ଆଠଗଡ : ଆଠଗଡ ପୁଲିସକୁ ଖୋଲା ଚ୍ୟାଲେଞ୍ଜ ଦେଇ ଦୁର୍ବୃତ୍ତମାନେ ଦୁଇଦିନରେ ଦୁଇଟି ମନ୍ଦିରରୁ ଚୋରି କରିଥିବା ଦେଖାଯାଇଛି । ରବିବାର ବିଳମ୍ବିତ ରାତିରେ ଠିକ୍ ଥାନା ସମ୍ମୁଖରେ ଥିବା ବହୁ ପୁରାତନ ଆଠଗଡର ଅଧିଷ୍ଠାତ୍ରୀ ମା’ ବାଉତିଙ୍କ ମନ୍ଦିରର ଚାରୋଟି ତାଲା ଭାଙ୍ଗି ଚୋରମାନେ ମା’ଙ୍କର କିଛି ସୁନାରୂପା ଅଳଙ୍କାର ସମେତ ନଗଦ ପ୍ରାୟ ୫-୬ ହଜାର ଟଙ୍କା ଲୁଟ କରିବାର ୨୪ ଘଣ୍ଟା ମଧ୍ୟରେ ବୀରକିଶୋରପୁର ମୈତ୍ରୀନଗରସ୍ଥିତ ବାହାଣ୍ଟା ବନଦୁର୍ଗା ମନ୍ଦିରରୁ ଏକାଧିକ ତାଲା ଭାଙ୍ଗି ଲୁଟ କରିଛନ୍ତି । ବାଉତି ମନ୍ଦିର ଚୋରି ପରେ କଟକରୁ ସନ୍ଧାନୀ କୁକୁର ସହିତ ପୁଲିସ ବିଜ୍ଞାନୀ ଦଳ ଆସି ତଦନ୍ତ କରିଥିଲେ ମଧ୍ୟ ପୁଲିସକୁ କିଛି ସୁରାକ ମିଳିପାରିନାହିଁ ।
ପୁଣି ସୋମବାର ବିଳମ୍ବିତ ରାତିରେ ମୈତ୍ରୀନଗର ନିକଟସ୍ଥ କାଜୁ ଜଙ୍ଗଲ ମଧ୍ୟରେ ଗତ କିଛି ବର୍ଷ ମଧ୍ୟରେ ଗଢି ଉଠିଥିବା ବାହାଣ୍ଟା ବନଦୁର୍ଗା ମନ୍ଦିରର ଦୁଇଟି ତାଲା ଭାଙ୍ଗି ଚୋରମାନେ ମାଙ୍କର ପ୍ରାୟ ୫ ଗ୍ରାମର ସୁନା ଅଳଙ୍କାର ସହିତ ୧୦୦ ଗ୍ରାମରୁ ଉର୍ଦ୍ଧ୍ବ ଓଜନର ରୂପା ଅଳଙ୍କାର, ବହୁ ପିତ୍ତଳ ଘଣ୍ଟ, ଘଣ୍ଟି ଏବଂ ପ୍ରାୟ ୩୦ଟି ନୂଆ ଶାଢ଼ୀ ସହିତ ଦାନବାକ୍ସରେ ଥିବା ୫ ହଜାରରୁ ଅଧିକ ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି । ମନ୍ଦିରର ପୂଜକ ଅରୁଣ କୁମାର ପରମାଣିକଙ୍କ ସମେତ କେତେକ ଶ୍ରଦ୍ଧାଳୁ ଏ ସମ୍ପର୍କରେ ଲିଖିତ ଏତଲା ଦେବା ପରେ ଆଇଆଇସି ଅନିରୁଦ୍ଧ ମୁଦୁଲିଙ୍କ ସମେତ ଅନ୍ୟ ପୁଲିସ ଅଧିକାରୀ ଘଟଣାସ୍ଥଳକୁ ଯାଇ ପ୍ରାଥମିକ ତଦନ୍ତ କରିଛନ୍ତି । ଏହା ଗୋଟିଏ ଲୁଟିଆ ଗ୍ୟାଙ୍ଗର କାମ ହୋଇଥିବା ଆଶଙ୍କା କରି ପୁଲିସ ଜୋରସୋର ତଦନ୍ତ ଆରମ୍ଭ କରିଛି ଏବଂ ଖୁବଶୀଘ୍ର ଏହି ଗ୍ୟାଙ୍ଗକୁ ଧରାଯିବ ବୋଲି ଆଇଆଇସି ମୁଦୁଲି ପ୍ରକାଶ କରିଛନ୍ତି ।
ଶିଶୁ କନ୍ୟାକୁ ଦୁଷ୍କର୍ମ ଓ ହତ୍ୟା ଧମକ ମାମଲା – ଅଭିଯୁକ୍ତକୁ ୨୫ ବର୍ଷ ସଶ୍ରମ କାରାଦଣ୍ଡାଦେଶ
