ଯୁବକ ଜମିରେ ଚାଷ କାମ କରୁଥିବା ବେଳେ ଆକାଶରୁ ଖସିଲା ମୃତ୍ୟୁ – ସ୍ନାତକ ଶିକ୍ଷା ପରେ ଚାଷକାମରେ ପରିବାରକୁ କରୁଥିଲେ ସାହାଯ୍ୟ

ଟିଟିଲାଗଡ଼ – ଟିଟିଲାଗଡ଼ ଥାନା ଅନ୍ତର୍ଗତ ମହୁଲପଡା ପଞ୍ଚାୟତ ଗୁଲମି ଗ୍ରାମର କରୁଣା ଚନ୍ଦନଙ୍କ ପୁଅ ଦିଲୀପ ଚନ୍ଦନ (୨୨)ଙ୍କ ବଜ୍ରାଘାତରେ ପରଲୋକ ହୋଇଯାଇଛି l ଗୁରୁବାର ଅପରାହ୍ନରେ ବାପା ମାଙ୍କ ସହ ଦିଲୀପ ଚାଷ ଜମିରେ କାମ କରୁଥିବା ବେଳେ ଅଚାନକ ବର୍ଷା ସହ ବିଜୁଳି ଘଡଘଡି ଆରମ୍ଭ ହୋଇଥିଲା l ଏନେଇ ଭୟରେ ସେମାନେ ଧାଇଁ ଆସୁଥିବା ବେଳେ ଦିଲୀପଙ୍କ ଉପରେ ବଜ୍ରାଘାତ ହୋଇଥିଲା l ତାଙ୍କୁ ପରିବାର ଲୋକେ ଟିଟିଲାଗଡ଼ ଉପଖଣ୍ଡ ମୁଖ୍ୟ ଡାକ୍ତରଖାନାକୁ ଆଣିଥିବା ବେଳେ ଡାକ୍ତର ମୃତ ଘୋଷଣା କରିଥିଲେ l

ଖବର ପାଇ ଟିଟିଲାଗଡ଼ ବ୍ଳକ ସରପଞ୍ଚ ସଂଘ ସଭାପତି ବିରବର ସାହୁ, ସମାଜସେବୀ ଗୋଲକ ସାହୁ ., ମୁକେଶ ପ୍ରଧାନୀ, ତଥାଗତ କଟା, ରୋହିତ ବାଗ, ବଳଦେବ ବାଗ ପ୍ରମୁଖ ଡାକ୍ତରଖାନାରେ ପହଞ୍ଚିବା ସହ ସ୍ଥାନୀୟ ତହସିଲଦାରଙ୍କୁ ଖବର ଦେଇଥିଲେ l ଘଟଣା ନେଇ ଟିଟିଲାଗଡ଼ ପୁଲିସ ଏକ ଅପମୃତ୍ୟୁ ମାମଲା ରୁଜୁ ସହ ଶବ ଜବତ କରିଛି l ଶୁକ୍ରବାର ଶବ ବ୍ୟବଚ୍ଛେଦ ହେବ ବୋଳି ଜଣାପଡିଛି l ଦିଲୀପ ସ୍ନାତକ ଶିକ୍ଷା ସମାପ୍ତି ପରେ ଘରେ ବାପାମାଙ୍କୁ ଚାଷ କାମରେ ସହାୟତା କରୁଥିଲେ l ତାଙ୍କ ଅକାଳ ବିୟୋଗରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି l ପରିବାରଙ୍କୁ ସରକାରୀ ସହାୟତା ପ୍ରଦାନ ପାଇଁ ଅଞ୍ଚଳବାସୀ ଦାବି କରିଛନ୍ତି l