ନିର୍ମାଣ ନହେବା ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଜୟପାଟଣା ଉପନିବନ୍ଧନ କାର୍ଯ୍ୟାଳୟ କୋଠା ମରାମତି କାମ ତୁରନ୍ତ କରିବା ଦିଗରେ ବିଭାଗୀୟ ଉଚ୍ଚ କତ୍ତୃପକ୍ଷ ଦୃଷ୍ଟି ଦେବାକୁ ଦାବି ହେଉଛି ।
