ଗୋପାଳପୁର : ବ୍ରହ୍ମପୁର ବନ ବିଭାଗ ଆଜି ଗୋଳାବନ୍ଦ ସ୍ଥିତ ହାତୀପାଦୁ ଓ ବ୍ରହ୍ମପୁର ବିଶ୍ଵବିଦ୍ୟାଳୟ ପରିସରରୁ ଏକ ମାଙ୍କଡ଼ ଓ ବଜ୍ରକାପ୍ତା ଉଦ୍ଧାର କରିଛି । ସୂଚନା ପ୍ରକାରେ ବିଶ୍ଵବିଦ୍ୟାଳୟ ପରିସରରେ ଥିବା ଭଞ୍ଜ ଆହାର କେନ୍ଦ୍ରରେ ଏକ ମାଙ୍କଡ଼ କିଛି ଦିନ ହେଲା ଗୋଠରୁ ଅଲଗା ହୋଇ ସ୍ଥାନୀୟ ଲୋକଙ୍କୁ ହଇରାଣ ହରକତ କରୁଥିବା ଅଭିଯୋଗ ହେଉଥିଲା ।
ଯାହାଫଳରେ କୌଣସି ଛାତ୍ରଛାତ୍ରୀ ଓ କର୍ମଚାରୀ ଭୟରେ ଆହାର କେନ୍ଦ୍ରକୁ ଯାଉନଥିଲେ । ଆଜି ପୁଣି ମାଙ୍କଡଟି ଉତ୍ପାତ ଆରମ୍ଭ କରି ଦେଇଥିଲା । କିଛି ଲୋକ ତାକୁ ଘଉଡ଼ାଇବା ସମୟରେ ନିକଟରେ ଥିବା ଶୌଚାଳୟ ଭିତରକୁ ମାଙ୍କଡଟି ଚାଲିଯାଇଥିଲା ଏବଂ ଆହାର କେନ୍ଦ୍ରର ଲିଜଧାରୀଜଣଙ୍କ ତାକୁ ବାହାର ପଟୁ କବାଟ ଦେଇଦେଇଥିଲେ । ଘଟଣା ନେଇ ବନବିଭାଗ କର୍ମଚାରୀଙ୍କ ସହ ଯୋଗାଯୋଗ କରାଯାଇଥିଲା । ପରେ ବନବିଭାଗ କର୍ମଚାରୀମାନେ ପହଞ୍ଚି ମାଙ୍କଡଟିକୁ କାବୁ କରିଥିଲେ । ବନବିଭାଗ ପକ୍ଷରୁ ଫରେଷ୍ଟର ଗିରିଶ ଚନ୍ଦ୍ର ରାୟ, ନୀଳାଞ୍ଚଳ ଦାଶ, ସ୍ୱାଧୀନ କୁମାର, କୃଷ୍ଣ ପ୍ରଧାନ, ଶ୍ରୀକାନ୍ତ ପଢିଆଳି, ଅଜିତ କୁମାର ଧାରୁଆ ଉପସ୍ଥିତ ଥିଲେ । ସେହିପରି ଗୋଳାବନ୍ଦ ସ୍ଥିତ ହାତୀପାଦୁ ଅଞ୍ଚଳରୁ ଏକ ବଜ୍ରକାପ୍ତା ଉଦ୍ଧାର କରିଥିଲା ବନବିଭାଗ । ଉଦ୍ଧାର ହୋଇଥିବା ମାଙ୍କଡ ଓ ବଜ୍ରକାପ୍ତାକୁ ଟାମଣା ଜଙ୍ଗଲରେ ଛଡ଼ାଯିବ ବୋଲି ବନବିଭାଗ ପକ୍ଷରୁ ସୂଚନା ମିଳିଛି।
ପୁଲିସକୁ ଲୁଟେରାଙ୍କ ଖୋଲା ଚାଲେଞ୍ଜ, ଦୁଇଦିନରେ ଦୁଇଟି ମନ୍ଦିରରୁ ଚୋରି
